ကော့သောင်းမြို့အဝင် ၁၀ မိုင်ဂိတ်နှင့် ခမောက်ကြီးဂိတ်တို့တွင် ရဲစခန်းမှူး ကံမြင့်နှင့် တပ်နယ်မှူးများက ကုန်ကား ၁ စီးလျှင် ငွေကျပ် သိန်းဆယ်ချီတောင်းပြီး ငွေ မပေးနိုင်လျှင်ကုန်စည်များကို ဆွဲချ သိမ်းဆည်း ရန်ကုန်၊ စက်တင်ဘာ ၂၆ တနင်္သာရီတိုင်း၊ ကော့သောင်းမြို့အဝင် ၁၀ မိုင်စစ်ဆေးရေးဂိတ်နှင့် ခမောက်ကြီးစစ်ဆေးရေးဂိတ်တို့တွင် ရဲစခန်းမှူး ကံမြင့်နှင့် တပ်နယ်မှူးများက တရားဝင်သွားလာနေသည့် ကုန်တင်ယာဉ်များအပါအဝင် ကွမ်းသီးတင်ကားများကို ကားတစ်စီးလျှင် ငွေကျပ်သိန်းဆယ်ချီအထိ တောင်းခံနေပြီး မပေးပါက ဆက်လက်သွားလာခွင့် မပြုဘဲ ဖိအားပေးနေကြောင်း ကုန်သည်များထံမှသိရသည်။ ကော့သောင်းမြို့အဝင် ၁၀ မိုင်ဂိတ်တွင် တရားဝင်သွားလာနေသည့် ကုန်တင်ကားများ၊ ကွမ်းသီးတင်ကားများနှင့် အခြားကုန်တင်ယာဉ်များကိုပါ ကားတစ်စီးလျှင် ငွေကျပ်သိန်းဆယ်ချီ တောင်းခံနေပြီး တောင်းခံသည့်ငွေ မပေးပါက ဖြတ်သန်းသွားလာခွင့် မပြုဘဲ အကျပ်ကိုင်နေကြောင်း သိရှိရသည်။ “၁၀ မိုင်ဂိတ်မှာ ကားတွေကို တစ်စီးချင်းစီ သိန်းနဲ့ချီတောင်းနေတယ်။ မပေးရင် မသွားနဲ့ဆိုပြီး ဓားပြတိုက်သလိုမျိုး လုပ်နေကြတယ်။ ခမောက်ကြီးဂိတ်မှာလည်း စခန်းမှူး ကံမြင့်ဆိုသူက အလားတူ ကားတစ်စီးကို သိန်းနဲ့ချီ တောင်းနေတယ်” ဟု ဒေသကုန်သည်ကရှင်းလင်း ပြောကြားသည်။ အဆိုပါ စစ်ဆေးရေးဂိတ်များတွင် ကုန်တင်ယာဉ်များထံမှ ငွေကြေးအဆမတန် တောင်းခံနေခြင်းကြောင့် ဒေသခံကုန်သည်များနှင့် ကုန်တင်ယာဉ်ပိုင်ရှင်များအနေဖြင့် ကုန်သွယ်သွားလာရေးအတွက် အခက်အခဲများ ကြုံတွေ့နေရပြီး သယ်ယူပို့ဆောင်ရေးကုန်ကျစရိတ်များလည်း မြင့်တက်လာနိုင်ကြောင်း ဒေသခံများက ပြောဆိုသည်။ “ပြည်သူတွေက လုပ်စားရတာတောင် တော်တော်လေး အခက်တွေ့နေကြတယ်။ ကားတစ်စီးဖြတ်ဖို့ ဒီလောက်အထိ ပေးနေရတာဆိုတော့ နောက်ဆုံး ကုန်ဈေးနှုန်းထဲမှာပဲ ပြန်ထည့်ရမှာဖြစ်တယ်” ဟု ကော့သောင်းကုန်စည်ဒိုင်လုပ်ငန်းရှင်က ပြောကြားသည်။ ယင်းအပြင် ခရီးသွားပြည်သူများကိုလည်း တစ်ဦးလျှင် ငွေကျပ် ၅၀၀၀ တောင်းခံပြီး မှတ်ပုံတင်မပါသူများကို ငွေကျပ် ၅ သောင်းမှ ၁ သိန်းအထိ စစ်တပ်နှင့်ရဲများက တောင်းခံနေကြောင်း သိရှိရသည်။ လုံခြုံရေးအတွက် ဖွင့်လှစ်ထားသည့် စစ်ဆေးရေးဂိတ်များတွင် အာဏာနှင့် လုပ်ပိုင်ခွင့်များကို မလျော်ကန်စွာ အသုံးချနေခြင်းကြောင့် တရားမဝင်ကုန်စည်စီးဆင်းမှုများ ဖြစ်ပေါ်လာပြီး ကုန်ဈေးနှုန်းမြင့်တက်မှုကိုလည်း သက်ရောက်စေနိုင်ကြောင်း စစ်ကောင်စီခေါင်းဆောင် မင်းအောင်လှိုင်က စက်တင်ဘာ ၂၃ ရက် နေပြည်တော်အစည်းအဝေးတွင် ပြောကြားထားသည်။ စစ်ဆေးရေးဂိတ်များကြောင့် တရားမဝင်ကုန်စည်စီးဆင်းမှုများ ဖြစ်ပေါ်နေပြီး အဆိုပါအခြေအနေ၏ အကျိုးဆက်အဖြစ် ပြည်သူများအနေဖြင့် ကုန်ဈေးနှုန်းမြင့်တက်မှုဒဏ်ကို ခံစားနေရကြောင်း မင်းအောင်လှိုင်က ပြောကြားခဲ့သည်။ ထို့ကြောင့် စစ်ဆေးရေးဂိတ်များကို ထိရောက်စွာ ကိုင်တွယ်ဖြေရှင်းရန်နှင့် ဥပဒေချိုးဖောက်မှုများရှိပါက ဥပဒေနှင့်အညီ ထိထိရောက်ရောက် အရေးယူဆောင်ရွက်ရန် မင်းအောင်လှိုင်က ညွှန်ကြားခဲ့ကြောင်း သိရသည်။ ထို့အပြင် လတ်တလော ပြည်သူများ ရင်ဆိုင်နေရသည့် ကုန်ဈေးနှုန်းမြင့်တက်မှုကို လျှော့ချနိုင်ရန် ဒေသအလိုက် တာဝန်ရှိသူများအနေဖြင့် လုပ်သင့်လုပ်ထိုက်သည်များကို အမှန်တကယ် လုပ်ဆောင်ဖြေရှင်းပေးရန်လည်း မင်းအောင်လှိုင်က ပြောကြားခဲ့သည်။ သို့သော် မြေပြင်အခြေအနေတွင် လုံခြုံရေးအတွက် ဖွင့်လှစ်ထားသည့် စစ်ဆေးရေးဂိတ်အချို့၌ လက်နက်နှင့် အာဏာကို အားကိုးကာ ပြည်သူများကို ခြိမ်းခြောက်အကျပ်ကိုင်ခြင်း၊ ငွေကြေးအဆမတန် တောင်းခံခြင်းနှင့် တရားမဝင်ကုန်ပစ္စည်းဟု အကြောင်းပြကာ ကုန်ပစ္စည်းများ သိမ်းဆည်းခြင်းများ ရှိနေသည်ဟု ကုန်သည်အသိုင်းအ၀ိုင်းထံမှ သိရှိရသည်။ စစ်ဆေးရေးဂိတ်များကို ထိရောက်စွာ ကိုင်တွယ်ဖြေရှင်းရန် မင်းအောင်လှိုင်က ညွှန်ကြားထားသော်လည်း ကော့သောင်းမြို့အတွင်းရှိ စစ်ဆေးရေးဂိတ်များတွင် ကုန်တင်ယာဉ်များထံမှ ငွေကြေးတောင်းခံမှုများ ဆက်လက်ရှိနေသဖြင့် အောက်ခြေရှိ တာဝန်ရှိသူများအနေဖြင့် အဆိုပါညွှန်ကြား ချက်ကို လက်တွေ့အကောင်အထည်ဖော်နိုင်ခြင်း မရှိသေးကြောင်း ဒေသခံများက ပြောဆိုထားသည်။ ဓာတ်ပုံ- မြို့အဝင် စစ်ဆေးရေးဂိတ်တစ်ခု။ (ပုံအဟောင်းဖြစ်ပါသည်။)@ZayarTBZ 7.1News🍉 @ZayarTBZ 11 News #ဒေသသတင်းရင်းမြစ် #ပြည်တွင်းသတင်း #စစ်တပ်ယုတ်မာမှုပေါင်းစုံငါတို့အသိဆုံး #zayartbz #မြန်မာသတင်း - @zayartbz7news