****************************** 🎈🎈🎈 ဘဝဆိုတာ ရာသီတွေလိုပဲတဲ့… တစ်ခါတလေ နွေဦးလို နွေးထွေးပြီး တစ်ခါတလေတော့ ဆောင်းဦးလို တိတ်ဆိတ်အေးစက်နေတတ်တယ်။ တချို့လူတွေက ကိုယ့်ဘဝထဲကို ပန်းတွေပွင့်သလို ဝင်လာကြတယ်။ ခဏတာပဲဖြစ်ပေမယ့် သူတို့နဲ့အတူ ရခဲ့တဲ့ အမှတ်တရတွေကတော့ အချိန်တွေဘယ်လောက်ကြာကြာ ရင်ထဲကနေ မကြွေကျသွားခဲ့ဘူး။ တွေ့ဆုံခဲ့ကြတယ်… ချစ်ခဲ့ကြတယ်… ဒါပေမဲ့ အချိန်တွေက မကိုက်ညီခဲ့ဘူး။ လက်ချင်းတွဲနိုင်ခဲ့ပေမယ့် ဘဝလမ်းတွေကတော့ တစ်လမ်းစီ လျှောက်သွားခဲ့ရတယ်။ မပြောဖြစ်ခဲ့တဲ့ စကားတွေရှိတယ်။ မပေးဖြစ်ခဲ့တဲ့ ကတိတွေရှိတယ်။ မလွှတ်ချင်ပေမယ့် လွှတ်ပေးလိုက်ရတဲ့ လက်တစ်စုံလည်း ရှိတယ်။ အဲ့ဒီအရာတွေက ဒီဘဝရဲ့ အဆုံးမသတ်နိုင်တဲ့ ဇာတ်လမ်းတစ်ပုဒ်လို ရင်ထဲမှာ တိတ်တိတ်လေး ကျန်နေခဲ့တယ်။ ဒါပေမယ့်… ဘဝတစ်ခုမှာ မဖြစ်နိုင်ခဲ့တာတွေဟာ သံသရာတစ်ခုလုံးရဲ့ အဆုံးသတ်တော့ မဟုတ်ဘူးလို့ ကျွန်တော် ယုံချင်သေးတယ်။ တစ်နေရာရာမှာ… တစ်ချိန်ချိန်မှာ… တစ်ခါက လွဲချော်ခဲ့ဖူးတဲ့ လမ်းကလေးပေါ်မှာ ပြန်ဆုံကြရင်ကောင်းမယ်။ တစ်ခါက လက်လွှတ်ခဲ့ရတဲ့ လက်ကလေးကို ဒီတစ်ခါတော့ မလွှတ်တော့ဘဲ တင်းတင်းကျပ်ကျပ် ဆုပ်ကိုင်ထားချင်တယ်။ တစ်ခါက နုတ်ခမ်းဖျားထိရောက်ပြီး မပြောဖြစ်ခဲ့တဲ့ “ချစ်တယ်” ဆိုတဲ့ စကားလေးကိုလည်း ဒီတစ်ခါတော့ အချိန်မလွန်ခင် မျက်လုံးချင်းဆုံပြီး ပြောချင်တယ်။ ဒါကြောင့်… ဒီဘဝမှာ မဖြစ်နိုင်ခဲ့တာတွေကို နောင်တတွေအဖြစ် မသယ်ဆောင်တော့ဘဲ အမှတ်တရကောင်းတွေအဖြစ်ပဲ သိမ်းထားကြရအောင်။ ချစ်ခဲ့ကြတာကိုလည်း အပြစ်မတင်ကြရအောင်။ ခွဲခွာခဲ့ရတာကိုလည်း ကံကြမ္မာရဲ့ ဆုံးဖြတ်ချက်တစ်ခုအဖြစ် နားလည်ပေးကြရအောင်။ ပြီးတော့… “သံသရာရဲ့ တစ်ကွေ့ကွေ့မှာ မလွဲမသွေ ပြန်ဆုံကြဦးမယ်…” ဆိုတဲ့ မျှော်လင့်ချက်လေးတစ်ခုကို ရင်ထဲမှာ နွေးနွေးထွေးထွေး သိမ်းထားရင်း… ဒီဘဝမှာတော့ မင်းလည်း ငြိမ်းချမ်းပါစေ။ ကျွန်တော်လည်း ငြိမ်းချမ်းပါရစေ။ တစ်ခါက ချစ်ခဲ့ကြသလိုပဲ တစ်ယောက်ကိုတစ်ယောက် ချစ်ခြင်းတွေနဲ့ နှုတ်ဆက်ပြီး… သံသရာတစ်ကွေ့ကွေ့မှာ ပြန်ဆုံကြမယ်။ မင်းကို(ပန်းတနော်) - @minko5131