የኤርትራ ጦር ድንበር ጥሶ ሰፊ የአፋር መሬት መቆጣጠሩን አቶ አወል አርባ አስታወቁ የኤርትራ ሠራዊት ድንበር ጥሶ በመግባት በክልሉ ዞን ሁለት ሥር የሚገኙ ሰፊ ቦታዎችን መቆጣጠሩን የአፋር ክልል ርዕሰ መስተዳድር አቶ አወል አርባ ለአልጀዚራ በሰጡት ቃል ገለጹ። አቶ አወል በሰሜን ኢትዮጵያ ዳግም ውጥረት ከተቀሰቀሰ ወዲህ አስመራን በቀጥታ ወረራ በመፈጸም በይፋ የከሰሱ የመጀመሪያው ከፍተኛ የኢትዮጵያ ባለሥልጣን ሆነዋል። ርዕሰ መስተዳድሩ እንዳስታወቁት የኤርትራ ኃይሎች የእረብቲ ከተማን ጨምሮ በዞን ሁለት ሥር የሚገኘውን ሁለት ሦስተኛ ወይም ወደ 36 ሺህ ካሬ ኪሎ ሜትር የሚጠጋውን የአፋር መሬት ተቆጣጥረዋል። በተጨማሪም ኃይሎቹ ወደ አፍዴራ ከተማ እንዲሁም በኢትዮጵያ ኤርትራ እና ጅቡቲ የሶስትዮሽ ድንበር አቅጣጫ እየገሰገሱ መሆናቸውን ጠቁመው ድርጊቱ ድንበርን በኃይል የመቀየር ስትራቴጂካዊ ዓላማ ያለው መሆኑን አመልክተዋል። የኤርትራ ሠራዊት ይህን ያህል ርቀት ዘልቆ የገባበት ዋነኛ ዓላማ ኢትዮጵያ ወደ ቀይ ባሕር እና ወደ ዓሰብ ወደብ ለመድረስ ያላትን እንቅስቃሴ ለማክሸፍ እንደሆነ ተናግረዋል። ኃይሎቹ ወደፊት መግፋታቸው ኢትዮጵያ ወደ ወደቡ ለመድረስ የነበራትን የ90 እስከ 100 ኪሎ ሜትር ርቀት ወደ 200 እና 300 ኪሎ ሜትር በማስፋት የባሕር በር ፍላጎቷን የማደናቀፍ ስሌት ያለው መሆኑንም አብራርተዋል። በሌላ በኩል፣ ከዚህ ቀደም በትግራይ ጦርነት ወቅት ክልሉን ደግፈው የነበሩ አንዳንድ ኃይሎች አሁን ላይ አቋማቸውን በመቀየር በአፋር ላይ ጥቃት እንደከፈቱ የጠቆሙት ርዕሰ መስተዳድሩ፣ በክልሉ እየተካሄደ ያለው ውጊያ ከአካባቢው የጸጥታ መዋቅር አቅም በላይ የሆነ «ተመጣጣኝ ያልሆነ ጦርነት» ነው ሲሉ ገልጸውታል። የኤርትራ ጦር ተጨማሪ ግዛቶችን እንዳይቆጣጠር የኢትዮጵያ ፌዴራል መንግሥት እና የአፍሪካ ኅብረት በአስቸኳይ ጣልቃ እንዲገቡ አቶ አወል ጥሪ ያቀረቡ ሲሆን፣ ለቀረበው ክስ እስካሁን ከኤርትራ መንግሥት በኩል የተሰጠ ይፋዊ ምላሽ የለም። - @agala47