လွမ်း လွမ်းတယ်။ ဒီတိုင်းလေးပါပဲ။ ဘာဆက်ပြောရမှန်းလည်း မသိဘူး။ နင်ရော အဆင်ပြေရဲ့လား။ နေကောင်းကျန်းမာရဲ့လား။ တစ်ခါတလေ အဲဒီလောက်လေး မေးချင်ရုံနဲ့ နင့်ကို လွမ်းတယ်။ တိမ်တွေမြင်ရင် လွမ်းတယ်။ ဒါကြောင့်လည်း နင့်ကို လွမ်းမိမှာစိုးလို့ ကောင်းကင်ကို မကြည့်ဖြစ်တာ ကြာလှပြီ။ နွေရာသီရောက်ရင် အတူတူမှာသောက်ခဲ့တဲ့ ကြံရည်ကို လွမ်းတယ်။ မိုးရွာရင် မိုးရေတွေကြားထဲ ငါ့ကို နင် ကုန်းပိုးခဲ့တဲ့နေ့ကို လွမ်းတယ်။ ဆောင်းဝင်လာရင် အငွေ့တထောင်းထောင်းထနေတဲ့ ဟင်းရည်ပူပူ မုန့်ဟင်းခါးတစ်ပွဲရှေ့မှာ နှစ်ယောက်သား အတူထိုင်ခဲ့ဖူးတာကို လွမ်းတယ်။ အခုထိလည်း လူအုပ်ထဲမှာ နင့်အရပ်နဲ့ဆင်တဲ့သူ၊ နင့်ကိုယ်ဟန်နဲ့ တူတဲ့သူတစ်ယောက် ဖြတ်သွားတိုင်း နင်များလားလို့ ငါ လှမ်းကြည့်မိတုန်းပဲ။ မဟုတ်မှန်းသိရင်လည်း ခဏလောက် ဝမ်းနည်းမိတုန်းပဲ။ လွမ်းတယ်။ ဒါပေမယ့် တစ်ချိန်က သိပ်ရင်းနှီးခဲ့တဲ့ နင့်အငွေ့အသက်တွေ၊ နင့်အနံ့တွေကတော့ တဖြည်းဖြည်း မှိန်လာပြီ။ မှတ်ဉာဏ်ဆိုတာလည်း ထူးဆန်းတယ်။ မမေ့ချင်တဲ့အရာတွေကိုမှ တဖြည်းဖြည်း ယူသွားတတ်တယ်။ တစ်နေ့ကျရင် နင့်မျက်နှာကို ငါ သေသေချာချာ ပြန်မမှတ်မိတော့တာမျိုး၊ နင့်အသံ ဘယ်လိုရှိခဲ့လဲဆိုတာ ပြန်စဉ်းစားလို့ မရတော့တာမျိုး၊ နောက်ဆုံးမှာ နင့်နာမည်ကိုတောင် ငါ့ဦးနှောက်က မေ့သွားတာမျိုး ဖြစ်လာနိုင်တယ်။ ဒါပေမယ့်— နင် ဘယ်သူလဲဆိုတာ မေ့သွားရင်တောင် နင်နဲ့ ဘာတွေဖြစ်ခဲ့လဲ မမှတ်မိတော့ရင်တောင်၊ ငါ့နှလုံးသားရဲ့ တစ်နေရာရာမှာတော့ တစ်ခုခု ပျောက်ဆုံးနေသလို ဟာနေဦးမယ် ထင်တယ်။ အဲဒီအခါ ငါက ဘယ်သူ့ကို လွမ်းနေတာလဲ မသိဘူး။ ဘာကို လွမ်းနေတာလဲလည်း မသိဘူး။ သိတာတစ်ခုပဲရှိမယ်— တစ်ယောက်ယောက်ကို အရမ်းချစ်ခဲ့ဖူးသလို၊ တစ်ခုခုကို အရမ်းဆုံးရှုံးခဲ့ဖူးသလို၊ ဘာကိုလွမ်းမှန်း မသိတော့တဲ့အထိ ငါ လွမ်းနေဦးမယ်။ လွမ်း Angel ❤️🌹 - @tarot.by.angel