@gj_ufmo: اسمي زهراء عمري حالياً 14 سنة من محافظة البصرة قبل لا أحجيلكم عن الحادثة اللي غيرت مجرى حياتي ودمرت كل شي حلو بيها خلوني أعرفكم على عائلتي اللي جانوا مو بس أهل جانوا قطعة من الروح أبوي وأمي ثنيهم بعمر 60 حنانهم ما يننوصف وما يوم خلونا نحتاج شي أو نحس بنقص عندي أخوان اثنين وخوات اثنين علي 30 سنة هذا حبيبي وسندي جان يخاف علينا حتى من الهوا الطاير عبدالله 33 سنة أخوي الجبير ومحامي هو اللي شايل البيت ومعيشنه أحسن عيشة نور 25 سنة معلمة گلبها طيب لدرجة ما تقبل تتزوج حتى تبقى يمنا ملاك 23 سنة هاي روحي من الدنيا صديقتي وأختي وكل شي بالنسبة إلي ••••••••••••••••••••••••••••••• ليلة الحادثة 31 كانون الأول 2022 جان الجو بارد كلش والناس كلها تتحضر لاستقبال السنة الجديدة كاعدين ببيتنا وفرحانين نضحك ونسولف وأنا من فرحتي ميتة رحت أشبك بيهم واحد واحد وأبوسهم رحت كعدت بحضن أخوي عبدالله وهو يضحك ويشاقة وياي عبدالله: ولج زهورة عيب كبرتي صرتي عروس ما يصير زهراء: لا ما كبرت يمكم أبقى طفلة وما أكبر أبداً علي يضحك: عوفها عبود غير تحبك وتريد تدلل عليك عبدالله باوع لأبوي وهو يضحك: شوف بتك كاعدة بحضني وتحبني أكثر منك أبوي ضحك بصوت عالي وهو يكلب بالقنوات بالتلفزيون وهز إيده أبو زهراء: هاي مصلحة اسألها شتريد منك وراح تعرف الحقيقة دنك عليه عبدالله وبصوت ناصي كلي: ها زهرتي كولي شتريدين باوعت بعيونه وأنا ميتة ضحك كمت بست راسه وكلتله زهراء: أريد فلوس أريد أروح للمحل أشتري غراض للسهرة ملاك تضحك: ههههه صدك بابا كال مصلحة هاي بزر الكعدة انطيها لا تسويلنا فاتحة هنا نور: إي والله حتى إحنا ما شفنه هيج دلال من عبدالله بس زهورة مدللة علي فتح إيدينه لـ نور وملاك وكال: تعالن يمي أنا أدللجن وأعوضجن ركضن عليه وحضننه وهنه يضحكن وبنفس اللحظة دخلت أمي وبيدها كيكة حارة توها طالعة من الفرن ريحتها ترست البيت أم زهراء: طبعاً بناتي هذني يلا زهورة ماما روحي بسرعة للمحل وتعالي لا تتأخرين تمام كلبي أخذت 5 آلاف من عبدالله وباوعت الهم كلهم وضحكت ضحكة من كل كلبي وكلت الهم زهراء: ربع ساعة وأنا يمكم مو تحتفلون وتنسوني وتخلصون الكيكة طلعت من البيت والضحكة مالية وجهي الخمسة آلاف بيدي وأفكر بشنو راح أشتري حتى نكمل سهرتنا ما جان ببالي أبداً إنو هاي آخر مرة راح أشوف بيها وجوههم وهية تضحك ولا جان ببالي إنو الربع ساعة اللي كلتها راح تكون أطول ربع ساعة بحياتي وصلت للمحل اشتريت ورجعت أركض بس وأنا أقترب من فرعنا شميت ريحة مو طبيعية ريحة حريك قوية وخنكة شفت الناس تركض وصياح بالمنطقة كلبي لجم بصدري رجليني صارن ثكيلات ما يشيلني وصلت وشفت المنظر اللي دمرني بيتنا بيت الضحكة والحنان النار طالعة من شبابيجها وتكل ببيبانة الدخان الأسود غطى السما وأصوات الجيران تتعالى: الحكوا العائلة جوة وين الإطفاء وكفت بمكاني الغراض وكعن من إيدي ردت أصرخ بس صوتي ما طلع ردت أركض للنار ردت اصيح عبدالله علي يمة يابة بس النار جانت أقوى من كل شي الجيران لزموني جانوا يمنعوني أتقرب والنار تاكل بذكرياتي وأهلي سمعت صوت الانفجار داخل البيت وعرفت إنو كل شي انتهى بلمحة بصر تحولت ذيج الكيكة الحارة والضحكات اللي جانت تملي الصالة إلى رماد وسواد أبوي وأمي: اللي جانوا خيمة علينا راحوا سوة وما فاركو بعض حتى بالموت عبدالله وعلي: سندي وظهري اللي جنت أحس الدنيا كلها بيدي بوجودهم خذتهم النار مني نور وملاك: خواتي وصديقاتي اللي جنت أحلم أكبر وياهن تركنني وحيدة بنص الوجع طلعوهم الجثث واحد ورا الثاني هاي الوجوه اللي بستها قبل ربع ساعة صارت عبارة عن ذكرى توجع انتهت سنة 2022 بمأساة وبدت سنة 2023 وأنا يتيمة بلا أب بلا أم وبلا أخوان بقت بس ريحة الحريك بملابسي وصوت عبدالله وهو يكولي زهرتي وصورة أمي وهي تكص الكيكة بلحظة وحدة صرت أنا بزر الكعدة اللي بقت وحيدة تواجه الدنيا المظلمة بدون عائلتها كعدت بالگاع لا انشمرت بالگاع وشعري صار عليه تراب ورماد البيت صرختي جانت تطلع من نص كلبي صرخة يتيمة فقدت كل شي بلحظة وحدة الناس ملتلمة بس أنا أحس روحي بوادي ثاني عيوني على باب البيت المحترك أنتظر واحد منهم يطلع ويكلي جنا نشاقة وياج زهرتي تعالي كملي الكيكة بينما أنا بهاي الحالة شفت سيارات ولد عمي طبكت بالفرع نزلو وبوجوههم علامات الصدمة بس الصدمة مالتهم مو مثل ناري شفت ابن عمي هذا اللي يشتغل عقيد نزل من سيارته وبدل ما يركض يشبكني أو يمسح دموعي وكف گبالي وجتف إيدينه ببرود يباوعلي ويباوع للبيت المحترك عبالك ديشوف حادث غريب بالشارع مو بيت عمه وأهله نظراته جانت خالية من أي رحمة وكأن جبل من ثلج واكف گبالي وأنا جاي أحترك بناري •••••••••••••••••••••••••••••••••• قصة حزينه هاذا بارت 💔💔✨ #وتباديون💘_للابد
