@balitaphl: Ayon kay Presidential Communications Office (PCO) Undersecretary at Palace Press Officer Atty. Claire Castro, marami nang nagawa ang administrasyon ni Pangulong Ferdinand “Bongbong” Marcos, Jr. sa nagdaang apat na taon ng termino nito. Ngunit paglilinaw niya, sa kabila ng mga ito, marami pa rin daw ang dapat na ayusin. “So, kung ikukumpara natin…2022, today 2026. So, nakita po natin kung ano na po ang nagawa ng Pangulo. Maraming nagawa, pero marami pa ring dapat ayusin,” saad ni Usec. Castro sa press briefing ng PCO nitong Biyernes, Setyembre 25, sa Batac City, Ilocos Norte. Aniya, “Unang-una po, maipagmamalaki ng Pangulo ay narating na po natin ang upper middle-income status na matagal na po nating minimithi. Pero dahil sa pagsusumikap ng Pangulo, ng gobyerno, ay naabot natin ang upper middle-income status. Hindi naman po nangangahulugan na lahat ng buhay ng bawat Pilipino ay uunlad na dahil narating na natin itong estado na ‘to.” “Ang ibig lamang pong sabihin nito ay umaangat tayo—at ito ay panguna lamang para mas lalo nating pagbutihan ang ating pagganap sa ating tungkulin, at pati na rin po ang mga nasa business sector ay para mas pagbutihan pa ang ating pangangalakal, ang trade,” paliwanag pa niya. Inisa-isa pa ng press officer ang aniya’y mga nagawa ng administasyon ni PBBM sa nagdaang higit apat na taon ng termino nito. “Nagkaroon na rin po tayo, February 2025, tayo ay natanggal na po sa Financial Action Task Force Grey Area—na matagal din pong hindi nakakamtan ng Pilipinas. Ilan lamang po ‘yan sa pagbabago. At bago matapos ang termino, sa huling araw ng termino ng ating Pangulo, alam natin kung ano ang nagawa. Uunahin na po natin, nagkaroon po ng modernization sa sektor ng agrikultura. Nakita po natin kung paano ipaglaban ng Pangulo ang karapatan ng mga magsasaka at mangingisda. Kahit po ngayon na may krisis sa Middle East, sinisiguro niya po na dapat tuloy-tuloy ang suplay ng fertilizer,” anang press officer. Paglalahad niya, “Nandiyan din po ang mas maayos at mas abot-kamay na pabahay. Nandiyan din po ang healthcare system na ngayon ay marami nang nakakaramdam ng Zero Balance Billing, at ang paglaki ng package na ibinibigay po ng PhilHealth. Nandiyan din po ang pagpapalawak, pagpapaganda ng transport system. Kamakailan lamang ay nabalita natin ang pagsisimula ng pagbuo ng subway sa ating bansa. Nandiyan din po ang modernisasyon ng AFP—hindi para maghimok ng giyera, kung hindi para magbigay proteksyon sa bansa natin, sa interes ng ating bansa.” “So, nandiyan din po ang gusto ng Pangulo na mula Batanes na parte ng Pilipinas…Kung mayroon pang nauuna diyan sa Batanes na parte ng Pilipinas, isasama natin ‘yan hanggang Tawi-Tawi at sa kadulu-duluhan ng Tawi-Tawi na abot ng Pilipinas, ang nais ng Pangulo, lahat ay konektado. At isa pa pong nais ng Pangulo, dapat hindi tayo mahuli pagdating sa AI. So, ‘yan po ang ilan lamang sa nakikita natin na magiging parte ng Pilipinas dahil sa mga proyektong nais ng Pangulo,” diin pa niya. Pero giit ni Usec. Castro, ang gusto raw ng Pangulo ay ang mga epekto ng mga programa nito para sa mga Pilipino, at hindi mga numero na ayon sa kaniya ay hindi nararamdaman ng tao. “Pero ang numero—kahit sabihin nating ilan man ang nagawa na ng Pangulo—ang numero ay hindi nararamdaman ng tao. So, ang nais ng Pangulo, hindi numero, kundi epekto ng mga programang ito sa pang araw-araw na buhay ng bawat Pilipino,” ani Usec. Castro. Samantala, kaugnay nito, tahasan niya ring sinabi sa parehong press briefing na hindi ginusto ni PBBM ang pagtaas ng presyo ng produktong petrolyo. #Balita #ClaireCastro #BongbongMarcos #Administration #News @Manila Bulletin

Balita

Open In TikTok:

Region: PH

Friday 25 September 2026 11:15:00 GMT