@kuningarathabdulla1: അമേരിക്കയിൽനിന്ന് ഏതു സമയവും അപ്രതീക്ഷിത നീക്കങ്ങളുണ്ടാകാമെന്ന വിലയിരുത്തലുമായി കാനഡ. യുഎസ് സൈനിക ഇടപെടൽ തള്ളിക്കളയാനാകില്ലെന്നു പരസ്യമായി വെളിപ്പെടുത്തിയിരിക്കുകയാണ് കാനഡ പ്രധാനമന്ത്രി മാർക്ക് കാർണി. അത്യപൂർവമായ ഒരു സൈനിക ആക്രമണ സാധ്യത മുന്നിൽക്കണ്ട് രാജ്യം പ്രതിരോധ തയാറെടുപ്പുകൾ നടത്തുകയാണെന്ന് അദ്ദേഹം വെളിപ്പെടുത്തി. 'ന്യൂയോർക്ക് ടൈംസി'ന് നൽകിയ പ്രത്യേക അഭിമുഖത്തിലാണ് ഇരു രാജ്യങ്ങളും തമ്മിലുള്ള പതിറ്റാണ്ടുകൾ നീണ്ട പ്രതിരോധ പങ്കാളിത്തത്തെപ്പോലും ചോദ്യം ചെയ്യുന്ന തരത്തിലുള്ള നിർണായക വെളിപ്പെടുത്തൽ കാർണി നടത്തിയത്. കാനഡയെ അമേരിക്കയുടെ 51-ാം സംസ്ഥാനമാക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ നിരന്തരമായ പ്രസ്താവനകളെ പരാമർശിച്ചാണ് കാർണി പ്രതികരിച്ചത്. സാധ്യതാപട്ടികയിൽ വളരെ പിന്നിലാണെങ്കിലും, ഇത്തരമൊരു അടിയന്തര സാഹചര്യത്തെ മുന്നിൽക്കണ്ട് സുരക്ഷാ പദ്ധതികൾ തയാറാക്കേണ്ടത് ഭരണകൂടത്തിന്റെ ഉത്തരവാദിത്തമാണെന്ന് അദ്ദേഹം വ്യക്തമാക്കി. ഒരു പ്രധാനമന്ത്രി എന്ന നിലയിൽ ഏറ്റവും വിനാശകരമായ അപകടസാധ്യതകൾ മുൻകൂട്ടി കണ്ട് റിസ്ക് മാനേജ്മെന്റ് നടത്തേണ്ട ചുമതല തനിക്കുണ്ടെന്നും, ഒന്നും ചെയ്യാതെ കൈകെട്ടിയിരിക്കുന്നത് തികഞ്ഞ നിരുത്തരവാദപരമാകുമെന്നും കാർണി ചൂണ്ടിക്കാട്ടി. കാനഡയെ യുഎസിലേക്ക് കൂട്ടിച്ചേർക്കുമെന്ന ട്രംപിന്റെ മുൻ നിലപാടുകൾ ഇരു രാജ്യങ്ങൾക്കുമിടയിൽ വലിയ അവിശ്വാസം സൃഷ്ടിച്ചിരുന്നു. നേരത്തെ ജസ്റ്റിൻ ട്രൂഡോയോടും പിന്നീട് മാർക്ക് കാർണിയുമായുള്ള കൂടിക്കാഴ്ചകളിലും ട്രംപ് ഈ വാദം ആവർത്തിച്ചിട്ടുണ്ട്. കാനഡ വിൽപ്പനയ്ക്കുവച്ചിരിക്കുകയല്ലെന്ന് ഭരണകൂടം തുറന്നടിച്ചെങ്കിലും ട്രംപ് നിലപാടുകളിൽ മാറ്റം വരുത്തിയില്ല. ഇതിന് പിന്നാലെ വ്യാപാര മേഖലയിൽ ഉടലെടുത്ത കടുത്ത തർക്കങ്ങൾ പ്രശ്നം കൂടുതൽ സങ്കീർണമാക്കി. 28 ബില്യൺ ഡോളറിന്റെ കനേഡിയൻ ഉൽപ്പന്നങ്ങൾക്ക് യുഎസ് 50 ശതമാനം തീരുവ ചുമത്തിയപ്പോൾ, അതേ നാണയത്തിൽ കാനഡ തിരിച്ചടിച്ചു. മദ്യവും പാൽ ഉൽപ്പന്നങ്ങളും അടക്കമുള്ള സാധനങ്ങൾ തടഞ്ഞ് ട്രംപ് ഭരണകൂടം വ്യാപാരയുദ്ധം മുറുക്കിയതോടെ ചരിത്രത്തിലെ ഏറ്റവും മോശം അവസ്ഥയിലാണ് വടക്കേ അമേരിക്കൻ അയൽക്കാരുടെ ബന്ധം. സൈനികവും സാങ്കേതികവുമായ മേഖലകളിൽ അമേരിക്കയെ മാത്രം അന്ധമായി ആശ്രയിക്കുന്ന നയം മാറ്റിയെഴുതാൻ കാനഡ നടപടികൾ ആരംഭിച്ചു കഴിഞ്ഞു. ഇലോൺ മസ്കിന്റെ സ്റ്റാർലിങ്ക് ഉപഗ്രഹ ശൃംഖലയ്ക്ക് പകരമായി മറ്റ് വഴികൾ കാനഡ പരിശോധിക്കുകയാണ്. യുഎസിൽനിന്ന് 88 എഫ് 35 പോർവിമാനങ്ങൾ വാങ്ങാനുള്ള കരാർ സംബന്ധിച്ച തീരുമാനങ്ങളും പുനഃപരിശോധിക്കുകയാണ്. യൂറോപ്യൻ യൂണിയനുമായി സഖ്യം ശക്തിപ്പെടുത്താനും കാനഡ ആലോചിക്കുന്നുണ്ട്. യുഎസിൽ ഏത് ഭരണകൂടം അധികാരത്തിൽ വന്നാലും കാനഡയുടെ താൽപര്യങ്ങൾ സംരക്ഷിക്കപ്പെടണമെങ്കിൽ പങ്കാളിത്തങ്ങൾ വൈവിധ്യവൽക്കരിക്കണമെന്നാണ് കാർണിയുടെ പക്ഷം. അതേസമയം, ഭിന്നതകൾ രൂക്ഷമാണെങ്കിലും വാഷിങ്ടണുമായി ആശയവിനിമയം ഇപ്പോഴും തുടരുന്നുണ്ടെന്നും നേരിട്ടുള്ള ചർച്ചകളിലൂടെ പ്രശ്നപരിഹാരത്തിനാണ് മുൻഗണന നൽകുന്നതെന്നും അദ്ദേഹം വ്യക്തമാക്കി. #MarkCarney #CanadaUSrelations #DonaldTrump #ReplyVideo #creatorsearchinsights
