АУЫЛ ӘКІМІ ТҰРҒЫНДАРДЫ ЖЕКЕ ҚАБЫЛДАП, ІРІ ИНФРАҚҰРЫЛЫМДЫҚ НЫСАНДАРДЫ АРАЛАДЫ Ошақты ауылдық округінің әкімі Н.Сманов тұрғындардың арыз-шағымдары мен ұсыныс-тілектерін тыңдау мақсатында жеке қабылдау өткізді. Қабылдау барысында округ тұрғындары елді мекендерді дамыту, әлеуметтік және инфрақұрылымдық мәселелерге қатысты сауалдарын қойып, тиісті жауаптар алды. Көтерілген мәселелердің шешілуі бойынша сала мамандарына нақты тапсырмалар жүктелді. Бұдан бөлек, ауыл округінің әкімі елді мекендерде жүргізіліп жатқан құрылыс және инфрақұрылымдық жобалардың барысымен танысып, нысандарды аралады. Қазіргі таңда округ аумағында халықтың тұрмыс сапасын жақсартуға бағытталған бірқатар ауқымды жұмыстар атқарылуда: Газдандыру: Округке қарасты 6 елді мекенге табиғи газ құбырын тарту жұмыстары жүргізілуде; Байланыс және интернет: Тұрғындарды сапалы ұялы байланыспен және интернетпен қамтамасыз ету мақсатында 5 елді мекенде «Kcell» АҚ-ның базалық станцияларын орнату жұмыстары өтуде; Жол құрылысы: Сарыжылға елді мекенінің ішкі көшелерін орташа жөндеу, атап айтқанда асфальт жабындысын төсеу жұмыстары қарқынды атқарылуда. Ауыл округі әкімдігі тарапынан аталған құрылыс-монтаждау жұмыстарының сапасы мен белгіленген мерзімде аяқталуы тұрақты бақылауда болады. (с) Ошақты ауылдық округі әкімі аппараты - @oshakty_akimat