@basmaskitchen: OLD SCHOOL KARAK ☕️🤎 | شاي كــــرك على أصوله ريحة الحبهان والقرفة، السكر المتكرمل، والشاي المكمر، تفاصيل صغيرة بس هي اللي بتفرق في طعم كوباية كرك غنية ومظبوطة على أصولها المقادير: * ٢ ملعقة كبيرة سكر بني * ١½ ملعقة كبيرة شاي أسود حبيبات * ١½ ملعقة كبيرة أوراق شاي أسود * ٥ فصوص حبهان * ١ عود قرفة * ٦٥٠ مل مية * ١٨٠ مل حليب مبخر * كام شعرة زعفران الطريقة: ١. في طاسة سخنة وجافة، بحمص الحبهان والقرفة تحميصة خفيفة (Dry Toasting) علشان الحرارة تساعد الزيوت العطرية والنكهات اللي جواهم تطلع. بعدها بدقهم في الهون دقة بسيطة، مجرد تكسير مش طحن. ٢. في حلة صغيرة بحط السكر البني مع الحبهان والقرفة، وبسيب السكر يتكرمل على نار متوسطة من غير تقليب في البداية، لغاية ما يسيح وياخد لون كراميل دهبي غامق، و ناخد بالنا إنه ما يتحرقش. ٣. بضيف المية بحذر لأن الكراميل هيعمل فوران وبخار، وبقلب لغاية ما الكراميل يدوب. ٤. بضيف الشاي الأسود الحبيبات مع أوراق الشاي، وبسيب الخليط يغلي كذا غلوة علشان يبدأ يطلع لونه ونكهته. ٥. بطفي النار وبغطي الحلة لمدة ٣٠ دقيقة. ودي مرحلة الـSteeping أو التكمير، اللي بتساعد على استخلاص نكهة الشاي والتوابل بشكل أعمق، وبتدي الكرك الطعم القوي والمركز اللي بندور عليه. ٦. بعد نص ساعة، برجع الحلة على النار لغاية ما تغلي تاني، وبضيف الحليب المبخر، وبستنى لغاية ما الخليط يبدأ يغلي ويرتفع. ٧. أول ما الكرك يفور، برفع الحلة من على النار لثواني لغاية ما يهدى، وبرجعها تاني تاخد غلوة جديدة. بكرر الحركة دي حوالي ٤–٥ مرات، مع الانتباه علشان اللبن ما يفورش بره الحلة أو يتحرق من تحت. ٨. بطفي النار تماما، وبضيف شعيرات الزعفران في الآخر علشان تتنقع في الكرك السخن وتدي نكهتها المميزة وآخر خطوة… الـ Tea Pulling بنقل الكرك من حلة للتانية أكتر من مرة، مع رفع حلة الصب لمسافة مناسبة علشان يتكون تيار طويل من الشاي. التكنيك ده معروف باسم Tea Pulling ، ومعناه حرفيا «الشاي المسحوب» الهدف منه إنه يساعد على مزج الشاي بالحليب بشكل متجانس، ويدخل كمية بسيطة من الهوا أثناء الصب، فتتكون رغوة خفيفة على الوش، وكمان يساعد على تهدئة درجة حرارة الشاي شوية قبل التقديم. وأخيرا، بنقل الكرك للبراد من غير ما أصفيه، لأن البراد نفسه فيه مصفاة داخلية بتحجز أوراق الشاي والتوابل وقت الصب. ويتقدم سخن، سادة أو مع بسكويت، بوراتا (Paratha)، كيك أو شابورة على الطريقة الكلاسيكية 🤎 وبس كده، كوباية كرك على أصوله احفظوا الوصفة وجربوها، وقولولي بتحبوا الكرك تقيل ومركز ولا خفيف شوية؟ #KarakTea #شاي_كرك #BasmaKitchen #OldSchoolKarak #TeaLovers
