حاول تفهم الفرق بين إني خسرتك وبين إني إتنازلت عنك بكامل إرادتي حقيقي نحن محتاجين نوضِح نقطة مهمة شديد للناس الإتقطعت علاقتنا بيهم ! إنو نحن لما فارقناكم ونهينا علاقتنا بيكم وأي زول فينا مشى من طريق .. فارقناكم لأنو نحن عايزين كدا ! لأنو نحن تعبنا معاكم شديد وإستحملنا عشانكم كتير وصبرنا ليكم صبر ما ليهو حد .. وعملنا عشانكم المستحيل في الوقت الإنتو ما عملتو فيهو عشانا الممكن ! حبينا نوضح ليكم إنو نحن ما خسرناكم ! بس نحن رخينا يدنا منكم بعد ما كنا متمسكين بيكم وماليين بيكم يدنا ! لما لقينا روحنا بنقدم أكتر مما بنأخد .. ونسأل ونطّمّن عليكم في اليوم الواحد أكتر من مرة .. وبنتأذي منكم بدل المرة الوحدة ألف في الوقت الكنا نحن بنخاف عليكم من الأذى ! كان لازم نخت نقطة نهاية لعلاقتنا بيكم ونبدأ سطر جديد خالي منكم ! قررنا نرمي وراء ضهرنا الذكريات السمحة اللمتنا بيكم ونمشي منكم من غير ما نلتفت .. ما عشان نحن ما حبيناكم أو الذكريات دي ما عاجبانا ! هئه .. عشان انتو طلعتوا ما قدر العشم الختيناهو فيكم وما قدر الشيء الحلو القدمناهو ليكم فكان لازم الذكريات دي تتدفن جوانا في حتة بعيدة ماف زول يقدر يصل ليها تاني ! عموماً العلاقات إتخلقت للراحة وعشان الواحد يعيش مبسوط ! فطول ما أنا ببقى شايل هم لعلاقتي معاك .. متوترة وطبيعي في حالة خوف ونكد .. ودايماً ببقى أنا الطرف اليبعتذر والبيطبطب والبيسند ! أبشِّرك حتلقاني أخترت أقيف في النص وبكون ما قادر أقدم ليك أي شيء تاني لأنو وقتها طاقتي بتكون خلصت وحيلي معاك إنهّد ! وعادي جداً تصل معاي وأسيب يدك في نص الطريق الإتعاهدنا نمشيهو سوا لأني وقتها بكون إستوعبت تماماً أنت ما الطرف اللي بيستاهل إني أقيف معاهو ! فكان لازم عليّ ألملم باقي أطرافي وأمشي منك بعيد شديد أنا والحب الشايلاهو ليك في قلبي ! نحن ما خسرناكم حبايبي ! نحن إتخلينا عنكم بي إرادتنا وفارقناكم بي قناعة تامة ! و زي ما رفعناكم فوق في السماء حنعرف كيف ننزلكم الأرض .. ولا عزاء لقلوبنا الرّادتكم !)) وخُتوا في بالكم حاجة وحدة .. نحن ما بنخسر .. نحن بخسرونا ! في الوقت اللقيت فيهو إني براي الطرف البيعافر كان لازم أخُت نقطة نهاية لعلاقتي بيك وأبدأ سطر جديد ! - @kjoonka63