@mimij9865: ခွေးတစ်ကောင် ရေသောက်နေတာကို လူတစ်ယောက်က တွေ့တယ်။ ခွေးက ရေကို လျှာနဲ့ လျက် သောက်နေတော့ လူက မနေနိုင်ပဲ “အဲ့လို လျှာနဲ့လျက် သောက်တော့ ကြာတာပေါ့။ တို့လို ခွက်နဲ့သောက်ပါလား” လို့ ပြောလိုက်တယ်။ ခွေးက ရေသောက်နေတာ ရပ်ပြီး လူကို မော့ကြည့်တယ်။ ပြီးတော့ “ခင်ဗျားတို့ ပြေးရင် ခြေနှစ်ဖက်တည်းနဲ့ဆိုတော့ ကြာတာပေါ့။ ကျုပ်တို့လို လက်ကောထောက်ပြီး လေးချောင်းပြေးပါလား။ ပိုမြန်တာပေါ့” လို့ ပြန်ပြောလိုက်သတဲ့။ ဖတ်ဖူးတဲ့ ပုံပြင်လေးပါ ။ လူတွေရဲ့ဘဝမှာလည်း ဒီလိုပါပဲ။ တစ်ယောက်ရဲ့ လမ်းလျှောက်ပုံကိုကြည့်ပြီး ကိုယ့်လမ်းလျှောက်ပုံနဲ့ တိုင်းတာလို့မရသလို၊ တစ်ယောက်ရဲ့ အောင်မြင်မှုကိုကြည့်ပြီး ကိုယ့်ဘဝနဲ့ တိုင်းတာလို့လည်း မရပါဘူး။ တစ်ချို့လူတွေက စောစောအောင်မြင်တယ်။ တစ်ချို့က နောက်ကျမှ အောင်မြင်တယ်။ တစ်ချို့က လူများကြားမှာ နေပြီး ပျော်တယ်။ တစ်ချို့က တိတ်တိတ်ဆိတ်ဆိတ်နဲ့ပဲ ကိုယ့်ဘဝကို ကိုယ် တည်ဆောက်တယ်။ ဘယ်သူ့ဘဝကမှ တစ်ပုံစံတည်း ဖြစ်မှာ မဟုတ်ပါဘူး။ ကိုယ်နဲ့ အဆင်ပြေတဲ့နည်းလမ်းတစ်ခုဟာ သူများအတွက် အဆင်ပြေချင်မှ ပြေပါလိမ့်မယ်။ လူတစ်ယောက်ချင်းစီမှာ ကိုယ့်အတွေ့အကြုံ၊ ကိုယ့်ဒဏ်ရာ၊ ကိုယ့်အိပ်မက်၊ ကိုယ့်ခံနိုင်ရည်နဲ့ ကိုယ့်လမ်းကိုယ် ရှိပါတယ်။ သူများဘဝကို ကိုယ့်ပေတံနဲ့ တိုင်းတာမနေသင့်ပါဘူး။ ကိုယ့်ဘဝကိုလည်း သူများပေတံနဲ့ လာတိုင်းတာကို ခံစားမနေသင့်ပါဘူး ။ အားလုံးဟာ သူ့အထွာနဲ့သူ၊ သူ့အပူနဲ့သူပါပဲ။ ကိုယ်က ကိုယ့်လမ်းကိုယ် လျှောက်ပါ။ သူများကိုလည်း သူ့လမ်းသူ လျှောက်ခွင့်ပေးပါ။ လောကကြီးက ပိုပြီးအေးချမ်းလာဖို့ဆိုတာ လူတိုင်းကို ကိုယ့်လိုဖြစ်အောင် ပြောင်းလဲဖို့ထက် မတူညီတာတွေကို နားလည်ပေးနိုင်ဖို့က ပိုအရေးကြီးပါတယ်။ #ရိပ်ငြိမ်