@sportsslmania: ලෝක පාපන්දු පිටියේ අසහාය ක්‍රීඩකයෙකු වන ලයනල් මෙසී (Lionel Messi) නැවත වතාවක් තමන්ගේ නිහතමානීකම සහ මනුෂ්‍යත්වය මුළු ලෝකයටම පෙන්නුම් කර තිබෙනවා. ප්‍රංශයේ RMC මාධ්‍ය වාර්තා කරන ආකාරයට, ‘ලියෝ මෙසී පදනම’ (Leo Messi Foundation) හරහා බාර්සිලෝනා නුවර ඉදිකරන ලද විශේෂිත ළමා පිළිකා රෝහල (SJD Pediatric Cancer Center) වෙනුවෙන් යුරෝ මිලියන 2.6ක දැවැන්ත පරිත්‍යාගයක් සිදු කිරීමට මෙසී කටයුතු කර තිබෙනවා. මෙම SJD ළමා පිළිකා මධ්‍යස්ථානය කියන්නේ සමස්තයක් ලෙස යුරෝ මිලියන 30ක පමණ විශාල ආයෝජනයකින් ඉදිවූ අතිනවීන වෛද්‍ය පහසුකම් සහිත ව්‍යාපෘතියක්. වර්ග මීටර් 5,137ක භූමි භාගයක පැතිරී තියෙන මේ රෝහල මගින් වසරකට පිළිකා රෝගයෙන් පෙළෙන කුඩා දරුවන් 400 දෙනෙකුට පමණ එකම වහලක් යටදී අවශ්‍ය සියලුම විශේෂිත ප්‍රතිකාර ලබාදීමට හැකියාව ලැබෙනවා. බැලන් ඩි ඕර් සම්මාන 8ක් දිනාගත් මෙසී ඇතුළු තවත් පරිත්‍යාගශීලීන් සහ ආයතන ගණනාවකගේ එකතුවෙන් තමයි මේ වටිනා ව්‍යාපෘතිය සැබෑවක් බවට පත්වුණේ. තමන්ට වයස අවුරුදු 20දී පාපන්දු දිවියේ මුල් කාලයේදීම මේ පදනම ආරම්භ කළ මෙසී, යුනිසෙෆ් (UNICEF) සංවිධානයේ තානාපතිවරයෙකු විදිහටත් දීර්ඝ කාලයක් තිස්සේ අසරණ දරුවන්ගේ අයිතිවාසිකම් සහ සෞඛ්‍යය වෙනුවෙන් පෙනී සිටිනවා. තමන් උපයන ධනය සෞඛ්‍යය, අධ්‍යාපනය සහ ක්‍රීඩාව වැනි සමාජීය ක්ෂේත්‍ර වෙනුවෙන් නැවත ආයෝජනය කරන්න මෙසී කිසිම වෙලාවක පැකිලෙන්නේ නැහැ. කුඩා දරුවන්ගේ ලියුකේමියා රෝගය පිළිබඳ පර්යේෂණ සඳහා මුදල් වෙන්කිරීම, තමන්ගේ උපන්ගම වන ආර්ජන්ටිනාවේ රොසාරියෝ හි රෝහල්වලට අතිනවීන වෛද්‍ය උපකරණ පරිත්‍යාග කිරීම මෙන්ම අප්‍රිකානු රටක් වන මොසැම්බික්හි මන්දපෝෂණය පිටුදැකීමේ වැඩසටහන් ක්‍රියාත්මක කිරීම මෙසීගේ පදනම මගින් සිදුකරන ප්‍රධානම සේවාවන් අතරට අයත් වෙනවා. ඊට අමතරව, තරුණ පරම්පරාව යහපත් මගට යොමුකිරීම වෙනුවෙන් ක්‍රීඩාව උපයෝගී කරගන්නත් මෙසී කටයුතු කරනවා. ආර්ජන්ටිනාවේ පාසල් සහ ප්‍රජාවන් වෙනුවෙන් නව ක්‍රීඩාංගණ ඉදිකිරීම, ක්‍රීඩා භාණ්ඩ පරිත්‍යාග කිරීම සහ ළමුන්ගේ නිරෝගීභාවය උදෙසා විවිධ ක්‍රීඩා තරගාවලි සංවිධානය කිරීමත් ඔහුගේ පදනම මගින් අඛණ්ඩව සිදුකරනු ලබනවා. ජාත්‍යන්තර පාපන්දු පිටියෙන් සමුගැනීමට ආසන්නව සිටියත්, මෙසී තමන්ගේ මුදල් සහ ජනප්‍රියත්වය ලෝකයේ අසරණ වූ දරුවන් වෙනුවෙන් යොදවන ආකාරය ඇත්තටම ගොඩක් ආදර්ශමත්. පාපන්දු ක්‍රීඩකයෙකු ලෙස ලබාගත් ජයග්‍රහණවලට වඩා, මේ වගේ පුංචි දරුවන්ගේ ජීවිත බේරාගන්න කරන කැපකිරීම් නිසා ලයනල් මෙසී කියන නම ඉතිහාසයේ සදාකාලිකවම රැඳී තියේවි. #LionelMessi #LeoMessiFoundation #Barcelona #ChildhoodCancer

Sports SL Mania

Open In TikTok:

Region: LK

Tuesday 22 September 2026 06:04:37 GMT