@queen39449: وصفة السفلي المحشي من "خفيف ظريف مع ياسمين" - خفيف ورقيق من داخل وما يعجن، وتحضروه بسرعة. أولاً: مقادير العجينة 1 كاس حليب دافي ناقص صباعتين ½ مغرفة صغيرة خميرة الخبز ½ مغرفة صغيرة سكر عادي بياض حبة بيض فقط، والصفار نخلوه للدهن من بعد 1 مغرفة كبيرة فرينة 2 مغارف كبار زيت زيتون أو زيت عادي شوية ملح فرينة حسب الحاجة، للعجن ثانياً: مقادير صلصة الطماطم شوية زيت زيتون 1 حبة بصل متوسطة مفرومة شوية معدنوس سنة ثوم شوية ملح + فلفل كحل + عكري + كمون + رند 1 مغرفة كبيرة طماطم مصبرة شوية ماء للتمريق ثالثاً: مقادير الحشوة شوية زيت زيتون طماطم + فلفل + بصل مقطعين مكعبات صغيرة شوية ملح + فلفل كحل صدر دجاج مقطع صغير جبن موتزاريلا أو أي فرماج تحبوه للدهن والتزيين صفار البيضة اللي خليناه جلجلان أبيض وأسود زيتون أخضر للتزيين --- طريقة التحضير 1. نحضرو العجينة: في إناء نخلط الحليب الدافي + خميرة الخبز + السكر + بياض البيض + مغرفة فرينة. نخلط بالفوي مليح ونزيد 2 مغارف زيت، نغطيها ونخليها تخمر. بعد ما تخمر، نزيد شوية فرينة + رشة ملح ونلم العجينة حتى تولي تلصق في اليد. نغطيها ونخليها تخمر مرة ثانية. 2. نحضرو صلصة الطماطم: في كسرونة نقلي البصل + المعدنوس + الثوم في شوية زيت زيتون. نزيد الملح، الفلفل الكحل، العكري، الكمون، الرند. نزيد طماطم مصبرة ونخليهم يتقلاو، من بعد نمرق بشوية ماء ونخليها تعقد. 3. نحضرو الحشوة: نقلي البصل + الطماطم + الفلفل في شوية زيت زيتون، نزيد ملح وفلفل كحل. نزيد صدر الدجاج ونخليه يطيب حتى ينشف من كل السوائل. لازم نخلي الحشو يبرد قبل الاستعمال. 4. التشكيل والطياب: نرش الخميرة على العجينة بعد التخمير الثاني ونقسمها كرات صغيرة. نحل كل كرة على سمك رقيق بزاف بالفرينة باش ما تلصق، لأن السر باش ما تجيش معجنة هو تكون رقيقة. ندهن شوية من صلصة الطماطم، ونزيد فوقها الحشو البارد + موتزاريلا. نغلقها على شكل هلال ونزيّر الأطراف مليح باش ما تتنفخش. نظفر الأطراف باليد أو بالفرشيطة. ندهن الوجه بصفار البيض ونرش الجلجلان، ونزين بحبة زيتون في الوسط. ندخلها لفرن مسخن مسبقاً على 200° حتى تطيب من تحت، من بعد نشعل لها من فوق تتحمر. ملاحظة ياسمين: العجينة لازم تكون رقيقة بزاف باش تجي خفيفة وما تشبعكمش حتى لو كليتو منها بزاف. الوصفة بالتفصيل قالت راهي في قناتها على اليوتيوب: خفيف ظريف مع ياسمين صحة وهنا! إذا جربتيها قولي لي كيفاش جاتك 😋

وصفات ولا أروع

Open In TikTok:

Region: DZ

Tuesday 29 September 2026 16:35:35 GMT