Семейде 19 жастағы студент қыздың қаза болуына байланысты қылмыстық іс қозғалып, 24 жастағы жергілікті тұрғын күдікпен ұсталды. Әлеуметтік желіде марқұмның жақындары оның жігітке қарсылық білдіргеннен кейін қаза тапқанын айтып, істің толық әрі әділ тергелуін талап етуде, деп жазады Democrat.kz. Қайғылы оқиға Семей қаласындағы Водный кентінде болған. Алдын ала мәлімет бойынша, бойжеткен мен өзінің танысы арасында жанжал туып, қыз бірнеше жерінен пышақ жарақатын алған. Куәгерлер оған жедел жәрдем келгенше көмек көрсетуге тырысқан. Абай облысының полициясы 21 қыркүйекте адам өлтіру дерегі бойынша қылмыстық іс қозғалғанын хабарлады. Күдікті ізін суытпай ұсталған. Ол — 24 жастағы жергілікті тұрғын. Қазір уақытша ұстау изоляторына қамалған. Полицияның мәліметінше, күдікті мен қаза болған қыз бір-бірін бұрыннан таныған. Алайда әлеуметтік желіде тараған жазбада марқұмның жақыны оқиғаның топтық сипатта болғанын айтып, бірнеше адамның әрекетін тексеруді талап еткен. «Бұл жай ғана адам өлтіру емес, топ болып жасалған, алдын ала ойластырылған қылмыс болды. Біз үнсіз қалғымыз келмейді. Болған жағдай толық анықталып, кінәлілер жауапқа тартылсын», – делінген жазбада. Кейін жазба авторы бірнеше адамның оқиғаға қатысы болуы мүмкін деген сөзін нақтылап, «бірнеше адам өзара әрекет еткен, бәрі анықталған соң толық жазамын» деп түсіндірген. Бұл нұсқа әзірге ресми түрде расталған жоқ. Полиция жариялаған ақпаратта бір ғана күдіктінің ұсталғаны көрсетілген және тергеу жалғасып жатқаны айтылған. Қайғылы оқиға әлеуметтік желіде үлкен резонанс тудырып, қолданушылар әйелдерге қатысты зорлық-зомбылық мәселесін қайта көтерді. Кейбірі «қыздың “жоқ” деген жауабы оның өміріне қауіп төндірмеуі тиіс» деп жазып, істі қоғам назарында ұстауға шақырған. Қазіргі уақытта болған оқиғаның барлық мән-жайын тергеу анықтайды. - @democrat.kz2