នៅថ្ងៃទី២១-២២ ខែកញ្ញា ឆ្នាំ២០២៦នេះ អ្នកយកព័ត៌មានជាតិ និងអន្តរជាតិជាច្រេីននាក់ ក្រោមការសម្របសម្រួលរបស់ក្រសួងព័ត៌មាន បានចុះទៅយកព័ត៌មាននៅតាមទីតាំងដែលក្រុមឧក្រិដ្ឋជនបានប្រព្រឹត្តបទល្មេីស Online Scams ហេីយត្រូវបានកម្លាំងសមត្ថកិច្ចកម្ពុជា ចុះបង្ក្រាបនាពេលកន្លងទៅ។ ជាក់ស្តែងនៅព្រឹកថ្ងៃទី២១ ខែកញ្ញានេះ អ្នកយកព័ត៌មានជាតិ និងអន្តរជាតិ រួមទាំងបណ្តាញព័ត៌មាន Fresh News (៣៩អង្គភាព ៧៩នាក់) បានចុះទៅយកព័ត៌មាននៅមជ្ឈមណ្ឌលពាណិជ្ជកម្មម៉ឺនជ័យ ឬ 8 Park ស្ថិតនៅឃុំក្របៅ ស្រុកកំចាយមារ ខេត្តព្រៃវែង ជាក្រុមហ៊ុនរបស់ ព្រីនគ្រុប ដែលមានមេក្លោង ចេន ហ្សី ត្រូវបានកម្ពុជាចាប់បញ្ជូនទៅចិន កាលពីពេលកន្លងទៅ។ មជ្ឈមណ្ឌល ពាណិជ្ជម៉ឺនជ័យ ឬ 8 Park មានទំហំផ្ទៃដីជិត ១២០ហិកតា ដោយចែកចេញជា៣តំបន់ មានផ្ទៃដីជិត៥០ហិកតា។ ទីតាំងមជ្ឈមណ្ឌលពាណិជ្ជម៉ឺនជ័យ ត្រូវសាងសង់នៅឆ្នាំ២០២៣ ហើយនៅ២០២៤ មានវត្តមានជនបរទេសចូលមកបម្រើការងារ ដែលមានប្រមាណ ៧ពាន់នាក់ នៅឆ្នាំ២០២៥ កើនឡើងជិត ២ម៉ឺននាក់ រួមមានជនជាតិចិន ប៉ាគីស្ថាន ឥណ្ឌា និងនេប៉ាល់ច្រើនជាងគេ។ នៅខែតុលា ឆ្នាំ២០២៥ សមត្ថកិច្ចកម្ពុជា បានធ្វើការស៊ើបអង្កេតលើបុគ្គល ចេន ហ្សី រហូតដកសញ្ជាតិបុគ្គល ចេន ហ្សី រួចចាប់បញ្ជូនទៅកាន់ប្រទេសចិនវិញ។ នៅទីតាំង 8 park មានជនបរទេសចាកចេញជាបន្តបន្ទាប់ តាមរយៈការស្រាវជ្រាវរបស់សមត្ថកិច្ចជំនាញ ត្រូវបានរកឃើញថាទីតាំងនេះ 8 Park ជារបស់ក្រុមហ៊ុន ព្រីន គ្រុប។ អ្នកពាក់ព័ន្ធជាម្ចាស់កម្មសិទ្ធិឈ្មោះ អៀង សុខលីម ត្រូវចាប់ដាក់គុក ខណៈអ្នកពាក់ដែលកំពុងគេចខ្លួន សមត្ដកិច្ចកម្ពុជា បានសហការជាមួយសមត្ថកិច្ចអន្តរជាតិ ដើម្បីតាមចាប់ខ្លួនយកមកផ្តន្ទាទោសតាមច្បាប់។ សូមបញ្ជាក់ថា បុគ្គល ចេន ហ្សី ជាម្ចាស់ក្រុមហ៊ុនព្រីន គ្រុប និងឈ្មោះ លី សុង ជាម្ចាស់ក្រុមហ៊ុន ហ៊ុយវន្ត ដែលបុគ្គល២នាក់នេះ ជាមេក្លោងបែងចែកផលប្រយោជន៍ពីបទល្មើស Online Scmas។ - @sopheakfn