WARIYE NIMCO CUMAR MAXAMED SAMRIYE OO BOOQATAY XAFIISKA ALPHA TRUST EE MAGAALADA MUQDISHO. Muqdisho, Soomaaliya — Xafiiska Ururka Samafalka Soomaaliyeed ee Alpha Trust ee magaalada Muqdisho ayaa maanta si diirran loogu soo dhaweeyay Wariye Nimco Cumar Maxamed Samriye, oo booqasho sharafeed ku timid xarunta ururka. Wariye Nimco Samriye ayaa booqashadeeda waxaa ku wehliyay xildhibaanno ka tirsan labada Aqal ee Baarlamaanka Federaalka Soomaaliya, shakhsiyaad caan ah, madax ka socotay shirkado, bahda warbaahinta iyo marti sharaf kale, kuwaas oo iyaguna si diirran loogu soo dhaweeyay Xafiiska Alpha Trust. Mas’uuliyiinta Alpha Trust ayaa Wariye Nimco Samriye iyo wafdigii la socday uga mahadceliyay booqashada qiimaha iyo qadarinta leh, iyagoo ku tilmaamay mid sharaf u ah ururka, isla markaana muujineysa muhiimadda ay leedahay in qeybaha kala duwan ee bulshada ay garab istaagaan howlaha samafalka iyo adeegga bulshada. Intii ay booqashadu socotay, martida waxaa lala wadaagay warbixin ku saabsan howlaha Alpha Trust, barnaamijyada samafalka ee uu fuliyo iyo dadaallada joogtada ah ee ururku ugu jiro taageeridda dadka Soomaaliyeed, gaar ahaan qoysaska danyarta ah, carruurta, dadka nugul iyo bulshada ay saameeyaan xaaladaha bani’aadannimo. Ururka Alpha Trust wuxuu si weyn u dhiirrigelinayaa kaalinta muhiimka ah ee warbaahinta, hoggaanka bulshada, xubnaha Baarlamaanka, aqoonyahanka, ganacsatada iyo shakhsiyaadka saameynta leh ay ka qaadan karaan horumarinta samafalka, xoojinta isku-gurmadka iyo wacyigelinta bulshada. Ururka Samafalka Soomaaliyeed ee Alpha Trust wuxuu mar kale si gaar ah ugu mahad-celinayaa Wariye Nimco Cumar Maxamed Samriye iyo dhammaan martidii ku wehlinaysay booqashada, waxaana sharaf weyn noo ah inaan ku soo dhaweyno xarunteenna magaalada Muqdisho. Ku soo dhowaada Alpha Trust — hoyga samafalka, isku-gurmadka iyo is-caawinta bulshada Soomaaliyeed. Xafiiska Warbaahinta & Xiriirka Dadweynaha Ururka Samafalka Soomaaliyeed ee Alpha Trust #AlphaTrust #Samafal #Muqdisho #IskuGurmad #IsCaawin - @dkulmie1