@jamiivoice_: HABARI: Hali ya sintofahamu imejitokeza leo jijini Arusha baada ya wafanyakazi wapatao 70 wanaokusanya mapato ya maegesho ya magari kugoma, wakidai kutolipwa mishahara kwa muda wa miezi miwili pamoja na kutokuwa na mikataba rasmi ya ajira. Wafanyakazi hao, wanaodai kufanya kazi chini ya moja ya kampuni zinazohusika na ukusanyaji wa mapato ya maegesho, wamesema wamekuwa wakikabiliwa na changamoto mbalimbali za kikazi, ikiwemo madai ya kutowasilishwa kwa michango yao ya NSSF kwa takribani miaka miwili. Wamesema katika kazi zao hulazimika kuhudumia zaidi ya magari 300 kwa siku, huku wakifanya kazi katika mazingira ya jua na mvua. Pia wamedai kupewa malengo ya ukusanyaji wa mapato, na kwamba mfanyakazi anayeshindwa kufikia lengo hilo hudaiwa kunyang’anywa mashine ya kukusanyia mapato. Kwa mujibu wa wafanyakazi hao, kutolipwa mishahara kwa wakati kumeathiri maisha yao na familia zao, hususan katika mahitaji ya chakula, malazi, ada za watoto na mahitaji mengine muhimu. Wameiomba Serikali, hususan Wizara yenye dhamana ya Kazi na Ajira pamoja na mamlaka nyingine zinazohusika, kuingilia kati na kushughulikia madai yao kuhusu malipo ya mishahara, mikataba ya ajira na michango ya NSSF. Aidha, wameitaka mamlaka husika kuchunguza uwezo na utendaji wa kampuni inayodaiwa kuwahudumia pamoja na utekelezaji wa tenda ya ukusanyaji wa mapato ya maegesho katika Jiji la Arusha. Juhudi za Jamii Voice kupata majibu kutoka kwa kampuni hiyo na mamlaka husika zinaendelea.

Jamii Voice

Open In TikTok:

Region: TZ

Wednesday 30 September 2026 10:38:51 GMT