هاوەڵان وتیان: ئەی رسول اللە، پردەکە چییە و چۆنە؟ فەرمووی: پردێکی زۆر لووس و خلیسکە و پێی لەسەر جێگیر نابێت، تیایدایە قوڵاف و چەنگاڵ و دڕکی تیژ وەک دڕکی داری سەعدان کە خەڵکی دەڕفێنن بەپێی کردەوەکانیان. جا باوەڕداران بەسەریدا تێدەپەڕن؛ هەندێکیان وەک چاوتروکانێک، هەندێکیان وەک هەورەبروسکە، هەندێکیان وەک با، هەندێکیان وەک باڵندە، و هەندێکیان وەک ئەسپ و وشتری ڕەسەنی تیژڕەو؛ ئیتر یەکێکیان سەلامەت و بێ‌زیان ڕزگاری دەبێت، و یەکێکیان بە برینداری ڕزگاری دەبێت، و یەکێکیشیان فڕێدەدرێت و دەکەوێتە ناو ئاگری دۆزەخەوە، پێغەمبەرەکەشتان لەسەر پردەکە دەوەستێت و دەپاڕێتەوە و دەڵێت: پەروەردگارا سەلامەتیان بکە، سەلامەتیان بکە. کاتێک باوەڕداران لە ئاگرەکە پەڕینەوە و ڕزگاریان بوو، سوێند بەو اللەی گیانی منی بە دەستە، هیچ یەکێکتان لە داواکردنی حەقی خۆیدا ئەوەندەی باوەڕداران لە ڕۆژی دواییدا توند و پێداگر نابێت لە پاڕانەوە لە پەروەردگار بۆ ئەو برایانەیان کە لە ناو ئاگری دۆزەخدا ماونەتەوە، دەڵێن: پەروەردگارا! براکانمان لەگەڵ ئێمە نوێژیان دەکرد و ڕۆژوویان دەگرت و حەجیان دەکرد (بۆیە ڕزگاریان بکە)، اللەش پێیان دەفەرموێت: بڕۆن هەر کەسێکتان ناسی لە ئاگر دەریبهێنن، ڕووخساریشیان لەسەر ئاگر قەدەغە دەکرێت و دەیانناسنەوە و کۆمەڵێکی زۆر لە ئاگر دەردەهێنن، پاشان خودا دەفەرموێت: بگەڕێنەوە، هەرکەسێک بە کێشی دینارێک ئیمان و خێر لە دڵیدابێت دەریبهێنن، دووبارە دەڕۆن و خەڵکێکی زۆر ڕزگار دەکەن، پاشان دەفەرموێت: بڕۆن هەرکەسێک بە کێشی نیوە دینارێک خێری تێدابێت دەریبهێنن، تا دەگاتە ئەوەی دەفەرموێت: بڕۆن هەرکەسێک بە کێشی گەردیلەیەکیش (زەڕڕەیەک) خێری تێدابێت لە ئاگر دەریبهێنن و ئەوانیش دەریان دەهێنن. لە کۆتاییدا اللە دەفەرموێت: فریشتەکان شەفاعەتیان کرد، پێغەمبەران شەفاعەتیان کرد، باوەڕداران شەفاعەتیان کرد، و کەس نەماوە بێجگە لە بەبەزەییترینی بەبەزەییەکان (اللەی میهرەبان)، ئینجا مشتێک لە ئاگر دەردەهێنێت کە کۆمەڵە خەڵکێکی زۆری تێدایە هەرگیز هیچ چاکەیەکیان نەکردووە و سووتاون و بوونەتە خەڵوز، دەخرێنە ناو ڕووبارێک لە دەروازەی بەهەشتدا پێی دەوترێت ڕووباری ژیان، لەوێ وەک تۆوی ناو لافاو جەستەیان سەرلەنوێ چرۆ دەکاتەوە و پاک و جوان دەبنەوە، پاشان دەخرێنە ناو بەهەشتەوە و ئەهلی بەهەشت پێیان دەڵێن: ئەمانە ئازادکراوانی خوای میهرەبانن کە بەبێ هیچ کردەوەیەکی خۆیان و تەنها بە فەزڵی اللە چوونەتە بەهەشتەوە. (ئەمە دەقی فەرموودە درێژەکەیە لە سەحیحی موسلیم و بوخاری). - @hoshmand.hasan7