@kuningarathabdulla1: ഖുർആനിലെ മൂന്നാമത്തെ അധ്യായം സൂറത്ത് ആലു ഇംറാൻ. ഈ അധ്യായം വായിക്കുമ്പോൾ എനിക്ക് തോന്നിയത്, ഒരു മതത്തിന്റെ വിശ്വാസങ്ങൾ മാത്രം പഠിക്കുന്നതിനേക്കാൾ കൂടുതൽ കാര്യങ്ങൾ ഇവിടെ ചർച്ച ചെയ്യപ്പെടുന്നു എന്നതാണ്. ഇവിടെ മറിയമുണ്ട്. ഈസാ, യേശുവുണ്ട്. ഇൻജീലുണ്ട്. മുൻകാല വേദഗ്രന്ഥങ്ങളെക്കുറിച്ചുള്ള പരാമർശങ്ങളുണ്ട്. അതോടൊപ്പം മനുഷ്യന്റെ വിശ്വാസം, സംശയം, തർക്കം, അധികാരം, അഹങ്കാരം, ഐക്യം, പരാജയം എന്നിവയും കടന്നുവരുന്നു. അതുകൊണ്ട് ഈ അധ്യായം വായിക്കുമ്പോൾ ഇത് മുസ്ലിംകളുടെ കാര്യമാണ് എന്ന് മാത്രം പറഞ്ഞ് മുന്നോട്ട് പോകാൻ കഴിയില്ലെന്ന് എനിക്ക് തോന്നി. മറിയവും ഈസായും ആലു ഇംറാനിലെ ഏറ്റവും ശ്രദ്ധേയമായ ഭാഗങ്ങളിലൊന്ന് മറിയത്തെക്കുറിച്ചുള്ള വിവരണമാണ്. മറിയത്തിന്റെ ജനനത്തിന് മുമ്പുള്ള കുടുംബപ്രാർത്ഥന മുതൽ, അവളുടെ വളർച്ചയും സകരിയ്യയുടെ സംരക്ഷണവും, പിന്നീട് ഈസായുടെ ജനനവും വരെ ഈ അധ്യായം കൊണ്ടുപോകുന്നു. മറിയത്തെ വിശുദ്ധയും ദൈവത്താൽ തിരഞ്ഞെടുക്കപ്പെട്ടവളുമായാണ് ഖുർആൻ അവതരിപ്പിക്കുന്നത്. ഇവിടെ ഒരു കാര്യം പ്രത്യേകം ശ്രദ്ധിക്കണം. ഇസ്‌ലാം യേശുവിനെ നിഷേധിക്കുന്നില്ല. പക്ഷേ യേശുവിനെക്കുറിച്ചുള്ള ക്രിസ്തീയ വിശ്വാസത്തിൽ നിന്ന് വ്യത്യസ്തമായ ഒരു theological നിലപാടാണ് ഖുർആൻ സ്വീകരിക്കുന്നത്. ക്രിസ്ത്യൻ വിശ്വാസത്തിന്റെ കേന്ദ്രത്തിൽ യേശുവിന്റെ ദൈവികത, ക്രൂശീകരണം, പുനരുത്ഥാനം തുടങ്ങിയ ആശയങ്ങൾ പ്രധാനപ്പെട്ടവയാണ്. ഖുർആനിലെ യേശുവിന്റെ അവതരണം അതിൽ നിന്ന് വ്യത്യസ്തമാണ്. ഈസാ മറിയത്തിന്റെ മകനായ മസീഹാണെന്നും, അത്ഭുതകരമായ ജനനമുള്ളവനാണെന്നും, ദൈവത്തിന്റെ ദൂതനാണെന്നും ഖുർആൻ പറയുന്നു. 3:59-ൽ ഈസായുടെ ഉദാഹരണം ആദമിനോട് താരതമ്യം ചെയ്യുന്നതും കാണാം. ഇതാണ് ഇവിടെ ഒരു പ്രധാന വ്യത്യാസം. വ്യത്യാസം ഉണ്ടെന്നത് മറ്റൊരാളുടെ വിശ്വാസത്തെ അപമാനിക്കണം എന്നർത്ഥമല്ല. ഒരു ക്രിസ്ത്യാനി യേശുവിനെ എങ്ങനെ കാണുന്നു എന്നും, ഒരു മുസ്ലിം യേശുവിനെ എങ്ങനെ കാണുന്നു എന്നും മനസ്സിലാക്കുന്നത് രണ്ടാണ്. മനസ്സിലാക്കുന്നത് അംഗീകരിക്കുന്നതിനു തുല്യമല്ല. വ്യത്യാസം പറയുന്നത് അപമാനിക്കുന്നതിനു തുല്യമല്ല. മതഗ്രന്ഥങ്ങൾ തമ്മിലുള്ള ബന്ധം എന്നൊരു വലിയ ചോദ്യം ആലു ഇംറാൻ 3:3-ൽ തൗറാത്തിനെയും ഇൻജീലിനെയും മുൻകാല വെളിപ്പെടുത്തലുകളുമായി ഖുർആൻ പരാമർശിക്കുന്നു. അതിനാൽ ഖുർആൻ വായിക്കുമ്പോൾ ക്രിസ്തുമതത്തെയും യഹൂദമതത്തെയും പൂർണ്ണമായി ഒഴിവാക്കി ഇസ്‌ലാമിനെ മാത്രം മനസ്സിലാക്കാൻ കഴിയില്ല. ഇവിടെ എനിക്ക് തോന്നിയ ഒരു പ്രധാനപ്പെട്ട കാര്യം മതങ്ങളെ പഠിക്കുമ്പോൾ, ഒരു മതത്തെ മറ്റൊരു മതത്തിന്റെ കണ്ണിലൂടെ മാത്രം നോക്കരുത്. ഒരു ക്രിസ്ത്യാനിയുടെ വിശ്വാസം മനസ്സിലാക്കണമെങ്കിൽ ക്രിസ്തീയ ഗ്രന്ഥങ്ങളും പാരമ്പര്യവും പഠിക്കണം. ഒരു മുസ്ലിമിന്റെ വിശ്വാസം മനസ്സിലാക്കണമെങ്കിൽ ഖുർആനും ഇസ്‌ലാമിക പാരമ്പര്യവും പഠിക്കണം. ഒരു ഹിന്ദുവിന്റെ വിശ്വാസം മനസ്സിലാക്കണമെങ്കിൽ വേദങ്ങളും ഉപനിഷത്തുകളും ഇതിഹാസങ്ങളും പുരാണങ്ങളും ഉൾപ്പെടെയുള്ള അതിന്റെ വലിയ പാരമ്പര്യം പഠിക്കണം. കേട്ടറിവും പഠിച്ചറിവും ഒരുപോലെയല്ല. പിന്നെ വരുന്നത് കൂടുതൽ വലിയൊരു ചർച്ചയാണ് ആലു ഇംറാൻ 3:7-ൽ ഖുർആൻ ചില ആയത്തുകളെ മുഹ്കമാത്ത് വ്യക്തമായ ആയത്തുകൾ എന്നും ചിലതിനെ മുതശാബിഹാത്ത് വ്യാഖ്യാനം ആവശ്യപ്പെടുന്ന അർത്ഥത്തിൽ സങ്കീർണ്ണമായ ആയത്തുകൾ എന്നും വേർതിരിക്കുന്നതായി കാണാം. ഇത് എനിക്ക് വളരെ പ്രധാനപ്പെട്ടൊരു വായനയായി തോന്നി. കാരണം ഏതൊരു മതഗ്രന്ഥവും വായിക്കുമ്പോഴും ഒരു വരി മാത്രം എടുത്ത് അതിന്റെ അടിസ്ഥാനത്തിൽ മുഴുവൻ മതത്തെയും വിധിക്കുന്നത് അപകടകരമാണ്. ഒരു വാക്യം കണ്ടു മതത്തെ വിധിക്കുന്നതിന് മുമ്പ്, ആ വാക്യം ഏത് സാഹചര്യത്തിലാണ്, മുൻപും പിന്നിലും എന്താണ്, അതിന്റെ ഭാഷാപരമായ അർത്ഥം എന്താണ്, ആ മതത്തിന്റെ പാരമ്പര്യ വ്യാഖ്യാനം എന്താണ് എന്നൊക്കെ നോക്കേണ്ടതുണ്ട്. ഇത് ഖുർആനു മാത്രം ബാധകമായ കാര്യമല്ല. എല്ലാ മതഗ്രന്ഥങ്ങൾക്കും ബാധകമായ വായനാരീതിയാണ്. മറ്റൊരു ശ്രദ്ധേയമായ ഭാഗം 3:64-ൽ ഗ്രന്ഥക്കാരേ എന്ന് അഭിസംബോധന ചെയ്ത് പൊതുവായ ഒരു അടിസ്ഥാനത്തിലേക്ക് വരാനുള്ള ക്ഷണം കാണാം ദൈവത്തെ മാത്രം ആരാധിക്കുക, അവനോട് പങ്കാളികളെ ചേർക്കാതിരിക്കുക തുടങ്ങിയ ആശയങ്ങളിലൂടെ. ഇത് വായിക്കുമ്പോൾ എനിക്ക് തോന്നിയത് മതസംവാദം എന്നത് ആദ്യം തന്നെ നീ തെറ്റ്, ഞാൻ ശരി എന്ന രീതിയിൽ തുടങ്ങേണ്ട ഒന്നല്ല എന്നാണ്. ആദ്യം നമ്മൾ തമ്മിൽ എന്താണ് പൊതുവായി ഉള്ളത് എന്ന് ചോദിക്കാനും കഴിയണം. എന്നാൽ ഈ അധ്യായം ക്രിസ്തുമതത്തെക്കുറിച്ച് മാത്രം അല്ല ഇതാണ് ഒരുപക്ഷേ ഏറ്റവും പ്രധാനപ്പെട്ട കാര്യം.ആലു ഇംറാനിന്റെ വലിയൊരു ഭാഗം ഉഹുദ് യുദ്ധത്തിന്റെ അനുഭവങ്ങളിലേക്കും പോകുന്നു.വിശ്വാസികൾ നേരിട്ട പരാജയം, അനുസരണക്കേട്, ഭയം, നിരാശ, നേതൃത്വം, ക്ഷമ ഇതെല്ലാം അവിടെ ചർച്ച ചെയ്യപ്പെടുന്നു. 3:121 മുതൽ ഉഹുദുമായി ബന്ധപ്പെട്ട വിവരണം ആരം..... വായിച്ചുകൊണ്ടിരിക്കും.അംഗീകരിക്കാൻ മാത്രം അല്ല.എതിർക്കാൻ മാത്രം അല്ല.മനസ്സിലാക്കാൻ. കാവ്യ ശ്രീനിവാസ്

عبدالله

Open In TikTok:

Region: QA

Monday 05 October 2026 01:15:29 GMT