@ednews_tv: Türkiyədə keçirilən son ictimai rəy sorğusunun nəticələri Azərbaycanla bağlı cəmiyyətdəki münasibətin yenidən müzakirə olunmasına səbəb olub. Sorğuda respondentlərin təxminən 25 faizinin Azərbaycana mənfi münasibət ifadə etdiyi açıqlanıb. Eyni zamanda, Türkiyə cəmiyyətində Azərbaycanı dost və qardaş ölkə hesab edənlərin böyük çoxluq təşkil etdiyi qeyd olunur. Bu göstərici son dövrlərdə Türkiyənin ictimai-siyasi məkanında ayrı-ayrı qruplar tərəfindən Azərbaycanla bağlı səsləndirilən tənqidi və qərəzli fikirlərlə bağlı müzakirələri də aktuallaşdırıb. Xüsusilə BMT-də İsrail nümayəndəsinin çıxışı zamanı Azərbaycan nümayəndəsinin zalı tərk etməməsi ilə bağlı Türkiyədə bəzi siyasi və ictimai qrupların Azərbaycana qarşı tənqidi mövqelər sərgilədiyi bildirilir. Mövzu ilə bağlı Beynəlxalq Avrasiya Mətbuat Fondunun (BAMF) prezidenti Umud Mirzəyev EDnews-a açıqlamasında bildirib ki, Türkiyədə keçirilmiş ictimai rəy sorğusunun nəticələrinə yalnız statistik göstərici kimi yanaşmaq düzgün olmazdı. “Azərbaycanı dost və qardaş ölkə hesab edənlərin açıq çoxluq təşkil etməsi təbiidir. Bununla yanaşı, respondentlərin təxminən dörddə birinin Azərbaycana mənfi münasibət ifadə etməsi də üzərində ciddi düşünülməli məqamdır. Azərbaycanla Türkiyə arasındakı münasibətlər hansısa siyasi qrupun, partiyanın və ya ayrı-ayrı şəxslərin münasibəti ilə ölçülə bilməz. Bu əlaqələrin arxasında ortaq tarix, dil, mədəniyyət, qarşılıqlı etimad və ən çətin günlərdə nümayiş etdirilmiş həmrəylik dayanır. Azərbaycan bu qardaşlığa hər zaman yüksək dəyər verib və Türkiyənin yanında olmağı siyasi konyunktura deyil, mənəvi məsuliyyət kimi qəbul edib. Məhz buna görə Türkiyədə səslənən anti-Azərbaycan ritorikası bizi narahat etməlidir. Eyni zamanda, buna cavab olaraq Azərbaycanda anti-Türkiyə əhval-ruhiyyəsi yaratmaq da eyni dərəcədə yolverilməzdir. Məncə, məsələnin ən təhlükəli tərəfi də budur: hansı tərəfdə olmasından asılı olmayaraq, iki qardaş xalqı qarşı-qarşıya qoymağa çalışanlar əslində hər ikisinin mənafeyinə zərbə vururlar. Siyasi fikir ayrılıqları ola bilər, tənqid də ola bilər. Amma Azərbaycanı Türkiyəyə, Türkiyəni Azərbaycana qarşı qoymaq üçün qardaşlıq münasibətlərini siyasi mübarizənin alətinə çevirmək olmaz. Bu münasibət onilliklərin sınağından çıxıb və gündəlik siyasi ritorikadan qat-qat böyükdür. Hesab edirəm ki, xüsusilə Türkiyənin ictimai-siyasi məkanında Azərbaycana qarşı formalaşdırılmağa çalışılan qərəzli ritorikaya birdəfəlik son qoyulmalıdır. Eyni həssaslığı biz Azərbaycanda da qorumalıyıq. Bizim vəzifəmiz aramıza sədd çəkmək istəyənlərin dilində danışmaq deyil, Azərbaycan–Türkiyə qardaşlığını gələcək nəsillərə daha sağlam şəkildə ötürməkdir”, – deyə Umud Mirzəyev bildirib. #azerbaycan🇦🇿 #türki̇ye #dezinformasiya #texribat #umudmirzəyev

EDnews | Eurasia Diary

Open In TikTok:

Region: AZ

Sunday 27 September 2026 08:55:17 GMT