Siyasətin, diplomatiyanın bir üzü yoxdur. Hər şey göründüyü kimi deyil. Məqsədim bu ki, Türkiyə-Azərbaycan münasibətlərində süni gərginlik axtarmayın. Atılan addımların da razılaşdırılmış olmadığı fikrinə düşməyin. Bu qədər sıx, əl-ələ, çiyin-çiyinə, hər yerdə ortaq mövqelər sərgiləyən iki dövlət kiçik məsələlərdə belə mütləq razılaşırlar. Məsələyə gəlim... İsrail rəhbərinin BMT tribunasından çıxışı zamanı Azərbaycan nümayəndəsinin zalı tərk etməməsini özəlliklə Türkiyənin bəzi sosial media istifadəçiləri xəyanətə bərabər addım kimi qiymətləndirib, ölkəmiz əleyhinə təbliğata başladılar. Elə bizimkilərin də cavabı ləngimədi. Çox tələsirsiniz, dostlar. Siyasət bu deyil. Heç düşündünüzmü ki, bəlkə Azərbaycan və Türkiyə rəsmiləri bilərəkdən belə addım atıblar? Bəlkə sabah Türkiyə və İsrail arasında qarşıdurmada maraqları olanlar, belə hal olarsa, Azərbaycanın vasitəçiliyinə ehtiyac olacaq? Bəlkə bu halı nəzərə alaraq, iki tərəf də balanslı siyasət yürüdür, qapıların hamısını qapatmırlar? Elə ən yaxın dövrdə qondarma erməni soyqırımının İsrail tərəfindən rəsmi tanınması Azərbaycanın müdaxiləsi ilə durdurulmadımı? O zaman indi səsi yüksəkdən çıxanlar nə üçün demədi ki, Azərbaycan niyə belə addım atdı, İsrail sizi niyə eşitdi, siz onlarla niyə dostsunuz? Heç kim heç nə demədi... İndi siz deyin, Azərbaycan və Türkiyə dövlətləri bu qədər yaxın ikən sizcə, bu tipli siyasətlərdə heçmi ortaq hərəkət etmirlər? Sizcə, Türkiyə fərqində deyil ki, kifayət qədər çoxsaylı ölkələr onun İsraillə qarşıdurmada, hətta hərbi konflikdə olmasında maraqlıdırlar? Həm də bilirlər ki, o qarşıdurma olsa, həmin ölkələr yanğına körüklə gedəcəklər. Bəlkə ona görə Azərbaycan-İsrail münasibətlərinin yaxşı məcrada davam etməsində bir problem görmürlər? Bu tip siyasətin Türkiyə-Azərbaycan müstəvisində analoqu çoxdur. Azərbaycan AŞPA-dan uzaqlaşdırılıb, Türkiyə oradadır, Fələstin rəhbərliyi Ermənistanın yanında olub, Türkiyə Fələstinə dəstək verib, Azərbaycan etiraz etməyib, İran belə Ermənistanla xoş münasibətdə olanda Türkiyə neytral mövqe tutub. Hətta AŞPA-da səsvermə zamanı Türkiyəli deputatlardan Azərbaycan əleyhinə səs verəndə belə qardaşlığımız sarsılmayıb. Çünki siyasətin, diplomatiyanın və reallığın nə olduğunu tərəflər gözəl bilib. Sizcə, bunlar razılaşdırılmamış olub? Məncə, siyasətə bir az dərindən baxın, bu, məişət dedi-qodusu səviyyəsində qiymət veriləcək bir şey deyil. Türkiyə-Azərbaycan dostluğu, qardaşlığı bu tip dedi-qodu ilə sarsılacaq deyil. İstərdim ki, siyasətə bir az ciddi yanaşaq. İqbal Ağazadə #fyp #iqbalağazadə #keşfet #türkiye #israil - @iqbal_agazade