@qyzylorda_aqparat: КИІЗДІҢ КЕРЕМЕТІ КӨП Мына көрініс іңкәр жүрекке із салып, ерекше әсер қалдырады. Ұмытылып бара жатқан ұлттық дәстүрді еске салады да, бал дәурен балалық шақтың базарына апарады. Қандай керемет, жұпар даланың иісі аңқып тұр. Бәріміз бірімізге дегендей, ағайынның ауызбіршілігі, жұдырықтай жұмылып кететін бір сөзділік сезім бүлкілдейді. Бұрын аналарымыз киіз басамыз деп ай бойы дайындалып, сабаумен жүнді түтіп, одан кейін түрлі түске бояп, керек-жарағын түгендеген соң көрші келіншектерді көмекке шақыратын. Шіркін, пейілдің кеңдігі ғой, сол үлкендеріміздің бірі де сылтау айтып, сүбелі істен сырғып кетпейтін еді. Қазанда су қайнап жатады. Кілең қарасирақ бала шелек ұстап, су тасуға дайын тұрады. Ал, келіншектер шиді жазып жіберіп, оның үстіне қалың мата төсеп, жүнді біркелкі етіп жайғастырады. Үстін қызыл, көк түс жүннен әспеттеп, оюмен безендіреді. Дайын шикізатты шимен орап алған соң үстінен ыстық су құйып, балалар тепкілеп, келіншектер білектеп жатады. Бірер сағатта әбден иіні қанып, оюы орнығып, киіз дайын болады. Беті жайнап, көзтартар көрінісіне бәрі риза кейіпте ас-ауқатқа отырады. Осылай әрбір үйде жыл сайын бір-бір киіз басылатын. Қазақ қоғамында көне заманнан келе жатқан киіз басу дәстүрі ұлттық мәдени мұрамыздың бірегейі болса, одан үй жабындысы, тұрмыстық бұйымдар – туырлық, үзік, түндік, текемет, сырмақ жасалатын. Ол күнделікті тіршілікте қолданатын таптырмас заттар еді. Ал, мына бейнебаяндағы киіз Қызылорда қаласының төл мерекесіне арналып жасалған бұйым. Сүйсінерлігі – көненің көзін жаңғыртып, ұмыта бастаған дәстүрімізді ауылдағы ағайын еске салғандай болды. Киіздің үстінде өскен ұрпақ ерекше қасиетін, ылғал өткізбейтін жылылығын бір сәт жадынан шығармайды. Біздің деніміз сау болып, өсіп-өнуімізге киіздің көмегі көп тиген. Сондықтан ол әрдайым ыстық!

Qyzylorda_aqparat

Open In TikTok:

Region: KZ

Friday 02 October 2026 11:41:30 GMT