“ကြီးပွါးချမ်းသာချင်ရင် ပါးစပ်စည်းကမ်းရှိဖို့ အရေးကြီးတယ်” လူတစ်ယောက်ရဲ့ အဆင့်အတန်းကို သူဝတ်ထားတဲ့ တံဆိပ်တွေ၊ စီးတဲ့ကားတွေက ဆုံးဖြတ်တာ မဟုတ်ဘူး သူ ပါးစပ်ဟလိုက်တဲ့ ပထမဆုံး (၃) စက္ကန့်ကပဲ အကုန်လုံးကို အဖြေပေးသွားတာ ဖြစ်တယ်။ ဘယ်လောက်ပဲ ပညာတတ်တတ်၊ ငွေကြေးချမ်းသာပါစေ၊ စကားပြောတဲ့အခါ လေးစားမှုမရှိ၊ ဆင်ခြင်တုံတရား ကင်းမဲ့နေရင် အဲ့ဒီလူရဲ့ တန်ဖိုးက ချက်ချင်း ထိုးကျသွားတယ်။ ပါးစပ်စည်းကမ်းရှိခြင်းကသာ လူတစ်ယောက်ရဲ့ အစစ်အမှန် အဆင့်အတန်းကို ပြသတဲ့ အရာဖြစ်တယ်။ ပါးစပ်စည်းကမ်း ရှိတဲ့သူကို လုပ်ငန်းခွင်မှာရော၊ လူမှုပတ်ဝန်းကျင်မှာပါ လူတွေက အလိုလို လေးစားယုံကြည်ကြတယ်။ လုပ်ငန်းအောင်မြင်မှုနဲ့ ဉာဏ်ပညာကြီးမားမှုဆိုတာ တန်ဖိုးရှိတဲ့ စကားတွေကနေတဆင့် ပေါ်လွင်လာတာ ဖြစ်တယ်။ လူ့သဘာဝရဲ့ အမှောင်ဘက်ခြမ်းမှာ ကိုယ့်ကိုယ်ကိုယ် အထင်ကြီးခံချင်စိတ်၊ တခြားသူကို နှိမ့်ချပြီး နေရာယူချင်စိတ်တွေ ကိန်းအောင်းနေတတ်တယ်။ အဲ့ဒီစိတ်ကနေတဆင့် အတင်းအဖျင်းတွေ၊ မနာလို ဝန်တိုစကားတွေ ထွက်လာတယ်။ Toxic ဖြစ်တဲ့ ပတ်ဝန်းကျင်တစ်ခုမှာ ဒီလိုစကားတွေ ကြားနေရတာ၊ အတင်းအဖျင်းတွေကြားမှာ အလုပ်လုပ်နေရတာက ခင်ဗျားရဲ့ စိတ်ခွန်အားတွေကို ဘယ်လောက်တောင် စုပ်ယူသွားသလဲဆိုတာ ခင်ဗျား အသိဆုံး ဖြစ်လိမ့်မယ်။ အချိန်ကုန် လူပန်းဖြစ်စေတဲ့ ဒီလိုပတ်ဝန်းကျင်ကနေ ရုန်းထွက်ဖို့ဆိုရင် ကိုယ်တိုင်ကစပြီး ဒီအမှောင်ဘက်ခြမ်းကို ထိန်းချုပ်နိုင်ရမယ်။ လောကမှာ လူ (၂) မျိုးပဲ ရှိတယ်။ ပထမတစ်မျိုးက ခံစားချက်နောက်လိုက်ပြီး စကားကို မစဉ်းစားဘဲ လွှတ်ပြောတတ်တဲ့ သာမန်လူတွေ။ ဒုတိယတစ်မျိုးကတော့ စကားတစ်ခွန်းကို တန်ဖိုးရှိမှ၊ အကျိုးရှိမှ ပြောတတ်တဲ့ ရှားပါးတဲ့ ခေါင်းဆောင်ကောင်းတွေ။ သာမန်လူတွေလို ပါးစပ်စည်းကမ်း မရှိတဲ့အခါ အဖွဲ့အစည်းတွင်း ယုံကြည်မှုတွေ ပျက်စီးမယ်။ နှစ်ချီတည်ဆောက်ထားတဲ့ ခင်ဗျားရဲ့ Personal Brand နဲ့ လုပ်ငန်းအခွင့်အလမ်းတွေ၊ ရင်းနှီးမြှုပ်နှံမှုတွေဟာ မဆင်မခြင်ပြောလိုက်တဲ့ စကားတစ်ခွန်းကြောင့် စက္ကန့်ပိုင်းအတွင်း လုံးဝ ပြိုကျသွားနိုင်တယ်။ ဒါကို လက်တွေ့မှာ ဘယ်လို ဖြေရှင်းမလဲ။ (၁) အဆိုးမြင်စကားကို အပြုသဘော ပြောင်းပါ လုပ်ငန်းခွင် အစည်းအဝေးမှာ အကြံဉာဏ်တစ်ခုကို ပယ်ချချင်တဲ့အခါ "ဒါ အသုံးမကျဘူး" လို့ ရင့်ရင့်သီးသီး ပြောမယ့်အစား "ဒီအကြံက ကောင်းပေမယ့်၊ လက်ရှိ အခြေအနေနဲ့ဆိုရင် ဒီလိုလေး ပြင်လိုက်ရင် ပိုအဆင်ပြေမယ်" လို့ ပြောင်းပြောပါ။ ဒါဟာ ဉာဏ်ပညာရှိတဲ့ ဖြေရှင်းနည်း ဖြစ်တယ်။ (၂) တန်ဖိုးမရှိတဲ့ စကားဝိုင်းတွေကို ရှောင်ပါ လုပ်ဖော်ကိုင်ဖက်တွေ သူများအတင်းပြောနေတဲ့ ဝိုင်းကို ရောက်သွားရင် ဝင်မပါဘဲ "အလုပ်လေး နည်းနည်း ကျန်သေးလို့" ဆိုပြီး အသာအယာ ရှောင်ထွက်လိုက်ပါ။ ခင်ဗျားရဲ့ အချိန်နဲ့ စွမ်းအင်ကို မိမိကိုယ်ကိုယ် တိုးတက်ဖို့အတွက်ပဲ အသုံးပြုပါ။ (၃) ၃-စက္ကန့် စည်းမျဉ်းကို အသုံးချပါ စကားတစ်ခွန်း မပြောခင် ဒီစကားက သူတစ်ပါးကို ထိခိုက်စေမလား၊ ပြဿနာ ပြေလည်သွားစေမလား ဆိုတာ ၃ စက္ကန့်လောက် အချိန်ယူ စဉ်းစားပါ။ လေးစားမှုဆိုတာ ဒီ ၃ စက္ကန့်ကနေ စတင်တာ ဖြစ်တယ်။ ခင်ဗျား ပြောလိုက်တဲ့ စကားလုံးတိုင်းဟာ ခင်ဗျားရဲ့ ကိုယ်စားလှယ်ပဲ။ အဆင့်အတန်းမြင့်တဲ့ ခေါင်းဆောင်တစ်ယောက်လို တွေးပါ၊ စကားပြောပါ။ 🐦‍🔥 Elise May 🍂 MLW 🇱🇹 #TopTen_Quotes #TopTen_Team - @mamazar1807