သောတာပန်ပုဂ္ဂိုလ်ရဲ့ အတွင်း စိတ်နေသဘောထားဟာလဲ လူသာမန်တွေနဲ့ မတူတော့ဘူး။ အသိတွေလဲ မတူတော့ဘူး။ အမြင်တွေလဲ မတူတော့ဘူး။ တမင် ဆင်ခြင်စဉ်းစားပြီး ရှောင်ကြဉ်နေရတာမျိုး မဟုတ်ဘူး။ အလိုလို တိုးတက်ပြောင်းလဲသွားခြင်းဖြစ်တယ်။ နိဗ္ဗာန်ကို ရှေးဦးစွာ ရရှိသိမြင်သွားသူလို့ ခေါ်ရတယ်။ သောတာပန်ပုဂ္ဂိုလ်ရဲ့ စိတ်မှာ– (၁) ရုပ် နာမ် ကို ငါ၊ ငါ့ဟာလို့ စွဲလမ် ယူဆခြင်း မရှိဘူး (ဒိဋ္ဌိ)။ (၂) တရားစစ် တရားမှန်ကိုလဲ ချီတုံချတုံ ဝေဖန်စဉ်းစားနေတာ သံသယဖြစ်နေတာ မရှိဘူး (ဝိစိကိစ္ဆာ)။ (၃) မှားယွင်းတဲ့ ခွေး နွား အကျင့်မျိုး (သီလဗ္ဗတ ပရာမာသ)လဲ မရှိဘူး။ (၄) ကိုယ့်ထက် သူများက ပိုပြီး ကောင်းစားသွားမှာကို မနာလိုတဲ့ (ဣဿာ)စိတ်၊ ကိုယ့်လို သူများ ကောင်းစားလာမှာကို ဝန်တိုတဲ့ (မစ္ဆရိယ)စိတ်မျိုးလဲ မရှိတော့ဘူး။ ဒါ အောက်ထက်ဆုံး သောတာပန် အရိယာတို့ရဲ့ စိတ်ထား။ ဒီယုတ်ညံ့တဲ့ စိတ်ထားတွေ ကင်းကွာသွားတယ် ဆိုရင်ပဲ ဘယ်လောက်ချမ်းသာ ငြိမ်းအေးသွားမယ်ဆိုတာ ခန့်မှန်းနိုင်လောက်ပြီ။ ဒီတော့………. (၅) ဘုရား တရား သံဃာ ရတနာသုံးပါးကို ခြွင်းချက်မရှိ အားကိုး ယုံကြည်သူ ဖြစ်သွားပြီ။ (၆) ခိုးလို သတ်လို လိမ်လိုတဲ့ စိတ်တွေ ဒီဘဝ မပြောနဲ့၊ နောက်ဘဝ အဆက်ဆက်မှာတောင် မရှိနိုင်တော့ဘူး။ ဘဝခြား သော်လည်း ငါးပါးသီလကို ဘယ်တော့မှ မကျူးလွန်တဲ့ အဆင့် ရောက်သွားပြီ။ သာဝက ဗောဓိဆုပန်ထားတဲ့ သူများက အနည်းဆုံး ဒီအဆင့်ရောက်အောင် အားခဲရမယ့် အခါကောင်းကြီးလို့မှတ်။ အဲ- အထက်အထက် အရိယာ ပုဂ္ဂိုလ်တွေကျတော့ တစ်ဆင့် ထက်တစ်ဆင့် မြှင့်တက်သွားပြီ။ ချမ်းသာမှုတွေ တိုးလာပြီ။ စိတ်ဆိုး စိတ်ပျက်တာတွေ၊ လောကီအာရုံတွေအပေါ် တွယ်တာ စိတ်တွေ၊ မာန်ထောင်လွှားမှုတွေ ဘာမှ မရှိတော့ဘူး။ ကုန်ကုန်ပြောရင် ယုတ်ညံ့တဲ့ အောက်တန်းစားစိတ်ထားတွေ အလျင်းမရှိတော့လို့ ငြိမ်းအေးကုန်ကြပြီ။ အောက်အောက်ကို ဘယ်တော့မှ မဇုန်းတော့ဘဲ အထက်အထက် ဘုံတွေမှာသာ ခုံလှုံသွားကြမယ်။ ချမ်းမြေ့စွာ ဘဝနေနည်း (နှာ-၂၉၆) (19,9,2026) - @dhamma96943