1992-ci il oktyabrın 17-də Şabran rayonunda anadan olan Vüqar İsmayılov orta təhsilini Samir Zülfüqarov adına Şabran rayon 3 nömrəli tam orta məktəbdə alıb. Uşaqlıq və gənclik illərindən idmana böyük maraq göstərən Vüqar müxtəlif idman növləri ilə məşğul olub, bir neçə dəfə respublika çempionu adını qazanıb. Patrul.az xəbər verir ki, 2013-cü ildə Azərbaycan Respublikası Daxili Qoşunlarında hərbi xidmətə başlayan Vüqar İsmayılov 2019-cu ildən etibarən Müdafiə Nazirliyinin hərbi hissələrindən birində kəşfiyyatçı kimi fəaliyyət göstərib. Vüqar 2016-cı il Aprel döyüşlərində, 2020-ci il İkinci Qarabağ müharibəsində və 2022-ci il Qisas əməliyyatlarında iştirak edib. Füzuli, Xocavənd və Şuşa istiqamətlərində gedən döyüşlərdə göstərdiyi şücaətlə seçilib. Hərbi xidmət zamanı göstərdiyi qəhrəmanlıqlara görə müxtəlif medallarla təltif olunub. Döyüş yoldaşlarını heç vaxt tək qoymadı İkinci Qarabağ müharibəsi zamanı iki dəfə yaralanmasına baxmayaraq, Vüqar döyüş meydanını və silahdaşlarını tərk etməyib. Onun döyüş yoldaşlarından olan Heydərin sözlərinə görə, Vüqar cəbhədə şəhidlərimizi geridə qoymamaq üçün gecə saatlarında belə onların nəşini təhlükəli ərazilərdən çıxararaq qucağında daşıyıb. Döyüş yoldaşlarının xatirələrində Vüqar cəsarətli, güclü və silahdaşlarına bağlı hərbçi kimi qalıb. Ailəsi üçün böyük dayaq olan Vüqar dostları və döyüş yoldaşları arasında da böyük hörmət qazanıb. Son döyüşü Vüqar İsmayılov 2023-cü il sentyabrın 20-də Qarabağda keçirilən lokal xarakterli antiterror tədbirləri zamanı şəhid olub. Şəhidin nəşi üç gün sonra doğulduğu Şabran rayonuna gətirilib və Şəhidlər xiyabanında torpağa tapşırılıb. Anası Şəmsiyə xanım jurnalistlərə verdiyi müsahibələrində Vüqar şəhid olduqdan sonra onunla bağlı erməni sosial media hesablarında təhqiramiz paylaşımların edildiyini bildirib. Babasının yolunu davam etdirdi Vüqarın atası İlqar İsmayılovun sözlərinə görə, oğlunun tabutuna geyindirilən hərbi geyimi ona babası verib. Böyük Vətən müharibəsinin iştirakçısı olmuş babasının yolunu davam etdirən Vüqar həyatını hərb sahəsinə həsr edib və 2023-cü ildə Qarabağda şəhidlik zirvəsinə ucalıb. Qardaşının xatirələrində isə Vüqarın fiziki gücü ilə bağlı xüsusi bir ifadə yadda qalır. İdmançı olan və təxminən 110 kiloqram çəkisi olan Vüqarın dəfn mərasimində tabuta sığmaması ilə bağlı deyilən bu söz sonradan onun haqqında xatirələrin ən təsirli ifadələrindən birinə çevrilib. “Tabuta sığmayan qəhrəman” ifadəsi zaman keçdikcə Vüqarın yalnız fiziki gücünü deyil, onun xarakterini, böyüklüyünü və qəhrəmanlığını ifadə edən simvolik bir sözə çevrilib. Adı yaşadılır Şəhid Vüqar İsmayılovun xatirəsinin əbədiləşdirilməsi məqsədilə Şabran rayonunda onun adına şəhid bulağı açılıb. Vüqar kimi neçə-neçə oğul bu torpağın bütövlüyü uğrunda canından keçib. Neçə ana övladını, neçə uşaq atasını, neçə ailə öz dayağını itirib. Bu gün həmin torpaqlarda rahat və təhlükəsiz yaşaya biliriksə, bunu Vüqar kimi şəhidlərimizin göstərdiyi fədakarlıq və qəhrəmanlıq sayəsində edə bilirik. Onların haqqı qarşısında sözlər aciz qalır. Sizi unutmayacağıq. Allah bütün şəhidlərimizə rəhmət eləsin. Məkanınız cənnət, ruhunuz şad olsun. Sevinc Yarməmmədova - @patrul.az.official