ရန်ကုန်မြို့လယ် စမ်းချောင်းတွင် ဆယ်ကျော်သက်လူငယ်အုပ်စု ကျောင်းသားနှစ်ဦးအား နေ့ခင်းကြောင်တောင် ဓားဖြင့် ဝိုင်းဝန်းထိုးသတ် ရန်ကုန်၊ စက်တင်ဘာ ၁၉ ရန်ကုန်မြို့လယ် စမ်းချောင်းမြို့နယ်၊ ဗားဂရာလမ်းပေါ်ရှိ စမ်းချောင်းလင့်ခ် ညဈေးတန်းရှေ့တွင် ယနေ့ စက်တင်ဘာလ ၁၉ ရက် နေ့လယ်ပိုင်းက ဆယ်ကျော်သက်လူငယ်အုပ်စုတစ်စုမှ ကျောင်းသားလူငယ်နှစ်ဦးအား နေ့ခင်းကြောင်တောင် ဓားဖြင့် ရက်ရက်စက်စက် ဝိုင်းဝန်းထိုးသတ်မှု ဖြစ်ပွားခဲ့သည်။ ဖြစ်စဉ်မှာ Info Myanmar College မှ ကျောင်းသားလူငယ်နှစ်ဦးသည် လမ်းဘေး Platform ပေါ်၌ အနက်ရောင်ဝတ်စုံဝတ် ဆယ်ကျော်သက်လူငယ်အုပ်စုတစ်စုနှင့် မတော်တဆ ပုခုံးချင်းတိုက်မိရာမှ စကားအခြေအတင် ဖြစ်ပွားခဲ့ပြီး အဆိုပါ လူငယ်အုပ်စုက ဓားဖြင့် ရက်ရက်စက်စက် ထိုးသတ်ခဲ့ခြင်း ဖြစ်သည်။ ဓားထိုးခံရမှုကြောင့် ကျောင်းသားတစ်ဦးမှာ ခေါင်းတွင် ပြတ်ရှဒဏ်ရာကြီး ရရှိခဲ့ပြီး အခြားတစ်ဦးမှာမူ အဆုတ်ကို ဓားနှစ်ချက် အထိုးခံရသဖြင့် သွေးအိုင်ထဲတွင် မေ့မြောလဲကျကာ အသက်ရှူရခက်ခဲလျက်ရှိသည်။ ဒဏ်ရာရရှိသူများအား ပြည်သူ့ဆေးရုံကြီး၏ အရေးပေါ်ဌာနသို့ ပို့ဆောင်ပေးခဲ့ရသည်။ ရုပ်သံမှတ်တမ်းများအရ ကျူးလွန်သူများသည် ဓားထိုးမှု ကျူးလွန်ပြီးနောက် လမ်းမပေါ်တွင် အုပ်စုလိုက် ခပ်တည်တည် ရမ်းကားထွက်ပြေးသွားကြသည်ကို မြင်တွေ့ရသည်။ ၎င်းတို့၏ အပြုအမူများသည် တရားဥပဒေကို လုံးဝ မထောက်ထား၊ ဘာကိုမှ မကြောက်ရွံ့သည့် လမ်းသရဲဆန်ဆန် သွင်ပြင်ကို ပြသနေသည်။ ယခုဖြစ်စဉ်သည် ခေတ်ပျက်၊ စနစ်ပျက်အောက်တွင် ပြန်လည်ခေါင်းထောင်လာသည့် ‘ဇိုး’ ယဉ်ကျေးမှုနှင့် မူးယစ်ဆေးဝါးပြဿနာများကို မီးမောင်းထိုးပြနေပြီး မြို့ပြလုံခြုံရေးနှင့် တရားဥပဒေစိုးမိုးမှု ကင်းမဲ့လာခြင်းကို သက်သေပြနေသည်။ တရားခံများကို ထိရောက်စွာ အရေးမယူနိုင်ပါက နောက်ထပ် ဓားထိုးမှုနှင့် လူသတ်မှုများ ထပ်မံဖြစ်ပွားလာနိုင်သည်ကို စိုးရိမ်ပူပန်လျက်ရှိသည်။ #Yangon #Sanchaung #Kyauktada #Violence #MyDay - @redredredredbullbull