@firduaklilu: የአዲስ አበባ ወሬ ከቴሌ ኔትወርክ ይፈጥናል። ሰሞኑን በየማኪያቶ ቤቱ እና በየቢሮው ኮሪደር ላይ እንደ 5ጂ ኔትወርክ ፈጥኖ የሚሰራጨው ሹክሹክታ የኢትዮ ቴሌኮሟን ዋና ሥራ አስፈፃሚ የወይዘሮ ፍሬሕይወት ታምሩን ቀጣይ ዕጣ ፈንታ የተመለከተ ነው። ነገሩ እንዲህ ነው... "ካቢኔ ሊሽከረከር ነው፤ በዚህ ሽክርክሪት ውስጥ ደግሞ ወይዘሮ ፍሬሕይወት አሁን ካሉበት ማማ ላይ ተነስተው ወደ ሚኒስትርነት ዙፋን ሊወነጨፉ ይችላሉ" የሚል ነው። አያችሁ አይደል... በእኛ ሀገር ትልቁ አደጋ ሥራ ሰርቶ ማሳየት ነው። ተቋምህን በስኬት ከቀየርክ "እንግዲያውስ ይሄኛው መስሪያ ቤትም ስለተበላሸ እባክህን እሱንም ጠግንልን" ተብለህ በሹመት ትቀጣለህ። ፍሬሕይወት ቴሌን ከእንቅልፉ አነቃችው። ድሮ ካርድ ስንሞጭር ጥፍራችን ያልቅ የነበረውን ህዝብ በ"ቴሌ ብር" አዘመነችው (አሁን አሁንማ ለማኝም "ቴሌ ብር ካለህ አጋራኝ" እስከማለት ደርሷል)። 5ጂን አመጣች፤ አሁን ደግሞ የቴሌን 10 በመቶ አክሲዮን ለህዝብ ቸበቸበች። ታዲያ ይህን ሁሉ ተዓምር ያየው የሹመት ሟርተኛ አፉን ከፍቶ፤ "ይቺ ሴት እዚህ ቦታ ላይ አንሳባታለች! ይህን በቴሌ ያሳየችውን የፈጣን አፈጻጸም ጥበብ፣ ለምን እንደ ኢኖቬሽንና ቴክኖሎጂ፣ ወይንም የገንዘብ ሚኒስቴር ሄዳ አትደግመውም?... ኸረ እንደውም ኢትዮ ኢንቨስትመንት ግሩፕን በሚኒስትር ማእረግ ትምራ" እያለ ማውጠንጠን ጀምሯል። ለነገሩ አንዳንዱ የኛ ሰው አንዴ ጀግና ካገኘ፣ "እባካችሁ እሳቸውን የመብራት ኃይልም፣ የውሃና ፍሳሽም፣ የትራፊክ ፖሊስም አድርጉልን!" ማለቱ አይቀርም። በሌላ በኩል ደግሞ "ተው እንጂ! እየሮጠ ያለን ፈረስ መሃል መንገድ ላይ ኮርቻ አንቀይርም" የሚሉ የውስጥ አዋቂዎች አሉ። ምክንያታቸው ደግሞ አሳማኝ ነው። ቴሌ አሁን ገና አክሲዮን ሸጦ ወደ ካፒታል ገበያ አዲስ ሙሽራ ሆኖ እየገባ ነው። ከሳፋሪኮም ጋር ያለው የገበያ ትንቅንቅ ደግሞ እንደ አውራ ዶሮ ፍልሚያ የጋለበት ሰዓት ነው። በዚህ መሃል ፍሬሕይወትን ነቅሎ ወደ ሌላ ሚኒስቴር መውሰድ፣ እየበረረ ካለ አውሮፕላን ላይ ሞተር ነቅሎ ለታክሲ እንደመግጠም ይቆጠራል። "እሳቸው ቢነሱ ይሄን የቴሌን ግዙፍ ጫማ ማን ይጫማዋል?" የሚለው ጥያቄ የመንግስትም፣ የህዝቡም ትልቁ ስጋት ሆኗል። ያም ሆነ ይህ የሴትዮዋ ስኬት የፈጠረው ጣጣ ነው። እንደ በፊቱ ኔትወርክ "አልሰራም፣ አይሰማም፣ ከሽፋን ውጪ ነው" ብላ ቢሆን ኖሮ ማን ጠይቋት! እሳቸው ወደ ሚኒስትርነት ቢያድጉም፣ የጀመሩትን ለማጠናቀቅ ባሉበት ቢቀጥሉም፣ በአዲስ አበባ የሹክሹክታ ገበያ ላይ ግን የተቋም ስኬት መለኪያ መሆናቸውን አስመስክረዋል። የዘንድሮው የፖለቲካችን ትልቁ የእንቆቅልሽ ጥያቄም፣ 'ወይዘሮ ፍሬሕይወት የቴሌን ኔትወርክ አቃንተው ወደ ሚኒስትርነት ኮሪደር ይሻገራሉ ወይስ አይሻገሩም?' የሚለው አይደለም። ዋናው ስጋት እሳቸው ድንገት ወደ ሌላ ኃላፊነት ቢዛወሩ፣ አዲሱ ተተኪ የቴሌን አሰራር ወደ ድሮው የ'ሚስኮል' እና 'ከሽፋን ውጪ ነዎት' ዘመን እንዳይመልሰው ነው። ሲጀመር የኛ ሀገር የሹመት ነገር ልክ እንደ ሞባይል ዳታችን ነው፤ ሳይታሰብ ይመጣል፣ ሳይታሰብ ደግሞ ድርግም ይላል። ብቻ ወይዘሮ ፍሬሕይወት ወደ ሌላ ከፍ ያለ ሀገራዊ ኃላፊነት 'አፕግሬድ' ቢደረጉም፣ የቴሌ ነገር ከእሳቸው መውጣት በኋላ ወደ ኋላ 'ዳውንግሬድ' ሆኖ... ኔትወርክ ፍለጋ እንደ ድሮው ዛፍ ላይ ወደ መውጣት አዙሪት እንዳንመለስ የሁላችንም የጋራ ጸሎት ነው!

ፍርዳወቅ የሕግ አገ/ት Firdawek legal

Open In TikTok:

Region: ET

Tuesday 06 October 2026 17:05:23 GMT