Бірнеше жылдан бері қазақстандықтар үшін қолжетімді көлік іздейтін негізгі нарықтардың біріне айналған Грузияның автобазарына қатысты талаптар айтарлықтай күшейді. Жаңа ережелерден кейін бұл ел арқылы ескі әрі арзан көлік әкелудің бұрынғыдай тиімділігі төмендеп барады. 2026 жылы Грузия билігі алты жылдан асқан жеңіл автомобильдерге қатысты талаптарды қатаңдатты. Бастапқыда мұндай көліктерді елге кіргізуге тыйым салу жоспарланғанымен, кейін билік толық тыйымның орнына жоғары кедендік тариф енгізу туралы шешім қабылдады. Алты жылдан асқан көліктер үшін тариф қозғалтқыш көлемінің әр текше сантиметріне 4,5 лари болып белгіленді. Бұған дейін стандартты мөлшерлеме 0,8 лари болған. Жаңа талаптар Грузияның көлік нарығына да әсер етіп үлгерді. 2026 жылдың алғашқы төрт айында елден автомобиль реэкспорты 29 пайызға төмендеген. Қазақстан тарапынан сұраныс та айтарлықтай азайғаны хабарланды. Нарық өкілдері мұны жаңа заңдар, қымбаттаған кедендік рәсімдер және бизнестің мүмкіндіктерінің шектелуімен байланыстырады. Қазақстанда да шетелдік нөмірдегі автомобильдерді пайдалану талаптары қатаң. 2026 жылғы сәуірде Үкімет шетелде тіркелген көліктердің Қазақстан аумағына уақытша әкелінуі мен пайдаланылуына қатысты ережелерді өзгертті. Қолданыстағы талап бойынша шетелдік көлікті кедендік рәсімдеусіз Қазақстан азаматына беріп, тұрақты пайдалануға болмайды. Atyrau OIL atyrauoil.official - @zakon_555_