@shimaashnanx0: والدة ووالد روني وأهلها.. وين إنتو؟ بتكم دي ما بخير من فترة طويلة و ربنا بسألكم .. الشابة روني صباحي محتاجة أسرتها ما محتاجة تعاطف السوشيال ميديا. وحتى لو التعاطف والتعاضد معاها بقى ترند و خلاها توقف عن البكاء لفترة، لكن التعاطف وحده ما بعالجها ولا بيوفّر ليها الأمان والسند البتحتاجهم. دعوتنا هسه لأسرتها الحقيقية الوالد والوالدة، الإخوة والأخوات إن وُجدوا أو أقربائها بالدم من الدرجة الأولى، خيلانها وخالاتها. وين إنتو من روني صباحي؟ ولو احتجبتوا عن الظهور بسبب تكرار الحاجات البتعملها روني وظهورها بالطريقة دي ده ما علاج وما حيحذف اسمكم من حياتها وما حيقطع الصلة بينكم. روني محتاجة الأسرة محتاجة وقفة أهلها ووجودهم جنبها ما محتاجة تعاطف الميديا الزائف البكتب عشان الترند ورفع المشاهدات. ظهوركم في حياة روني مسؤولية إنسانية قبل أي شيء السوشيال ميديا قاسية ومدمّرة وما عايزينكم في يوم لا قدر الله تقعدوا تلوموا نفسكم لو حصل ليها مكروه وهي في الحالة الصعبة البتمرّ بيها. بالجد روني محتاجة أهلها في اللحظة دي، محتاجة تحس إنو في ناس ما حيتخلوا عنها مهما حصل ومهما كان ظهورها قدام الناس. كونوا قريبين منها أعرفوها مالها محتاجة شنو ، فاقدة شنو ، و كيف تبقى طيبة ،قبل ما يكون القرب مجرد منشور أو تعاطف على الشاشة.

Dr Shimaa shnan

Open In TikTok:

Region: SA

Saturday 26 September 2026 22:38:09 GMT