#koya سڵاو... لەوانەیە سەیر بێت بۆت کە ئەم نامەیە دەبینیت، یان بپرسیت بۆچی دوای ئەم هەموو بێدەنگی و دابڕانە قووڵە هێشتا دەنگم دەگاتەوە لێت، بەڵام ویستم بۆ یەکجار و بۆ هەتاهەتایە هەموو ئەو شتانەت پێ بڵێم کە لە سینەمدا قورس بوون، بڕست و ئارامییان لێ بڕیوم و ڕۆژانە وەک بەردێک لەسەر دڵم دانراون. زۆر باش دەزانم و هەستی پێ دەکەم کە هیچ شتێک بە تەواوی کۆتایی نەهاتووە لە ناختدا، زۆر باشیش دەزانم کە تۆش هێشتا لە دوورەوە چاودێریم دەکەیت، بە دزییەوە لە پشت پەردەی بێدەنگییەوە هەواڵم دەپرسیت، سەیرێکی دنیای من دەکەیتەوە و بەدوای وشەکانم، وێنەکانم و شوێنپێیەکانمدا دەگەڕێیت تا بزانیت دوای تۆ چۆنم، چی دەکەم، ئایا دڵخۆشم یان ڕۆژگار چۆن بەسەرمدا تێپەڕێت. بەڵام دڵنیا بڕوانە کە ئەم سەیرکردنە بێدەنگەی تۆ و ئەم چاودێرییە سەردەستەی لە دوورەوە، نە برینەکانی ڕابردوو ساڕێژ دەکات، نە ئازاری ئەو هەموو شەوە بێخەوییە لەبیر دەباتەوە، نە ئەو هەستە دەشۆرێتەوە کە جێت هێشتم، نە ڕێگاکانی نێوانمان کورت دەکاتەوە و نە هیچ شتێک لە شکاوییەکانی نێوانمان چاک دەکاتەوە. ئەمەی تۆ دەیەکەیت تەنیا وەک سێبەرێکی تاریک، ماندووکەر و سارد بەسەر ژیانمەوە دەمێنێتەوە و ڕۆژانە برینە کۆنەکان ڕادەتڵەکێنێتەوە، چونکە هەر جارێک کە هەست دەکەم چاوت لەسەر ژیانمە یان زانیارییەکت لەسەرم پێ دەگات، وەک ئەوە وایە بگەڕێمەوە بۆ یەکەم ڕۆژی ڕۆشتنت و هەمان ئازار سەرلەنوێ بچێژمەوە. ئەگەر بەڕاستی بڕیارت داوە بڕۆیت و ڕێگەی خۆت لە من جیا کردۆتەوە، ئەوا بە تەواوی بڕۆ و بۆ یەکجار دڵت بکە بە ئاو، مەهێڵە نیوەی دڵ و هەنگاوەکانت لەلای من بمێنێتەوە و نیوەکەی تری لە ڕێگەیەکی تردا بێت، چونکە ئەم یارییە نیوەچڵە، ئەم دوودڵییە و ئەم بێدەنگییە ناڕوونە تەنیا ئازارەکان قووڵتر دەکاتەوە، تەمەنی خەمەکان درێژتر دەکات و ڕێگە نادات هیچکاممان ڕەنگی ئارامی ببينین. تەماشاکردنی ژیانم لە دوورەوە، نە تۆ دەگەڕێنێتەوە بۆ ناو باوەشی ڕاستییەکان و ئەوەی شکاوە دروستی دەکاتەوە، و نە ڕێگەش دەدات من هەنگاوێک بەرەو پێشەوە بنێم، برینەکانم بپێچەمەوە و دڵم تۆزێک ئارام بگرێت. ڕۆشتن پێویستی بە ئازایەتی هەیە، کە بڕیارت دا جێم بێڵیت و هەموو شتێک بەجێ بهێڵیت، ئازایەتی ئەوەش لە خۆتدا کۆبکەرەوە کە بە تەواوی ڕێگەی پەیوەندییەکان بپچڕێیت، چاوەکانت لەسەرم لادەیت و وازم لێ بێنیت. نیوە ڕۆشتن و نیوە مانەوە گەورەترین زوڵمە کە لە خۆت و لە منیشی دەکەیت؛ نە ڕێگە دەدەیت ڕابردوو بمرێت و نە دەهێڵیت داھاتوو لەدایک ببێت. بڕیارێک کە بە ویستی خۆت داتداوە بۆ ڕۆشتن، بە کرداریش جێبەجێی بکە و ئیتر بە تەواوی بەجێم بێڵە، وازم لێ بێنە تا منیش فێری ئەوە ببم بەبێ تۆ هەنگاو بنێم، لەگەڵ بێدەنگی و تەنهایی خۆمدا ڕابێم، برینەکانم بەبێ تۆ تیمار بگرم و ژیان بەبێ ئامادەیی تۆ ببەمە سەر، بەبێ ئەوەی هەست بە سیخوڕیی سۆز، چاوەکانی تۆ لە دوورەوە، و سێبەری قورسی ڕابردوو بکەم لە دواوەم. بە تەواوی بڕۆ، دڵت ڕەق بکە یان بیکە بە ئاو، ڕێگەکان بەڕووی خۆت و مندا بپۆشە، چاوەکانت لەسەر ژیانم لادە و ئیتر بە هیچ شێوازێک لە دەوروبەری دنیای مندا مەخولێوە، بهێڵە بە ئارامی لە بیرت بکەم و لە ناخمدا بتپوکێنمەوە، وەک چۆن تۆ بڕیارت دا بە بێڕەحمی بەجێم بێڵیت و سەرەتای ئەم ئازارە بێت. ماڵئاوا بۆ هەتا هەتایە. 🙇🏻💔 - @cherok67