#koya دوای تۆ، ڕۆژەکان بێ‌هیچ ڕەنگ و جیاوازییەک تەنها وەک ژمارەی سەر ڕۆژژمێرێک تێدەپەڕن، بەبێ ئەوەی باکیان بەوە بێت من لە پشتی دواکاتەکانی ڕۆشتنتدا چەندە بێدەنگ، تەنیام و بێ‌پەنا لەم دنیا گەورەیەدا جێماوم؛ ڕاستییەکەی هێشتا فێر نەبووم چۆن ڕابێم بەم نەبوونە ساردەی کە دروستت کرد، هێشتا ڕاهێنان بە دڵم نەکراوە بۆ ئەوەی ناوت وەک نامۆیەکی ڕێبوار بهێنێت یان بیستنی دەنگ و ناوت نەبێتە هۆی وەستان و هەژاندنی قووڵی لێدانەکانی دڵم، بەڵام بەرەو هەر شوێنێک هەنگاو دەنێم، سەری هەر کۆڵانێک کە دەگرم، وەک ئەوەی سێبەری بیرەوەرییەکانت بەسەر بەرد بە بەردی شۆستەکانەوە مابێت، هەموو سوچێکی ئەم شارە مۆرکی تۆی پێوە دیارە و بێپڕس و وەڵام بە شێوەیەکی ئازاربەخش ڕابردووم بیر دێننەوە. ناڵێم گلەییم لە تۆ یان لە ناهەقییەکانی چەرخ و چارەنووس هەیە، چونکە بڕوا بکە خۆشویستنت تا ئەم ساتەش جوانترین، پڕئازارترین و پاکترین هەڵەی ژیانم بووە؛ هەرچەندە تا بڵێیت بریندارکەرە، بەڵام هەرگیز پەشیمان نینم لەوەی ڕۆژێک تەواوی ڕوح و هەست و باوەڕمم بە تۆ سپارد، بەڵام هەموو شەوێک کە بێدەنگی بەسەر شاردا دابارێت و دەنگی ژاوەژاوی دەرەوە بپچڕێت، دڵم بە قووڵیی بۆ ئەو ڕۆژانە دەنڕێت کە بەبێ هیچ ترسی دوورکەوتنەوەیەک یان دوودڵییەک دەستت لە ناو دەستمدا بوو و سەرم دەخستە سەر شانەکانت و پێم دەوتی: "تۆ هەموو دنیای منی، بەبێ تۆ ژیان وەک چۆڵەوانییەکی وێران و بێ‌مانا وایە". ڕۆشتنی تۆ تەنها ماڵئاوایی کردنی کەسێک نەبوو لە ژیانم، بەڵکو وەک بڕینی بەشێکی گەورە لە ڕوحم وابوو؛ بۆشاییەکی ئەوەندە گەورە و قووڵی لە ناخمدا دروست کرد کە ئەمڕۆ بە هیچ دەنگێک، بە هیچ قسەیەک، بە هیچ هیوایەکی نوێ و بە هیچ ئامادەبوونێکی تر لەم دنیایەدا پڕ ناکرێتەوە. جارهەیە لەگەڵ تەنیایی خۆمدا دەکەومە ئاخڤین و بیر لەوە دەکەمەوە ئایا تۆش لەو بەرهەمەی دووریدا هەست بەم وێرانەیی و چۆڵییە دەکەیت؟ ئایا تۆش لە کاتەکانی بێدەنگی و تاریکیدا بیر لەو بەڵێن و وشەنە بڕاوانە دەکەیتەوە کە بە یەکتریمان دابوو، یان تەنها منم کە لە ناو گێژاوی ڕابردوویەکدا بەجێماوم و تەمەنم لەپێناو بیرەوەرییەکی ڕۆشتوودا دەسووتێنم؟ من لە دوای تۆدا بە ناچاری فێری ئەوە بووم کە چۆن لە ناو ئازارە قووڵەکاندا پێبکەنم و لەبەردەم چاوی خەڵکیدا کەسێکی بێباک و بەهێز دەربکەوم، بەڵام لە ناخدا ڕۆژانە دەیان جار لەپێناو نەبوونتدا دەکەوم و دووبارە بە ڕەنجێکی زۆرەوە هەڵدەستەمەوە. هەموو شەوێک کە چاوەکانم دایدەپۆشم، بیر لە دوا ئاخڤین، دوا خەندە و دوا سەیری چاوەکانت دەکەمەوە، هەوڵ دەدەم ئەو وێنانە لە قووڵایی یادمدا بە زیندویی بپارێزم داخوا سەردەمێک نەێت بیرم بچێتەوە چاوەکانت چۆن بوون و خەندەکانت چۆن ئەم دڵە شەکەتەیان گەرم دەکردەوە. تەمەن تێدەپەڕێت و من هێشتا لەو شوێنەدا وەستاوم کە تۆ دوا هەنگاوت لێی نا؛ جیهان لە دەورم دەسوڕێتەوە، مرۆڤەکان دێن و دەڕۆن، بەڵام هیچ جوانییەک ناتوانێت سەرنجم ڕابکێشێت، چونکە چاوەکانم تەنها فێری ئەوە بوون بەدوای وێنەی تۆدا بگەڕێن. تەنانەت هەست دەکەم بارانیش لە دوای تۆ شێوازێکی تری وەرگرتووە، ئیتر ئەو ئارامییەی جارانی نییە و تەنها برینی دووریت نوێ دەکاتەوە؛ هەموو شتێک لەم دنیایەدا تۆم بیر دێنێتەوە، لە هەڵهاتنی خۆرەوە تا شەوانی درێژی بێخەوی. گاهێک لە خەو ڕادەپەڕم و وادەزانم هێشتا لە پەنامدا جێگا دەگریت، دەستم بۆ بۆشایی ڕەق و ساردی ژوورەکەم دەبەم و جارێکی تر لەگەڵ ڕاستییە تاڵەکەدا ڕووبەڕوو دەبمەوە کە تۆ ئیتر نیت. ئیتر هیچ دەنگێک بەقەد دەنگی بێدەنگیی دوای تۆ گوێچکەکانم کەر ناکات، و هیچ تاریکییەکیش بەقەد نەبوونی خەندەکانت چاوەکانم لێ تەڵخ ناکات؛ تێنەگەیشتم چۆن توانیت ئەو تەواوی خەونانەی بەیەکەوە هەڵمانبەستبوو بە یەک وشە بە با بدەیت و بەبێ ئاوڕدانەوە تێپەڕیت، ئایا ئەوەندە ئاسان بوو بۆت کە ڕابردوویەک بەجێبهێڵیت کە من ژیانمم لەسەر بونیاد نابوو؟ ئەم نامەیە نە بۆ ئەوەیە بەزییت بە مندا بێتەوە و نە بۆ ئەوەشە بەدوای وەڵامێکدا بگەڕێم، تەنها هەڵڕشتنی ڕوحێکی ماندووە کە ئیتر توانای هەڵگرتنی ئەم هەموو بێدەنگییەی نەمابوو؛ ئەگەر ڕۆژێک لە ڕۆژان، لە ڕێکەوتێکی نەزانراودا یان لە شاشەیەکدا ئەم نامەیەت پێگەیشت و خوێندتەوە، تەنها بزانە کە من هیچ ڕق، تووڕەیی یان کینەیەکی شاراوەم لە ناخدا بۆ تۆ هەڵنەگرتووە، من تەنها ئەو عاشقە بریندارەم کە لە ناخی خۆیدا ماڵئاوایی لە تەواوی هەستەکانی کردووە و شوێنی هیچ کەسێکی تر لە دڵیدا نادۆزێتەوە، تا کۆتا هەناسەی ئەم ژیانەم، هەموو شەوێک بێدەنگ بەخێر بێیتەوە بۆ ناو خەیاڵەکانم... چونکە بەداخەوە تەنها لەو خەیاڵانەدا هێشتا هی منی و هیچ چارەنووسێک ناتوانێت لە یەکترمان بپچڕێنێت. 💔 - @cherok67