Qəbələ rayonunda yerləşən Nohurqışlaq su anbarı prezident İlham Əliyevin keçmiş kürəkəni Emin Ağalarova verilib. Bu iddia ilə Nohurqışlaq gölü ətrafında fəaliyyət göstərən bir qrup sahibkar çıxış ediblər. Onların Qəzetçi-yə verdikləri məlumata görə, bu ilin aprelindən etibarən gölün giriş-çıxışı bağlanıb. Vaxtilə Nohurqışlaq gölü ətrafında müxtəlif ticarət və əyləncə yerləri olduğunu bildirən sahibkarların sözlərinə görə, yüzdən çox ailə həmin ərazidən evinə çörək pulu aparıb. “Əraziyə nəzarəti Qəbələ Rayon İcra Hakimiyyəti başçısının müavini, sosial-iqtisadi və memarlıq-tikinti məsələləri şöbəsinin müdiri Arif Allahverdiyevin qardaşı Zöhrab həyata keçirirdi. Sahibkarlardan icarə haqqı pulu adı ilə toplanan vəsaiti Zöhrab Allahverdiyev yığırdı. Onlar 2026-cı ilin icarə pullarını da ilin əvvəlində Zöhrab Allahverdiyevə veriblər. O da öz tərəfindən bildirib ki, narahat olmayın, ən azı bu il obyektləri işləyə biləcəksiniz. Amma bu il göl qapalı olub və yığılan icarə haqları isə geri qaytarılmayıb”, – sahibkarlardan biri Qəzetçi-yə deyib. Sahibkarların sözlərinə görə, sonradanicra hakimiyyətindən onlara bildirilib ki, Nohurqışlaq su anbarı prezident İlham Əliyevin keçmiş kürəkəni Emin Ağalarova verildiyindən əraziyə giriş bağlanıb. Qəzetçi sahibkarların iddiaları ilə bağlı Qəbələ Rayon İcra Hakimiyyətinə və Emin Ağalarova aid “Agalarov Development” şirkətinə ünvanladığı suallara məqalə dərc olunana qədər cavab ala bilməyib. Qəbələ şəhərindən 3 km məsafədə olan Nohurqışlaq gölü Güllüburun, Göydağ və Yumuru dağların arasındakı təbii çuxurda, dəniz səviyyəsindən 700 m hündürlükdə yerləşir. 1949-cu ildə gölün qarşısına bənd çəkilərək su anbarı yaradılıb. Bakı avtomobil yolunun kənarında yerləşən bu su anbarı tanınmış istirahət zonalarından biridir. Nohurqışlaq gölünün sahilində yerləşən məşhur sağlamlıq mərkəzlərindən biri “Chenot Palace Health Wellness Hotel” hesab edilir. Gölün sahilində, şam meşələrinin əhatəsində yerləşən bu otel, Anri Şenonun metodlarına əsaslanan detoks və gümrahlaşdırıcı proqramlar təklif edir. Gölün digər sahilində hakim Əliyevlər ailəsinə məxsus üç hissədən ibarət villalar yerləşir. Əsasən xüsusi əhəngə çəkilmiş, İsveçdən gətirilən yanmayan ağaclardan inşa edilən villaların ətrafı hündür divarla əhatə olunub. Sahibkarların bildirdiyinə görə, su anbarı ilə yanaşı, İsveçrə mənşəli “Chenot Beynəlxalq Sağlamlıq Şəbəkəsi”nə daxil olan “Chenot Palace Health Wellness Hotel” sağlamlıq mərkəzinin və Vəndam qəsəbəsində yerləşən “7 Gözəl şəlalə” İstirahət Mərkəzinin idarəsi də Ağalarova həvalə edilib. - @qazetci