@dr_sarah_hussein: في جلسات كتير بسمع نفس الجملة بصيغ مختلفة: أنا مش زعلانة ومش مبسوطة أنا حاسة اني مش موجودة ! الكلام قد يبدو غريب و لكنه منطقي جدًا إكلينيكيًا ده الإحساس المزمن بالخواء أو الفراغ الداخلي chronic emptiness وهو سمة اساسية ف اضطراب الشخصية الحدية هو مش حزن لان الحزن له شكل وثقل وسبب.. الخواء غياب، البعض بيوصفه بالاوضة الفاضية أو الحفرة العميقة وناس تانية كانها بتتفرج على حياتها من ورا إزاز .. وناس بتقول مفيش حد او حاجة جوايا كأنه ثقب أسود .. الاحساس ده مرتبط بغياب الإحساس بالانفعالات الإيجابية والاتصال بالذات مش بس بزيادة الانفعال السلبي ..كمان مرتبط بصعوبة تعريف الهوية ليه بيحصل؟ الهوية الهشة identity diffusion ..كمان البيئة اللي ما اعترفتش بمشاعره لان الحدي كان طفل حساس اتربى في بيئة بتقول له انت بتبالغ فبيتعلم ما يثقش في إحساسه الداخلي وبعدين مابيعرفش يحدد هو حاسس بايه أصلاً و صعوبة إنك تفهم مشاعرك ودوافعك بتسيب إحساس بالفراغ الانفصال والتبلد: الخواء ساعات بيكون نوع من ال emotional numbingوهو رد فعل للجهاز العصبي لما الانفعال يبقى أكبر من قدرة الشخص على الاحتمال و عشان كده الحدي بيدور على أي شدة extreme أكل بشراهة ..تسوق ..علاقات سريعة الاندماج ..مخاطرة أو إيذاء جسدي..مش رغبة في الفعل نفسه أد ما هو محاولة للإحساس بأي حاجة..وعشان كده الخواء الشديد مرتبط بخطورة أعلى للأفكار الانتحارية الفرق بينه و بين الاكتئاب ان الاكتئاب غالبًا فيه يأس وأفكار سلبية عن النفس والمستقبل..الخواء الحدي بيتوصف انه لا شيء ..الاتنين ممكن يتقابلوا في نفس الشخص وده اللي بيخلي التقييم مهم تابعت مع بوردرلاين كتير وأغلبهم وصل لتحسن كبير ...الخواء والخوف من الهجر أبطأ الأعراض في التحسن، بس بيتحسنوا فعلاً مع المتابعة و الالتزام #borderlinerpersonalitydisorder #bpdawareness #اضطراب_الشخصية_الحدية #بوردرلاين #bpd

Dr. Sarah Hussein

Open In TikTok:

Region: EG

Monday 28 September 2026 14:21:00 GMT