@addefkr6: የዘመናችን ኤርምያስ፣ በእንባቸው ጅረት የደረቀውን የልባችንን ምድር ሲያረሰርሱ የኖሩት፤ በመከራችን ጊዜ እንደ ሙሴ በእግዚአብሔር ፊት ቆመው ስለበጎቻቸው ሲማለዱ የዕድሜያቸውን ፀሐይ ያስገቡት አንጋፋው አባት... የሰላሌው ሀገረ ስብከት ሊቀ ጳጳስ ብፁዕ አቡነ ቀውስጦስ አንድ ከባድ ቃል ተነፈሱ... "ሸኙኝ!" ይህች አንዲት ቃል የቱንም ያህል አጭር ብትሆንም፥ በውስጧ የያዘችው ጥልቅ ምስጢርና ትንቢታዊ ነጸብራቅ ግን የሁላችንንም ልብ በሐዘን ጦር የምትወጋ ናት። አባታችን "ሸኙኝ" ሲሉን ወዴት ሊሄዱብን አስበው ይሆን? የእረኝነት በትር ይዘው፣ በመስቀላቸው እየባረኩ ካሳደጉን መንጋቸው ተለይተው ወዴት ሊያመሩ ነው? ምናልባት ከዚህች ከንቱ ዓለም ጫጫታና ግርግር ርቀው፥ እንደ ብፁዕ አቡነ እንድርያስ ዐጽመ ርስት ወደሆነው በረሃ፣ ወደ ዝምታው ዓለም ሊገቡ አስበው ይሆን? ዓይኖቻቸው የዓለምን ከንቱነት ከማየት ይልቅ፣ ከፈጣሪያቸው ጋር ብቻ በጸሎትና በዕንባ ለመነጋገር ቆርጠው ይሆን? እንደዚያ ከሆነማ እንኳን እሳቸው፣ እኛንም ከዚሁ ከክፋት ዓለም አውጥተው ባስከተሉን ብለን እንመኛለን። ወይስ... ወይስ የሁላችንም ዕጣ ፈንታ ወደሆነው፣ ማንም ወደማይቀርበትና ወደማያመልጥበት ወደዚያኛው ዓለም ሊያመሩ ጉዞ ጀምረው ይሆን? "የመሄጃዬ ሰዓት ደርሷልና በጸሎታችሁ ስንቅ አዘጋጁልኝ" እያሉን ይሆን? ይህን ማሰቡ እንኳ እጅግ ይከብዳል! ያለ አባቶች ጥላ፣ ያለ እረኛ ጸሎት፣ ያለ ብፁዓን አባቶቻችን ንጹሕ ዕንባ በዚህች ማዕበል በሚያናውጣት ዓለም ላይ መቆም ምንኛ ያስፈራል! ብፁዕ አባታችን ሆይ! የእንባዎ ዘመን መቼም አይረሳም። በፈገግታዎ ውስጥ ያለውን የእናትነት ርኅራኄ፣ በዝምታዎ ውስጥ ያለውን የአባትነት ግርማ እንናፍቃለን። ወዴትም ይሂዱ ወዴት... ሥጋዊ መለየት ቢኖር እንኳ መንፈሳዊ ትስስራችን መቼም አይበጠስም። የብፁዕነታቸው አባታዊ በረከት፣ ከልብ የሚመነጨው ጸሎታቸውና የፈሰሰው እንባቸው በእኛ በልጆቻቸው፣ በቅድስት ቤተ ክርስቲያንና በሀገራችን ላይ እንደ ጤዛ ወርዶ፣ እንደ መና ዘንቦ ለዘለዓለሙ ይኑር!! አሜን! #ብፁዕአቡነቀውስጦስ #creatorsearchinsights