ဘယ်လောက်ကြာကြာလက်တွဲမယ်၊ ဘယ်လောက်အထိချစ်ပေးရမယ်၊ ဘယ်လောက်အထိဂရုစိုက်ရမယ်ဆိုတဲ့ သတ်မှတ်ချက်တွေ ကိုယ့်မှာမရှိဘူး။ ကိုယ်ချစ်မိတဲ့အခါ ကိုယ့်စိတ်က ပေးနိုင်သလောက် ပေးချင်တယ်။ ကိုယ့်ဘက်က ပိုချစ်ပေးနေရတာဖြစ်နေလည်း ဘာမှမဖြစ်ဘူး။ ချစ်ခြင်းဆိုတာ တစ်ဖက်နဲ့တစ်ဖက် အတိုင်းအတာချိန်ပြီး ပေးရတဲ့အရာမှ မဟုတ်တာပဲ။ မင်းကိုချစ်ရတာကို ကိုယ်က တာဝန်တစ်ခုလို မမြင်ဘူး။ ကိုယ့်စိတ်ထဲမှာ အလိုလိုဖြစ်လာတဲ့ နူးညံ့တဲ့ခံစားချက်တစ်ခုလိုပဲ သဘောကျနေမိတာ။ တစ်ခါတလေ မင်းကိုကြည့်နေရင်း ဘာအကြောင်းမှမရှိဘဲ ပြုံးမိတယ်။ မင်းနဲ့စကားပြောချင်တယ်၊ အနားကိုလှမ်းချင်တယ်၊ မင်းလက်ကိုကိုင်ချင်တယ်၊ အခါခါနမ်းချင်နေတယ်။ အဲဒီလို ချစ်ခြင်းတွေက အရမ်းကြီးကျယ်ခမ်းနားတဲ့အရာတွေ မဟုတ်ပါဘူး။ ဒါပေမယ့် ကိုယ့်အတွက်တော့ တစ်နေ့တာလုံးကို နူးညံ့သွားစေတဲ့ အရာတွေပါ။ မင်းအကြောင်းတွေးမိတိုင်း ကိုယ့်စိတ်ထဲမှာ ပန်းကလေးတွေ ပွင့်လာသလိုမျိုး… မင်းနဲ့ပတ်သက်လာရင် ကိုယ်က ထူးထူးခြားခြား နူးညံ့သွားတတ်တယ်။ ဘာကြောင့်လဲလို့ မေးရင်လည်း အဖြေရှာမရဘူး။ ချစ်လို့ပဲ ဆိုတဲ့အဖြေတစ်ခုနဲ့ပဲ လုံလောက်နေတယ်။ ဒီနေ့လည်း ဘာမှလုပ်မရဘူးကွယ်။ လုပ်စရာတွေရှိပေမယ့် စိတ်က မင်းဆီပဲ ရောက်ရောက်သွားတယ်။ ဖုန်းကိုကိုင်မိရင် မင်းဆီစာပို့ချင်တယ်။ မင်းပုံတွေ့ရင် ခဏလေးနဲ့တောင် မျက်နှာပျော်သွားတယ်။ တိတ်တိတ်လေးနေရင်လည်း မင်းအကြောင်းတွေ ပြန်တွေးမိတယ်။ တကယ်တော့ ကိုယ်က မင်းကိုချစ်မိတာထက် ပိုပြီး ဘာမှမသိတော့တာမျိုးပါ။ မင်းကိုရွေးချယ်ခဲ့တဲ့နေ့ကစပြီး ကိုယ့်စိတ်က မင်းဘက်ကိုပဲ တဖြည်းဖြည်းယိုင်လာခဲ့တာ။ ဘယ်လောက်အထိချစ်ရမယ်ဆိုတာ မသိဘူး… ဘယ်အချိန်ထိ ချစ်နေမယ်ဆိုတာလည်း မပြောတတ်ဘူး။ သိတာတစ်ခုကတော့—ဒီနေ့လည်း မင်းကိုချစ်နေတယ်၊ မနက်ဖြန်လည်း မင်းကိုချစ်ချင်တယ်၊ ပြီးတော့ ကိုယ့်စိတ်ထဲက ဒီနူးညံ့တဲ့အချစ်လေးကို မင်းအတွက်ပဲ ဆက်သိမ်းထားချင်တယ်။ #FeelLyricswithUs #feelings #lyrics - @feel.lyrics.with