සෞදියේදී මරණ දණ්ඩනයට මුහුණ දී සිටින අනෝජ් වෙනුවෙන් දෙමළ මුස්ලිම් මන්ත්‍රීවරු එකතුවෙයි : සමාව දෙන්නැයි සෞදි රජුගෙන් ඉල්ලීමක් කරන්න සැරසෙයි සමාජ මාධ්‍ය සටහනක් හේතුවෙන් සෞදි අරාබියේදී වසර පහක සිරදඬුවමක් නියම වී සිට සිරදඬුවම මරණ දණ්ඩනයක් දක්වා ඉහළ නංවා ඇති ශ්‍රී ලාංකීක ජාතිකයෙක් වන අනෝජ් සිවරසාගේ (Anojan Sivarasa) පවුලේ සාමාජිකයන් වෙත ගොස් ඔවුන්ට සහයෝගය පළ කිරීම සඳහා ඊයේ (18) හිටපු අමාත්‍ය රිෂාඩ් බදියුදීන් කල්මුණේ, නර්පත්තිමුනේ හි පිහිටි අනෝජ්ගේ නිවසට ගොස් ඔහුගේ මව සහ පවුලේ සාමාජිකයන් මුණගැසී තිබෙනවා. සෞදියේ මරණ දණ්ඩන වාර්තා හේතුවෙන් මුස්ලිම් ප්‍රජාව තුළ දැඩි කනස්සල්ලක් මතුවී ඇති බව පෙන්වා දෙන හිටපු අමාත්‍යවරයා, ජනාධිපති අනුර කුමාර දිසානායකගෙන් සහ සෞදි රජුගෙන් මේ සඳහා විශේෂ ඉල්ලීමක් කිරීමට මුස්ලිම් පාර්ලිමේන්තු මන්ත්‍රීවරුන් එකතු කර ගැනීමට කටයුතු කරන බවද ප්‍රකාශ කර තිබෙනවා. තවද, සමස්ත ලංකා ජමිය්තුල් උලමා (ACJU) සංවිධානයේ මැදිහත්වීම ලබා ගැනීමට ද බලාපොරොත්තු වන බව හෙතෙම සඳහන් කළා. මෙම උත්සාහය වෙනුවෙන් පාර්ලිමේන්තු මන්ත්‍රීවරුන් වන ගජේන්ද්‍රකුමාර් පොන්නම්බලම්, ශානක්‍ය රාසමානික්කම් සහ මනෝ ගනේෂන් යන මන්ත්‍රීවරුන් ද දුරකථන මාර්ගයෙන් සම්බන්ධ වී සහයෝගය පළ කර ඇති බවත්, සියලු දෙනා එක්ව මෙම අර්බුදයට විසඳුම් සෙවීමට කටයුතු කරන බවත්, ඔහු වැඩිදුරටත් කියා සිටියා. මේ අතර අනෝජ්ට සමාව (clemency) ලබා දෙන ලෙස සෞදි බලධාරීන්ගෙන් ඉල්ලා සිටින බව හිටපු විදේශ අමාත්‍ය අලි සබ්රි පවසනවා. වරදක් වූ විගස එය ඉවත් කර සමාව අයැද සිටි අවස්ථාවක, එවැනි ක්‍රියාවක් සඳහා මරණ දණ්ඩනය පැනවීම අනුකම්පා විරහිත සහ අසාධාරණ ක්‍රියාවක් බව පෙන්වා දෙන ඔහු, මේ සඳහා හදිසි රාජ්‍යතාන්ත්‍රික මැදිහත්වීමක් අවශ්‍ය බවද සමාජ මාධ්‍ය සටහනක් තබමින් වැඩිදුරටත් අවධාරණය කර තිබෙනවා. #HiruNews #HiruNewslk #truthatallcosts - @hirunews