@gulfchandrika: ഹൂതി ആക്രമണം: സൗദിയില്‍ ഒരാള്‍ക്ക് പരിക്കേറ്റു; യെമനില്‍ രൂക്ഷമായ പ്രത്യാക്രമണം നടത്തി സഖ്യ സേന റിയാദ്: സൗദി അറേബ്യയ്ക്ക് നേരെ ഹൂതി വിമതര്‍ പുതിയ ആക്രമണങ്ങള്‍ അഴിച്ചുവിട്ടതോടെ ഗള്‍ഫ് മേഖലയിലുടനീളം യുദ്ധഭീതിയും പിരിമുറുക്കവും രൂക്ഷമാകുന്നു. സൗദിയുടെ തെക്കന്‍ പ്രവിശ്യയായ അസീറിലെ അഹദ് റഫീദ ഗവര്‍ണറേറ്റില്‍ വ്യോമപ്രതിരോധ സേന തകര്‍ത്ത ബാലിസ്റ്റിക് മിസൈലിന്റെ അവശിഷ്ടങ്ങള്‍ പതിച്ച് ഒരു സ്വദേശിക്ക് പരിക്കേറ്റതായി സൗദി സിവില്‍ ഡിഫന്‍സ് അറിയിച്ചു. മിസൈല്‍ അവശിഷ്ടങ്ങള്‍ പതിച്ച് ഒരു കെട്ടിടത്തിനുള്ളിലെ പ്രാര്‍ത്ഥനാ മുറിക്കും ഏതാനും വാഹനങ്ങള്‍ക്കും കേടുപാടുകള്‍ സംഭവിച്ചിട്ടുണ്ട്. പരിക്കേറ്റയാളുടെ ആരോഗ്യനിലയെക്കുറിച്ചോ മിസൈല്‍ എവിടെ നിന്നാണ് തൊടുത്തുവിട്ടതെന്നതിനെക്കുറിച്ചോ കൂടുതല്‍ വിവരങ്ങള്‍ ലഭ്യമായിട്ടില്ല. സൗദി അതിര്‍ത്തി നഗരമായ നജ്‌റാനിലെ ഒരു സ്‌കൂളില്‍ ഹൂതികള്‍ തൊടുത്തുവിട്ട ഷെല്‍ പതിച്ച് കേടുപാടുകള്‍ സംഭവിച്ചു. തുടര്‍ന്ന് സൗദി സിവിലി ഡിഫന്‍സ് ഉദ്യോഗസ്ഥര്‍ സ്ഥലത്തെത്തി ആവശ്യമായ മുന്‍കരുതല്‍ നടപടികള്‍ സ്വീകരിച്ചു. ഹൂതികള്‍ മിസൈല്‍ ആക്രമണം നടത്തിയതോടെ സൗദി സഖ്യസേന വന്‍ തിരിച്ചിടിയാണ് നടത്തുന്നത്. കഴിഞ്ഞ 24 മണിക്കൂറിനുള്ളില്‍ മാത്രം സൗദി സേന തങ്ങളുടെ നിയന്ത്രണത്തിലുള്ള പ്രദേശങ്ങളില്‍ 94 ആക്രമണങ്ങള്‍ നടത്തിയതായി ഹൂതികള്‍ ആരോപിച്ചു. യുദ്ധം പുനരാരംഭിച്ചതിനു ശേഷം തങ്ങളുടെ കേന്ദ്രങ്ങള്‍ക്ക് നേരെ സൗദി നടത്തുന്ന ആക്രമണങ്ങളുടെ എണ്ണം 1,350 കടന്നതായും ഹൂതി വക്താക്കള്‍ അറിയിച്ചു. അതേ സമയം, മേഖലയില്‍ ഏതെങ്കിലും തരത്തിലുള്ള ഭീഷണിയുണ്ടായാല്‍ മാരകമായ തിരിച്ചടി നല്‍കുമെന്ന് ഇറാന്റെ ഇസ്ലാമിക് റെവല്യൂഷണറി ഗാര്‍ഡ് കോര്‍പ്‌സ് (ഐആര്‍ജിസി) മുന്നറിയിപ്പ് നല്‍കി. 2024 ഒക്ടോബറില്‍ ഇസ്രായേലിന് നേരെ നടത്തിയ മിസൈല്‍ ആക്രമണത്തേക്കാള്‍ ശക്തമായ തിരിച്ചടിയാകും നല്‍കുകയെന്നാണ് ഇറാന്റെ ഭീഷണി. അതേസമയം, മേഖലയിലേക്ക് അമേരിക്ക കൂടുതല്‍ യുദ്ധക്കപ്പലുകള്‍ അയച്ചുകൊണ്ടിരിക്കുകയാണ്.
