«ما د ټلوېزیون انتن پرې کړ، څو مور مې د پلار د مړینې خبر وانه وري.» دا خبره د هیله نجیب ده، چې د افغانستان د پخواني ولسمشر ډاکټر نجیب‌الله مشره لور ده. نوموړې دا څرګندونې د خپل پلار د وژل کېدو د دېرشمي تلین په مناسبت په یوه مرکه کې کړې دي او یو ځل بیا یې د ټولنیزو رسنیو د ډېرو کاروونکو پام ځان ته اړولی دی. هیله نجیب دا خبرې په دې وروستیو کې له بي‌بي‌سي سره په یوه مرکه کې کړې دي. هغې ویلي، چې د خپل پلار او کاکا د وژل کېدو له خبر څخه لومړنۍ خبره شوې وه. د هیله د روایت له مخې، هغه مهال نوموړې له خپلې مور او دوو خویندو سره په هند کې اوسېدله او د بي‌بي‌سي له خبرونو څخه د خپل پلار او کاکا د وژل کېدو خبره شوه. هیله وویل: «ما خبر په بي‌بي‌سي کې واورېد... چې پلار مې او کاکا مې په دار ځړول شوي دي.» نوموړې وايي، د دې خبر له اورېدو وروسته یې لومړی غبرګون دا و چې د ټلوېزیون انتن یې پرې کړ، څو مور یې د خپل مېړه د مړینې خبر له ټلوېزیونه وانه وري. وروسته یې له ملګرو ملتونو سره اړیکه ونیوله. هغې ویلي، ملګرو ملتونو دا خبر تایید کړ او وروسته یې موضوع له خپلې مور او د خپل کاکا له مېرمنې سره، چې په هند کې ورسره اوسېدې، شریکه کړه. هغې د هغې شېبې په اړه ویلي: «داسې احساس مې کاوه لکه ځمکه چې له پښو مې لاندې ولړزېده. ما تل احساس کاوه چې موږ یو ملاتړ لرو، خو هغه هم له ما لاړ.» خو د هیله نجیب لپاره د خپل پلار د وژل کېدو له خبر سره د هغې، د مور او دوو خویندو کړاو پای ته ونه رسېد. هیله نجیب وايي، هغه مهال شاوخوا ۱۸ کلنه وه او د خپل پلار او کاکا د جسدونو د راکښته کولو لپاره یې له ملګرو ملتونو او نورو ادارو سره خبرې او هڅې کولې. نوموړې وايي، شاوخوا یوه نیمه ورځ وروسته د کورنۍ هغه غړي چې په کابل کې وو، وتوانېدل چې د نجیب‌الله او د هغه د ورور جسدونه ترلاسه کړي او پکتیا ته یې انتقال کړي؛ ځکه هغوی ته په کابل کې د ښخولو اجازه نه وه ورکړل شوې. نجیب‌الله په ۱۹۹۲ کال کې د خپل حکومت له سقوط وروسته په کابل کې د ملګرو ملتونو دفتر ته پناه وړې وه. د ۱۹۹۶ کال د سپټمبر پر ۲۷مه، د طالبانو د واکمنۍ له پیل او کابل ته د هغوی د ننوتلو په لومړیو ساعتونو کې، نوموړی له خپل ورور، شاهپور احمدزي، سره په زور د ملګرو ملتونو له دفتر څخه وایستل شو او څو ساعته وروسته دواړه په دار وځړول شول. - @user565234903