@aj.ethiopia: የድሬዳዋ ከተማ አስተዳደር ከንቲባ ሆነው ሲያገለግሉ የቆዩት አቶ ከድር ጁሀር የስራ ጊዜያቸውን በማጠናቀቅ ስልጣናቸውን ለአዲሱ ከንቲባ አቶ አብዱላሂ አደን በክብር አስረከቡ። ይህ ርክክብ በከተማዋ የፖለቲካ ድባብ ውስጥ ያለፈው አመት ክስተቶችን ዳግም ወደ ትውስታ ያመጣ ነው። ያለፈው አመት ለአቶ ከድር ጁሀር እጅግ ፈታኝና በውጣ ውረድ የተሞላ ጊዜ እንደነበር አይዘነጋም። ለሙሉ አንድ ወር ያህል ከመቀመጫ ከተማቸው ድሬዳዋ ተነጥለው አዲስ አበባ ውስጥ ሲቆዩ፣ ከባድ ግምገማ ላይ እንደነበሩና ከስልጣን ሊነሱ በቋፍ ላይ መሆናቸው በስፋት ይነገር ነበር። የፖለቲካው ውጥረት እና ከስልጣን የመነሳት ስጋት ከንቲባውን በከፍተኛ የጭንቀት ድባቴ ውስጥ ከቷቸው እንደከረሙ የቅርብ ምንጮች ያስታውሳሉ። ሆኖም ያንን ከባድ የ"አዲስ አበባ ፈተና" አልፈው በሀላፊነታቸው እንደሚቀጥሉ ሲወሰን፣ ወደ ድሬዳዋ ሲመለሱ የተፈጠረው ድባብ እጅግ ደማቅና የተለየ ነበር። አቶ ከድር ስልጣናቸውን አስጠብቀው ወደ ከተማዋ ሲገቡ በተዘጋጀላቸው ከፍተኛ ድግስ ላይ በርካታ የእንኳን ደስ አሎት ስጦታዎች እና በሺዎች የሚቆጠሩ የደስታ ምኞቶች እንደ ጎርፍ ፈሰውላቸው ነበር። ያንን ሁሉ የፖለቲካ ማዕበል እና የድል አጥቢያ ፌሽታ አልፈው ከተማዋን ሲመሩ የቆዩት አቶ ከድር ጁሀር፣ አሁን የከንቲባነት ጊዜያቸውን በሰላም አጠናቅቀው መንበራቸውን ለቀጣዩ ከንቲባ ለአቶ አብዱላሂ አደን አስረክበዋል። አዲሱ ከንቲባ አቶ አብዱላሂ አደን የድሬዳዋን አስተዳደር በመረከብ ቀጣዩን የከተማዋን ጉዞ የሚመሩ ይሆናል።