𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝 𝐨𝐨 𝐂𝐚𝐩𝐢𝐭𝐨𝐥 𝐇𝐢𝐥𝐥 𝐤𝐮𝐥𝐚𝐧 𝐦𝐮𝐡𝐢𝐢𝐦 𝐚𝐡 𝐤𝐮𝐥𝐚 𝐲𝐞𝐞𝐬𝐡𝐚𝐲 𝐒𝐞𝐧𝐚𝐭𝐨𝐫 𝐓𝐞𝐝 𝐂𝐫𝐮𝐳 Madaxweynaha Jamhuuriyadda Somaliland, Mudane Cabdiraxmaan Maxamed Cabdillaahi (Cirro), ayaa Capitol Hill, Washington, D.C., kulan muhiim ah kula yeeshay Senator-ka Gobolka Texas, Mudane Ted Cruz, oo muddo dheer ahaa saaxiib iyo cod muuqda oo gudaha Aqalka Senate-ka Maraykanka uga dooda qaddiyadda Jamhuuriyadda Somaliland. Kulanka ayaa si qoto dheer diiradda loogu saaray dedaalka Somaliland ee ku wajahan Aqoonsiga Caalamiga ah, xoojinta iskaashiga istiraatijiyadeed ee Somaliland iyo Maraykanka, iyo fursadaha lagu horumarin karo danaha wadaagga ah ee dhinacyada amniga, iskaashiga dhaqaale, xasilloonida gobolka, iyo danaha istiraatijiyadeed ee ballaadhan ee Geeska Afrika, Badda Cas, Gacanka Cadmeed iyo guud ahaanba gobolka. Senator Ted Cruz waxa uu muddo dheer ahaa cod si cad uga dhex muuqda siyaasadda dalka Maraykanka oo taageera xoojinta xidhiidhka Maraykanka iyo Somaliland. Bishii August 2025, waxa uu si rasmi ah ugu baaqay Maamulka Madaxweyne Trump in uu Somaliland u aqoonsado dal madax-bannaan, isaga oo Somaliland ku tilmaamay saaxiib muhiim u ah Maraykanka, gaar ahaan dhinacyada amniga iyo diblomaasiyadda, isaga oo xusay muhimmadda istiraatijiyadeed ee ay Somaliland ku leedahay Gacanka Cadmeed iyo doorka ay ka qaadan karto danaha amni ee Qaranka Maraykanka. Intii uu socday kulankan, Madaxweynaha Jamhuuriyadda Somaliland waxa uu si qoto dheer ugu mahadnaqay Senator Ted Cruz dedaalkiisa joogtada ah iyo hoggaamintiisa ku aaddan in Kongareska Maraykanka, Siyaasad-Dejiyeyaasha iyo bulshada Maraykanka si dhab ah loogu soo bandhigo xaqiiqada ka jirta Somaliland, waayo-aragnimadeeda Dawladnimo, nidaamkeeda dimuqraadiga ah, amnigeeda, horumarkeeda himiladeeda Qaran iyo muhiimaddeeda istiraatijiyadeed. Madaxweynuhu waxa uu carrabka ku adkeeyey in Somaliland doonayso xidhiidh ay la yeelato Maraykanka oo aan ku dhisnayn samafal ama ku-tiirsanaan, balse ku salaysan dano-wadaag istiraatijiyadeed, kalsooni, is-qaddarin, masuuliyad wadaag iyo iskaashi fog oo waara. Senator Ted Cruz waxa uu marar badan si rasmi ah ugu baaqay in Dawladda Maraykanku ay aqoonsado Somaliland, isaga oo Somaliland ku tilmaamay goob mihiim u ah amniga iyo danaha istiraatiijiga ah ee uu leeyahay Maraykanku, isaga oo si joogto ah arrinta Somaliland ugu soo qaaday Golaha Senate-ka Maraykanka. Senator Ted Cruz waxa uu hore u yidhi weedh si weyn loo xuso oo ahayd: "Aqoonsiga Somaliland ma aha Samafal; waa Istaraatiijiyad (Recognizing Somaliland is not charity; it is strategy), taasi oo ka tarjumaysa aragtidiisa ah in xoojinta xidhiidhka Maraykanka iyo Somaliland ay qayb ka noqon karto ilaalinta iyo horumarinta danaha ballaadhan ee uu Maraykanka ku leeyahay gobol istiraatijiyad ahaan muhiim u ah dunida. Kulanku waxa uu mar kale xaqiijiyey sida ay Jamhuuriyadda Somaliland uga go'an tahay dhisidda iskaashi dhab ah oo leh aragti fog iyo nuxur istiraatijiyadeed oo ay la yeelato Maraykanka; iskaashi wax ka tari kara amniga gobolka, fursadaha dhaqaale, xasilloonida iyo bedbaadada marin-biyoodyada muhiimka u ganacsiga Caalamka iyo ilaalinta danaha istiraatijiyadeed ee ay wadaagaan labada dhinac. Madaxweyne Cabdiraxmaan Maxamed Cabdillaahi (Cirro) iyo weftigiisu waxa ay sii wadi doonaan hawlahooda iyo kulannada diblomaasiyadeed ee Washington, D.C., iyaga oo ku hawlan in codka, guulaha, himilooyinka iyo muhiimadda istiraatijiyadeed ee Jamhuuriyadda Somaliland si toos ah looga maqlo, loogana fahmo xarumaha lagu falanqeeyo, laguna dejiyo go’aannada saamaynta ku leh siyaasadda arrimaha dibedda ee dalka Maraykanka iyo guud ahaanba nidaamka caalamiga ah. 𝐀𝐋𝐋𝐀𝐀 𝐌𝐀𝐇𝐀𝐃 𝐋𝐄𝐇, 𝐗𝐮𝐬𝐞𝐞𝐧 𝐀𝐚𝐝𝐚𝐧 𝐂𝐢𝐠𝐞 (𝐃𝐞𝐲𝐫), 𝐀𝐟𝐡𝐚𝐲𝐞𝐞𝐧𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐉𝐚𝐦𝐡𝐮𝐮𝐫𝐢𝐲𝐚𝐝𝐝𝐚 𝐒𝐨𝐦𝐚𝐥𝐢𝐥𝐚𝐧𝐝 #Somaliland #viral #somalilandtiktok💚🤍❤ - @madaxweynecirro