چیئرپرسن بینظیر انکم سپورٹ پروگرام سینیٹر روبینہ خالد نے فیس بک لائیو ای-کچہری میں خواتین بینیفشریز کو ہدایت کی کہ بینک کی جانب سے رقم موصول ہونے اور رقم نکلوانے سے متعلق موصول ہونے والے دونوں SMS محفوظ رکھیں اور کسی بھی صورت اپنا موبائل فون کسی دوسرے شخص، ریٹیلر یا غیر مجاز فرد کے حوالے نہ کریں۔ انہوں نے کہا کہ خواتین بینیفشریز صرف اپنا اصل شناختی کارڈ اور رجسٹرڈ موبائل نمبر ساتھ لے کر جائیں اور اپنے موبائل فون کی حفاظت خود کریں۔ کسی دوسرے شخص کی جانب سے موبائل فون لے کر SMS ڈیلیٹ کرنا یا ذاتی معلومات تک رسائی حاصل کرنا مالی نقصان کا باعث بن سکتا ہے۔ سینیٹر روبینہ خالد نے کہا کہ بینظیر ڈیجیٹل والٹ خواتین بینیفشریز کے لیے ان کا اپنا بٹوا ہے، جس طرح خواتین اپنا پرس یا بٹوا کسی دوسرے کے حوالے نہیں کرتیں، اسی طرح ڈیجیٹل والٹ سے منسلک موبائل فون بھی کسی کے حوالے نہ کیا جائے۔ انہوں نے خواتین بینیفشریز کو آگاہ کیا کہ کسی بھی شکایت یا مسئلے کی صورت میں متعلقہ شکایتی نمبرز پر رابطہ کرنے کے ساتھ ساتھ اپنے قریبی بینظیر انکم سپورٹ پروگرام دفتر سے بھی رجوع کیا جا سکتا ہے۔ چیئرپرسن BISP نے کہا کہ ڈیجیٹل والٹ کے ذریعے ادائیگیوں تک رسائی خواتین بینیفشریز کے لیے ایک اہم سہولت ہے، جس کے تحت وہ اپنی سہولت کے مطابق مختلف مقامات اور دنوں میں اپنی رقم وصول کر سکیں گی۔ انہوں نے خواتین سے اپیل کی کہ کسی بھی مشکل یا مسئلے کی صورت میں خاموش نہ رہیں بلکہ BISP کو آگاہ کریں تاکہ بروقت ازالہ کیا جا سکے۔ #BISP #SenatorRubinaKhalid #BenazirSIM #DigitalWallet #DigitalInclusion - @rubinakhalidofficial