🌴 රටවල් 195ක් සංචාරය කළ ලොව ළාබාලතම සංචාරකයාගෙන් ශ්‍රී ලංකාවට ඉහළ පැසසුම් රටවල් 195ම සංචාරය කළ ලොව ළාබාලතම පුද්ගලයා ලෙස පුළුල් ලෙස ප්‍රසිද්ධියට පත්ව සිටින කැමරන් මොෆිඩ් (Cameron Mofid) ශ්‍රී ලංකාව සම්බන්ධයෙන් ඉහළ ප්‍රශංසාවක් පළ කර තිබෙනවා. ඔහු සිය සමාජ මාධ්‍ය ඔස්සේ බෙදාගත් Podcast වැඩසටහනකදී සඳහන් කර ඇත්තේ, සාපේක්ෂව කුඩා රටක් වුවද ශ්‍රී ලංකාව තුළ විවිධ අත්දැකීම් ලබාගැනීමට විශාල අවස්ථාවක් පවතින බවයි. නේපාලය සහ මැලේසියාව වැනි රටවලට සාපේක්ෂව ශ්‍රී ලංකාවේ තම අත්දැකීම වඩාත් ප්‍රිය කළ බවද මොෆිඩ් සඳහන් කර තිබෙනවා. “ශ්‍රී ලංකාව මගේ හදවත දිනාගත් රටක්. හරිත පරිසරය, සුන්දර ස්වභාවික දර්ශන, විශාල වනජීවී සම්පතක් මෙහි තිබෙනවා. ඒ වගේම ශ්‍රී ලංකාව තවමත් නිසි ලෙස ඇගයීමට ලක් නොවූ රටක්.” “ශ්‍රී ලංකාව විශිෂ්ටයි. රට කුඩා වුණත් කරන්නත්, බලන්නත් බොහෝ දේ තිබෙනවා. වියදමත් සාපේක්ෂව අඩුයි. ඒ වගේම ශ්‍රී ලාංකික ජනතාව ඉතා හොඳයි,” යනුවෙන්ද ඔහු පවසා තිබෙනවා. තම ශ්‍රී ලංකා සංචාරය අතරතුර වෙනත් රටවලදී අත්විඳි ඇතැම් පරිසර දූෂණය හෝ සංචාරක වංචා වැනි අත්දැකීම් තමන්ට ශ්‍රී ලංකාවේදී හමු නොවූ බවද මොෆිඩ් පවසා තිබෙනවා. රටවල් 195ක් සංචාරය කර ඇති සංචාරකයෙකු ශ්‍රී ලංකාවේ ස්වභාවික සුන්දරත්වය, වනජීවී සම්පත, ජනතාව සහ සංචාරක අත්දැකීම් පිළිබඳ මෙලෙස ප්‍රශංසා කිරීම, ශ්‍රී ලංකාව ජාත්‍යන්තර සංචාරක ගමනාන්තයක් ලෙස පවතින ආකර්ෂණය පිළිබඳ තවත් අවධානයක් යොමු කරවන්නක් බවට පත්ව තිබෙනවා. - @damithniroshan06