@myozawnyo96: မိန်းကလေးတစ်ယောက်ရဲ့ ဘဝမှာ မိဘတွေ သတိထားသင့်တဲ့အရွယ် ၁။ ဒီအရွယ်မှာ ဘာတွေပြောင်းလဲလာသလဲ။ အသက် ၁၂၊ ၁၃ နှစ်ဝန်းကျင်မှာ မိန်းကလေးတော်တော်များများဟာ ကိုယ့်ရုပ်ရည်၊ ကိုယ့်ခန္ဓာကိုယ်ကို ပိုဂရုစိုက်လာတတ်တယ်။ တခြားသူတွေရဲ့ အမြင်ကို ပိုအလေးထားလာတတ်တယ်။ သူငယ်ချင်းတွေရဲ့ လွှမ်းမိုးမှုကို ပိုခံရလွယ်လာတတ်တယ်။ တစ်စုံတစ်ယောက်ရဲ့ သဘောကျခြင်းကို ကိုယ့်တန်ဖိုးနဲ့ ဆက်စပ်မြင်လာတတ်တယ်။ လွတ်လပ်ချင်စိတ် တိုးလာတတ်တယ်။ ကိုယ့်ကိုယ်ကို လူကြီးတစ်ယောက်လို ခံစားလာတတ်တယ်။ ဒါပေမဲ့ ဒီအရွယ်မှာ ဆုံးဖြတ်ချက်ချနိုင်စွမ်းနဲ့ အန္တရာယ်ကို ကြိုတင်တွက်ဆနိုင်စွမ်းက အရွယ်ရောက်ပြီးသူတွေနဲ့ မတူသေးပါဘူး။ လူကြီးတစ်ယောက်လို ခံစားလာပေမယ့် လူကြီးတစ်ယောက်လို အတွေ့အကြုံမရှိသေးတဲ့ကာလ ဖြစ်ပါတယ်။ ဒီအချက်ကို မိဘတွေ နားလည်ထားဖို့ အရေးကြီးပါတယ်။ ၂။ “ဟိုကောင်က နင့်ကိုကြိုက်နေတာ… တွဲလိုက်ပါလား” ကျနော် မနေ့ညနေက လမ်းလျှောက်ထွက်ရင်း ဒီစကားလေးကို ကြားလိုက်မိပါတယ်။ ရိုးရိုးသူငယ်ချင်းစကားတစ်ခွန်းလို့ ထင်ရပေမယ့် ကလေးတစ်ယောက်ရဲ့ ဆုံးဖြတ်ချက်အပေါ် လွှမ်းမိုးနိုင်ပါတယ်။ ဥပမာ၊ ကောင်မလေးတစ်ယောက်က တစ်စုံတစ်ယောက်ကို စိတ်မဝင်စားသေးဘူး။ ဒါပေမဲ့ သူငယ်ချင်းက “နင့်ကို သူက ကြိုက်နေတာဟဲ့။ တွဲလိုက်ပါလား။” “သူများတွေတောင် တွဲနေကြပြီ။” ဆိုပြီး ထပ်ခါထပ်ခါ မြှောက်ပေးလာတဲ့အခါ… ကလေးက ကိုယ်တိုင်ဆုံးဖြတ်တာလား၊ သူငယ်ချင်းတွေရဲ့ လွှမ်းမိုးမှုကြောင့် ဆုံးဖြတ်တာလားဆိုတာ မိဘတွေ စဉ်းစားဖို့လိုလာပါတယ်။ သူငယ်ချင်းက အကြံပေးတာနဲ့ ကိုယ့်ဘဝကို သူငယ်ချင်းက ဆုံးဖြတ်ပေးတာ မတူပါဘူး။ ဒီအရွယ်မှာ ကလေးတွေကို “ကိုယ်တိုင်ဆုံးဖြတ်တတ်တဲ့အရည်အချင်း” သင်ပေးဖို့ လိုပါတယ်။ ၃။ စောစောစီးစီး တစ်စုံတစ်ယောက်ကို သဘောကျမိတာဟာ မကောင်းဘူးလား။ မကောင်းဘူးလို့ တစ်ဖက်သတ် မပြောသင့်ပါဘူး။ အသက် ၁၂၊ ၁၃ နှစ်မှာ တစ်စုံတစ်ယောက်ကို သဘောကျမိတာ၊ ချစ်ခင်မိတာဟာ ဖွံ့ဖြိုးတိုးတက်မှုရဲ့ သဘာဝအစိတ်အပိုင်းတစ်ခု ဖြစ်နိုင်ပါတယ်။ ဒါပေမဲ့ အဓိကပြဿနာက ခံစားချက်ရှိလာတာ မဟုတ်ပါဘူး။ အဲဒီခံစားချက်ကို ဘယ်လိုကိုင်တွယ်တတ်သလဲဆိုတာပါ။ ဥပမာ၊ စာသင်ချိန်မှာ စာမလုပ်နိုင်တော့တာ။ သူငယ်ချင်းတွေပြောသမျှကို မစဉ်းစားဘဲ လိုက်လုပ်တာ။ လျှို့ဝှက်တွေ့ဆုံဖို့ ဖိအားပေးခံရတာ။ ကိုယ်ရေးကိုယ်တာဓာတ်ပုံတွေ ပေးပို့မိတာ။ တစ်စုံတစ်ယောက်က ခြိမ်းခြောက်တာ၊ အနိုင်ကျင့်တာ။ စိတ်ညစ်စရာတွေကို မိဘကို မပြောရဲတော့တာ။ ဒီလိုအခြေအနေတွေကတော့ ကလေးရဲ့ လုံခြုံရေးနဲ့ ပညာရေးကို ထိခိုက်စေနိုင်ပါတယ်။ ၄။ အသက်ကွာခြားတဲ့ သူငယ်ချင်းအုပ်စုတွေရဲ့ လွှမ်းမိုးမှု ကိုယ့်ထက် အသက်ကြီးတဲ့သူတွေနဲ့ ပေါင်းသင်းတဲ့အခါ အတွေ့အကြုံအသစ်တွေ ရလာနိုင်ပါတယ်။ ကောင်းကျိုးလည်း ရှိနိုင်သလို ဆိုးကျိုးလည်း ရှိနိုင်ပါတယ်။ ကောင်းကျိုးများ ✅ အသက်ကြီးသူတွေဆီက အသိပညာနဲ့ အတွေ့အကြုံကောင်းတွေ သင်ယူနိုင်တယ်။ ✅ လူမှုဆက်ဆံရေးနဲ့ ပူးပေါင်းဆောင်ရွက်မှုစွမ်းရည် တိုးတက်နိုင်တယ်။ ✅ အပြုသဘောဆောင်တဲ့ စံနမူနာကောင်းတွေ ရရှိနိုင်တယ်။ သတိထားရမယ့် ဆိုးကျိုးများ ⚠️ အသက်ကြီးသူတွေက မသင့်တော်တဲ့ အပြုအမူတွေကို ပုံမှန်အရာတစ်ခုလို ပြောဆိုလာနိုင်တယ်။ ⚠️ “မလုပ်ရင် သူရဲဘောကြောင်တယ်” ဆိုတဲ့ ဖိအားမျိုး ပေးလာနိုင်တယ်။ ⚠️ အသက်အရွယ်နဲ့ မသင့်တော်တဲ့ အကြောင်းအရာတွေကို စောစောစီးစီး ထိတွေ့လာနိုင်တယ်။ ⚠️ အရွယ်မတူတဲ့ ဆက်ဆံရေးတွေမှာ အာဏာမညီမျှမှုနဲ့ အနိုင်ကျင့်မှုတွေ ဖြစ်လာနိုင်တယ်။ ဒီနေရာမှာ မိဘတွေ သတိထားရမယ့်အချက်က “ဘယ်သူနဲ့ပေါင်းနေလဲ” ဆိုတာထက် “ဘယ်လိုအပြုအမူတွေကို သင်ယူလာနေလဲ” ဆိုတာကို ပိုကြည့်ဖို့လိုပါတယ်။ ၅။ မိဘတွေက ဘယ်လိုပြုမူသင့်သလဲ။ ဒီအရွယ်တွေကို လုံးဝလွှတ်ထားလို့ မရသလို အရာရာကို ချုပ်ချယ်ထားလို့လည်း မရပါဘူး။ အဓိကက လွတ်လပ်ခွင့်နဲ့ စောင့်ကြည့်လမ်းညွှန်မှုကို မျှတအောင်ထားဖို့ပါ။ ① ကလေးရဲ့ သူငယ်ချင်းတွေကို သိအောင်လုပ်ပါ။ “ဘယ်သူနဲ့ပေါင်းနေတာလဲ” လို့ စစ်ဆေးရုံနဲ့ မလုံလောက်ပါဘူး။ သူငယ်ချင်းတွေက ဘယ်လိုအတွေးအခေါ်ရှိသူတွေလဲ၊ ဘယ်လိုအပြုအမူတွေရှိသလဲဆိုတာ သိဖို့လိုပါတယ်။ ② အချစ်နဲ့ပတ်သက်ပြီး အရှက်မခွဲပါနဲ့။ ကလေးက တစ်စုံတစ်ယောက်ကို သဘောကျမိတဲ့အခါ “ဒီအသက်နဲ့ အချစ်က ဘာလုပ်ဖို့လဲ။” ဆိုပြီး အရှက်ခွဲလိုက်ရင် ကလေးက နောက်တစ်ကြိမ် မိဘကို ရင်ဖွင့်တော့မှာ မဟုတ်ပါဘူး။ အဲဒီအစား “သမီးရဲ့ ခံစားချက်ကို ဖေဖေ၊ မေမေ နားလည်ပါတယ်။ ဒါပေမဲ့ ဒီအရွယ်မှာ ကိုယ့်ကိုယ်ကို ဘယ်လိုကာကွယ်ရမလဲဆိုတာ အတူတူစဉ်းစားကြရအောင်။” ဆိုတဲ့ပုံစံမျိုးနဲ့ ဆွေးနွေးသင့်ပါတယ်။ ③ “မလုပ်ရ” ထက် “ဘာကြောင့် မလုပ်သင့်တာလဲ” ကို ရှင်းပြပါ။ ဥပမာ “ယောက်ျားလေးနဲ့ မပေါင်းရဘူး” လို့ တားမြစ်တာထက် “ဘယ်သူနဲ့ပဲ ပေါင်းပေါင်း ကိုယ့်ကို လေးစားမှုရှိရမယ်။ ကိုယ်မကြိုက်တဲ့အရာကို ငြင်းပယ်ခွင့်ရှိတယ်” ဆိုတာမျိုး သင်ပေးပါ။ ④ အွန်လိုင်းလုံခြုံရေးကို သင်ပေးပါ။ ဒီခေတ်မှာ အန္တရာယ်တွေက လမ်းပေါ်မှာပဲ ရှိတာမဟုတ်ပါဘူး။ ဖုန်းထဲမှာလည်း ရှိနိုင်ပါတယ်။ မေတ္တာဖြင့် Nyo Thway ( Official ) #nyothwayofficial #foryourpage #creatersearchinsights #Teenager

Nyo Thway(Official)

Open In TikTok:

Region: MM

Sunday 20 September 2026 08:53:12 GMT