‹‹ቅዱስ ሩፋኤል›› ''ሩፋኤል” ማለት “እግዚአብሔር ይፈውሳል” ወይም “የእግዚአብሔር ፈውስ” ማለት ነው። “ከከበሩ ከሰባቱ አለቆች አንዱ አለቃ እኔ ሩፋኤል ነኝ” (ጦቢት ፲፪፥፲፭) ቅዱስ ሩፋኤል ስሙ እንደሚመሰክረው “ደስ የሚያሰኝ፣ ቸርና መሐሪ” መልአክ ሲሆን፣ ከልዑል እግዚአብሔር በተሰጠው ሥልጣን ለሰው ልጆች ድኅነትና ሰላም የሚተጋ የቅዱሳን ጸሎት አሳራጊ ነው። ቅዱስ ሩፋኤል በሰው ልጆች ቍስልና በሽታ ላይ የተሾመ መልአክ ነው። ነቢዩ ሄኖክ በመጽሐፉ እንደመሰከረው፣ መልአኩ ከእግዚአብሔር ዘንድ በተሰጠው መለኮታዊ ጸጋ በሰውነታችን ላይ የሚወጣውን ደዌና ቍስል ይፈውሳል። የሰው ልጅ ከተያዘበት የኃጢአት ቍስል ይፈወስ ዘንድ በአማላጅነቱና በጸሎቱ የማይለይ የሰላምና የጤና መልአክ ነው። ቅዱስ ሩፋኤል እናቶች ከፀነሱበት ወቅት ጀምሮ እስከ መውለጃቸው ቀን ድረስ በጥበቃው አይለያቸውም። ሕፃኑ በማኅፀን ተሥዕሎተ መልክዕ (በሥላሴ አርአያ መሳል) ከጀመረበት ጊዜ አንሥቶ እስከሚወለድበት ዕለት ድረስ በመጠበቅ፣ በመውለጃቸውም ቀን ጭንቀታቸውን የሚያቀልላቸው "ፈታሔ ማኅፀን" ነው። መካኖችንም በጸሎቱ የሚጎበኝና የወላድን ማኅፀን በመፍታት የተባረከ ፍሬ የሚሰጥ ርኅሩኅ መልአክ ነው። የመጽሐፈ ጦቢት ታሪክ እንደሚነግረን፣ አስማንድዮስ የተባለ ጋኔን በወለተ ራጉኤል (ሣራ) ላይ አድሮ ባሎቿን እየገደለ ሲያሰቃያት፣ ቅዱስ ሩፋኤል ጋኔኑን አስጨንቆ በማስወጣት ሰላሟን መልሶላታል። እንዲሁም አዛዝኤል የተባለውን ጋኔን በእሳት ሰይፍ ቀጥቶ ወደ ጥልቁ የጣለው ይኸው ኃያል መልአክ ነው። ዛሬም በትዳርና በሰው ሕይወት ላይ የሚመጡ ክፉ መናፍስትን በምልጃው ያሳድዳል። ቅዱስ ሩፋኤል የጦቢትን ልጅ ጦቢያን በሰው አምሳል ተገልጦ በመንገድ መርቶታል (መራኄ ፍኖት)። በጤግሮስ ወንዝ ሊውጠው ከመጣው ዓሣ የታደገውና የዓሣውን ሐሞትና ጉበት መድኃኒት እንዲሆነው ያስተማረው እርሱ ነው። በመንገዱም ሁሉ ጠብቆት ለተፈለገው ዓላማ እንዲበቃ አድርጎታል። እንዲሁም በመጽሐፈ ስንክሳር እንደተጠቀሰው፣ ዓሣ አንበሪው በእስክንድርያ የታነጸችውን ቤተ ክርስቲያን እንዳያፈርስ በበትረ መስቀሉ ገሥጾ ያዳነ ታላቅ መልአክ ነው። የቅዱስ ሩፋኤል ረድኤትና በረከቱ አማላጅነቱ ይደርብን ።🙏 - @sarwitegetagiram