في حاجات كتيرة اتغيّرت فيني من غير ما أحس… اتغيّرت من جواي، حبة حبة، من غير ما يكون في يوم محدد أقدر أقول فيه: «من هنا أنا بقيت شخص تاني». يمكن الأيام هي العملت فيني كدا، ويمكن المواقف الكتيرة البعدتني عن حاجات كنت متعلقة بيها، ويمكن التجارب علمتني إنو الإنسان مرات بيتغيّر عشان يقدر يكمل. بقيت ما بتكلم عن كل الحاصل جواي زي زمان، وبقيت أختار السكوت في مواقف كنت ممكن أتكلم فيها كتير. بقيت ما بشرح نفسي لكل زول، وما بفتش إنو كل الناس تفهمني أو تعرف أنا حاسة بشنو. بقيت أعرف إنو في حاجات مهما شرحتها، ما حتتفهَم إلا من الزول العاشها معاك. في حاجات كانت بتفرحني شديد وبقت عادية، وناس كنت متخيلة إنهم حيكونوا جزء من حياتي للأبد، لكن الزمن وراني إنو ما كل الناس بنمشي معاهم لنهاية الطريق. وبقيت أتعلم إنو البُعد مرات ما بيكون كُره، وإنو السكوت مرات ما بيكون ضعف، وإنو عدم السؤال ما معناتو عدم الاهتمام… مرات بس بنكون تعبنا من المحاولة. حتى أنا ذاتي ما بقيت نفس البنت الكانت بتدي كل حاجة من قلبها بدون ما تفكر في نفسها. بقيت أعرف حدودي، وأعرف متين أتمسك ومتين أسيب، ومتين أتكلم ومتين أسكت. بقيت أقدّر راحتي أكتر، وأفهم إنو راحة البال ما حاجة بسيطة عشان أتنازل عنها عشان أي زول. والغريب إنو كل التغييرات دي حصلت من غير ما أحس… لحدي ما وقفت مع نفسي يوم، واكتشفت إني بقيت شخص مختلف. ما بالضرورة شخص أحسن في كل حاجة، لكن شخص فاهم الحياة أكتر، وعارف إنو بعض الدروس ما بتتعلم بالكلام، بتتعلم بالمواقف، بالخذلان، بالصبر، وبالأيام الصعبة. يمكن أنا ما لاحظت متين كبرت، ولا متين بقيت أقوى، ولا متين اتعلمت أخبي تعبي وابتسم عادي. لكني عارفة إنو النسخة القديمة مني كانت محتاجة كل التجارب دي عشان توصل للنسخة الحالية. وأكتر حاجة فهمتها إنو التغيير ما دايمًا بيكون حاجة سيئة… مرات التغيير بيكون نجاة. مرات الحياة بتشيل منك حاجات وأشخاص وأفكار كنت فاكرة إنك ما بتقدري تعيشي من غيرهم، عشان تعلمك إنك أقوى مما كنتِ متخيلة. أنا اتغيّرت… يمكن من غير ما أقصد، ويمكن من غير ما ألاحظ، لكني ما بلوم نفسي على التغيير. لأن كل حاجة حصلت لي، وكل موقف وجعني، وكل مرة اضطرّيت أكون قوية وأنا من جواي تعبانة، ساهمت في إنّي أبقى أنا البنت البتشوفوها اليوم. ❤️ - @ola817450