@wdalteraifi: يا البرهان، الأولوية كان تكون للشباب الوقفوا مع البلد في أصعب الظروف! لقاء البرهان مع شباب التيك توك، الناس البيرسلوا وردة وحوت وما عارف شنو، سؤال مهم يفرض نفسو: وين الشباب الوقفوا مع البلد في عز الأزمة؟ وين الشباب الاتصدّروا للمخاطر، والكانوا موجودين وسط القصف والطيران والدمار؟ وين شباب التكايا، والمتطوعين في دور الإيواء، والناس السخّروا وقتهم وجهدهم عشان يسندوا أهلهم ومجتمعهم؟ وين صُنّاع المبادرات المجتمعية؟ وين الشباب الشالوا المسؤولية وقت ما كانت البلد محتاجة ليهم؟ الشباب ديل ما كانوا منتظرين شهرة، ولا هدايا، ولا ظهور في بث مباشر؛ كانوا في الميدان، بقدموا الممكن، وبحاولوا يخففوا معاناة الناس في ظروف ما سهلة. كان الأولى يكون في اهتمام حقيقي بالشباب ديل، وسماع صوتهم، وتقدير تضحياتهم، وإشراكهم في صناعة القرار ومستقبل البلد. نحن ما ضد مقابلة أي شاب، سواء كان ناشط في التيك توك أو غيره، لكن السؤال: هل بقت الشهرة في مواقع التواصل هي المعيار للقاءات والاهتمام، بينما الشباب البذلوا وقدّموا في الميدان ما لاقين فرصة يوصلوا صوتهم؟ السودان ما حيبنيهو أصحاب الشهرة براهم، السودان حيبنوه كمان الشباب المتطوعين، وصُنّاع المبادرات، وأصحاب الوجعة الحقيقية، والناس الوقفوا مع مجتمعهم في أصعب الظروف. الشباب ديل ما دايرين وردة ولا حوت في بث مباشر؛ دايرين اعتراف بدورهم، واحترام لتضحياتهم، وفرصة حقيقية يكونوا جزء من مستقبل السودان.

الفدائي صابر الطريفي 2️⃣9️⃣

Open In TikTok:

Region: SD

Friday 02 October 2026 18:29:31 GMT