Türkiyə mətbuatının müəyyən seqmentlərində Azərbaycanın BMT-dəki nümayəndəsinin İsrailin baş naziri Benyamin Netanyahunun çıxışını sona qədər dinləməsi ətrafında aparılan müzakirələr təəccüb doğurur. Unutmaq olmaz ki, beynəlxalq diplomatiya emosiyalarla deyil, dövlət maraqları, qarşılıqlı münasibətlər və siyasi reallıqlarla idarə olunur. Bir dövlətin nümayəndəsinin beynəlxalq platformada digər ölkənin rəhbərinin çıxışını dinləməsi həmin dövlətin bütün siyasi mövqeləri dəstəkləməsi demək deyil. Azərbaycanın həm Türkiyə, həm də İsraillə münasibətləri var. Türkiyə bizim qardaşımız, İsrail isə Azərbaycanın uzun illərdir siyasi, iqtisadi və digər sahələrdə əməkdaşlıq etdiyi yaxın tərəfdaşlarından biridir. Bu münasibətlərin hər biri öz tarixi və strateji əsaslarına söykənir. Azərbaycanın İsraillə diplomatik münasibətlərini qoruması Türkiyəyə olan qardaşlıq münasibətlərinə zidd olmadığı kimi, Türkiyənin müxtəlif dövlətlərlə diplomatik təmasları da onun Azərbaycanla dostluğunu şübhə altına almır. Əgər diplomatik təmasları siyasi mövqenin göstəricisi kimi qiymətləndiririksə, onda beynəlxalq görüşlərə və dövlətlərarası münasibətlərə də eyni meyarla yanaşmalıyıq. Diplomatiya danışmaq, dinləmək və milli maraqları qorumaq sənətidir. Azərbaycan öz xarici siyasətini müstəqil şəkildə müəyyənləşdirən, dostları ilə münasibətlərini qarşılıqlı hörmət və milli maraqlar əsasında quran dövlətdir. Heç bir diplomatik hadisə Azərbaycanla Türkiyənin tarixi qardaşlığını kölgədə qoya bilməz. Eyni zamanda, Azərbaycanın digər dövlətlərlə qurduğu münasibətlərə görə əsassız ittihamlara məruz qalması da doğru yanaşma deyil. Qardaşlıq emosional müzakirələrlə deyil, qarşılıqlı etimadla qorunur. Diplomatiya isə dövlətlərin öz maraqlarını həyata keçirməsinin təbii vasitəsidir. #Azərbaycan #İsrail #Türkiyə - @qarakassa001