Жалал-Абад облусунун Сузак районуна караштуу Жыгач-Коргон айылындагы А.Тажибаев атындагы орто мектептин окуучусу Мурат Жоробеков 11-классты бир күн гана окуду. Ал окуу башталган күнү, тактап айтканда 15-сентябрдын түнү айыл четиндеги ээн талаада окуучулар арасындагы орун алган ур-токмоктон ошол жерде өзүнө келбей каза болду. Мурат үй-бүлөдө 6 бир туугандын экинчиси болчу. Маркумдун апасы Жамийла Жусупбекованын айтымында, уулу 15-сентябрда күндүз ага жардамдашып, кечинде дайымкыдай айылдагы спорт залга чыгып кеткен. Ошол бойдон ал уулун түнкү саат 12де Октябрь аймактык ооруканасынан жансыз жаткан абалда көрдү. «Балам спорт залга барат. Спорт залдан чыгып келе жатканда ага теңтуштары тараптан чалуу болуп, ошол айылдагы ээн тарапка барыптыр. Классташ балдарынын 12 баласы тең тизилиптир, үчүнчүдө менин балам туруптур. Коргоно албай калганбы же талуу жерине тийип калганбы, ошол жерде эле кете бериптир. 3-4 күн мурун эле уулумдан "балдар салык салбайбы?" деп сурагам. Балам "апа, каяктагыны айта бересиз да" деп койгон. 11-сентябрда айылда балдар мушташып, участкалык милиция кызматкерин чакырышкан экен. Ошондо катуу чара көрүлсө, менин балам өлбөй калат беле деп ойлойт экенсиң. Баламдын классташтарына "Эмне карап турдуңар эле? 2 эле бала экен, силер 12 бала болсоңор" десем, "ал менен мушташа албайбыз" дешти. Баары үндөбөй тизилип туруп беришкен. Балам шок болсо да өзүңө күнөө аласың. Боорукер, тартиптүү болуп чоноюп келе жаткан. Башта күрөшкө барып жүргөн, анан волейболго эле өткөрүп койгонбуз. Балдардан угушума караганда, 11-класстан сырткары 10-9-класстын да балдары болгон. 9-класстагы балдарды уулум "алар кичине" десе, "бооруң ачып жатабы?" деген экен. Баарын толук териштиришсин. Мен өсүп келе жаткан баламдан айрылдым», - деди ал. Мураттын атасы Шекербек Баргыбаев уулунун өмүрүн соолуткандар мыйзам чегинде жазасын алуусун талап кылат. «15-сентябрь түнкү 12лер чамасы болчу, мага "балаңар милицияга түшүп калды" деген чалуу болду. Кошунабыздын унаасын айдатып, дароо ооруканага бардык. Барсак баламдын жаагы таңылып калыптыр. Урганда өзөрүп олтуруп калганда артынан тээп жиберишкен го, кабырга тарабы көгөрүп калган. Жаш балдар жасалма дем алдырганды билишпейт. Бири 11-классты, экинчиси 9-10-класстын балдарын урганы айтылып жатат. Балдар окуяны толук айтпай эле баштарын жерге салып туруп берип жатышат. Урган бала бизден 3-4 үй аркы тарапта эле турат, балам аны катуу урат деп ойлобосо керек. Эми мыйзам алдында катуу жазасын алсын», - деди ал. #сузак - @turmush.kg_