@moebayer: سمك فيليه مجمّد، بطاطا محمّرة، وصوص طحينية بالليمون يدخلوا الفرن سوا… والنتيجة أكلة سهلة، خفيفة ومليانة نكهات 🤍🐟 #سمك_بالطحينة #اكلات_سريعة #اكلات_لذيذه * 1 كيلو سمك فيليه مجمّد، حوالي 3 قطع كبار * 3 ملاعق كبيرة زيت زيتون * 1 ملعقة صغيرة بابريكا * ½ ملعقة صغيرة كركم، لونه بيعطي السمك لون ذهبي حلو * 1 ملعقة صغيرة كمون * 1 ملعقة صغيرة كزبرة ناشفة * ½ ملعقة صغيرة فلفل أسود * 1 ملعقة صغيرة ملح، أو حسب الرغبة * ½–1 ملعقة صغيرة بودرة ثوم * ½ ملعقة صغيرة أوريجانو * بشر خفيف من نصف ليمونة، اختياري لصوص الطحينية: * 1 كوب طحينية * ½ كوب لبن زبادي عادي * عصير 2 حبة ليمون كبيرة * 1½–2 كوب مي تقريبًا، حسب القوام * رشة ملح الطريقة أول إشي، بخلي السمك يذوب بالكامل، وبغسله وبنشفه منيح جدًا بمناديل المطبخ، وبعدها بقطع كل قطعة لقطع أصغر. بزبدية صغيرة بخلط البابريكا، الكركم، الكمون، الكزبرة الناشفة، الفلفل الأسود، الملح، بودرة الثوم والأوريجانو. بحط السمك بالصينية، وبرش عليه زيت الزيتون، وبعدها بوزع خلطة البهارات فوقه وبقلب القطع منيح لحد ما تتغطى بالتتبيلة من كل الجهات. بالنسبة للبطاطا، بقطع 4–5 حبات بطاطا متوسطة الحجم، وبغسلها وبنشفها منيح، وبحط عليها شوية زيت زيتون ورشة ملح. إذا بالـAir Fryer، مهم جدًا أسخنه مسبقًا كم دقيقة، لأنه هيك البطاطا ما بتلزق وبتتحمر أحسن. بدخل البطاطا على حرارة 200° مئوية لمدة حوالي 25 دقيقة، مع التقليب بالنص، والوقت ممكن يختلف حسب سماكة البطاطا. وبنفس الوقت بدخل السمك على فرن محمّى مسبقًا على 190° مئوية لمدة حوالي 25–30 دقيقة، أو لحد ما يستوي بدون ما ينشف. لصوص الطحينية، بخلط الطحينية مع اللبن وعصير الليمون والملح، وبنزل المي شوي شوي مع التحريك المستمر. بضيف المي لحد ما يصير عندي صوص خفيف وسهل ينسكب، بس مش مائي، لأنه رح يتسبك ويثقل بالفرن. إذا بتحبوا، ممكن تضيفوا بشر خفيف من نصف ليمونة للصوص، بيعطيه نكهة وانتعاش حلوين. لما يستوي السمك والبطاطا، بصب صوص الطحينية فوق السمك والبطاطا وبوزعه منيح، وبرجعهم على الفرن حوالي 10–15 دقيقة، لحد ما الصوص يسخن ويتسبك شوي. بالآخر بحط كزبرة خضرا أو بقدونس، وبحمّص شوية صنوبر وبوزعهم على الوجه. وممكن تعملوا فلفل حار مع شوية زيت زيتون وتحطوه على الوجه، اختياري طبعًا، بس بيعطي نكهة حلوة جدًا. وبقدمه مباشرة مع البطاطا المحمّرة، أو مع رز أبيض أو رز صيادية. السر: خلي صوص الطحينية أخف من القوام اللي بدك ياه بالنهاية، لأنه رح يتسبك ويثقل بالفرن.

Moe Bayer

Open In TikTok:

Region: DE

Sunday 20 September 2026 09:30:45 GMT