After School အဖွဲ့ဝင်ဟောင်း၊ မင်းသမီး Nana (နာနာ၊ အသက် ၃၅ နှစ်၊ အမည်ရင်း Im Jin-ah) ဟာ သူမရဲ့ ဇာတ်လမ်းတွဲအသစ် Netflix Original Series ‘Scandal’ ထွက်ရှိပြီးနောက် ရရှိနေတဲ့ အပြင်းအထန်ဝေဖန်မှုတွေကို တိုက်ရိုက်တုံ့ပြန်ခဲ့တာကြောင့် လူစိတ်ဝင်စားမှု ရရှိနေပါတယ်။ Nana ဟာ စက်တင်ဘာ ၂၂ ရက်နေ့မှာ အခပေးပရိသတ်ဆက်သွယ်ရေး platform ဖြစ်တဲ့ Bubble ကနေ စက်တင်ဘာ ၁၈ ရက်နေ့မှာ စတင်ထုတ်လွှင့်ခဲ့တဲ့ ‘Scandal’ နဲ့ပတ်သက်တဲ့ ပရိသတ်တွေရဲ့ တုံ့ပြန်မှုအပေါ် သူမရဲ့အမြင်ကို ပွင့်ပွင့်လင်းလင်း ပြောပြခဲ့ပါတယ်။ ‘Scandal’ ဟာ ၂၀၀၃ ခုနှစ်က ထွက်ရှိခဲ့တဲ့ ‘Untold Scandal (스캔들-조선남녀상열지사)’ ရုပ်ရှင်ကို ပြန်လည်ဖန်တီးထားတဲ့ ဇာတ်လမ်းတွဲဖြစ်တာကြောင့် မထွက်ရှိခင်ကတည်းက စိတ်ဝင်စားမှုများစွာ ရရှိခဲ့ပါတယ်။ ဒါပေမဲ့ ထွက်ရှိလာပြီးနောက်မှာတော့ ကြိုက်နှစ်သက်သူနဲ့ မကြိုက်နှစ်သက်သူတွေကြား သဘောထားကွဲလွဲမှုတွေ အတော်လေးများပြားခဲ့ပြီး ဝေဖန်မှုတွေလည်း ဆက်တိုက်ထွက်ပေါ်လာခဲ့ပါတယ်။ တချို့အင်တာနက်အသုံးပြုသူတွေက Nana ရဲ့ သရုပ်ဆောင်မှုထက် သူမရဲ့ နှုတ်ခမ်းပုံစံကိုပဲ အာရုံရောက်နေမိတယ် ဆိုပြီး ရုပ်ရည်ပိုင်းဆိုင်ရာအထိ ဝေဖန်ခဲ့ကြပါတယ်။ ဒီလိုဝေဖန်မှုတွေနဲ့ ပတ်သက်ပြီး Nana က— “ကျွန်မရဲ့နှုတ်ခမ်းကြောင့် ကြည့်ရှုသူတွေ မသက်မသာဖြစ်ခဲ့ရင် ဒါက ကျွန်မရဲ့အမှားပါ။ ကျွန်မရဲ့ ကိုယ်ပိုင်ရွေးချယ်မှုဟာ သရုပ်ဆောင်တစ်ယောက်အနေနဲ့ဆိုရင် မသင့်တော်တဲ့ရွေးချယ်မှုတစ်ခု ဖြစ်ခဲ့တယ်လို့ ထင်ပါတယ်” လို့ ပြောခဲ့ပါတယ်။ ဒါ့အပြင် သူမကိုချစ်ခင်အားပေးနေတဲ့ ပရိသတ်တွေအတွက်လည်း— “ကျွန်မကိုချစ်တဲ့ ပရိသတ်တွေက ကျွန်မအပေါ် ဝေဖန်ထားတာတွေကို မြင်ရရင် စိတ်မကောင်းဖြစ်ကြမယ်လို့ ထင်ပါတယ်။ အဲဒါကြောင့် ပိုပြီးတော့တောင် တောင်းပန်ချင်ပါတယ်။ နောက်ပိုင်းမှာတော့ ကောင်းတဲ့စကားတွေကို အတူတူကြားနိုင်အောင် ကျွန်မ ကြိုးစားသွားပါမယ်” လို့ ပြောကြားခဲ့ပါတယ်။ Nana ဟာ ‘Scandal’ မှာ Hee-yeon (희연) ဆိုတဲ့ ဇာတ်ကောင်အဖြစ် ပါဝင်သရုပ်ဆောင်ထားပါတယ်။ Hee-yeon ဟာ လက်ထပ်ပွဲမကျင်းပရသေးခင်မှာပဲ ခင်ပွန်းဖြစ်သူကို ဆုံးရှုံးလိုက်ရတဲ့ မုဆိုးမငယ်တစ်ဦးဖြစ်ပြီး အမျိုးသမီးတွေရဲ့ သစ္စာစောင့်သိမှုနဲ့ ကိုယ်ကျင့်တရားကို အလွန်တင်းကျပ်စွာ တောင်းဆိုခဲ့တဲ့ ခေတ်ကာလအတွင်း ကိုယ့်ဘဝကိုယ် လွတ်လပ်စွာရွေးချယ်ခွင့်မရှိဘဲ အရာအားလုံးကို လက်လျှော့ကာ နေ့ရက်တွေကို ဖြတ်သန်းနေရတဲ့ ဇာတ်ကောင်ဖြစ်ပါတယ်။ - @aungfonemyat